Hadia zinangea öfalua na möiʼö ba nahia si lö irai öʼondrasi ba zilalö?

1. 1. Hasambalö möiʼö ba wangondrasi nahia daʼö.

2. 2. Faoʼö ba niha böʼö ba ötötöna enaʼö laʼila lala si numalö ba nahia andrö.

3. 3. Alui wanuturu lala si tola mufaduhusi tödö, simane GPS, peta, mazui öʼohe nawöu si tola öfaduhusi tödö si no mangila lala si numalö ba nahia andrö.

Na tafili numero 1 mazui 2 ba nitutunö moroi yawa, tola manö elungu ita. Hizaʼi, na taʼogunaʼö numero 3, tola faduhu dödöda wa hasambalö takhamö nahia somasi ita taʼondrasi.

Faʼaurida andre amaedola zanörö lala si numalö ba zi sambua nahia. Manötöna ita enaʼö sökhi lua-lua waʼaurida. Tola takhamö daʼö na taʼalui wanuturu lala si tefaudu ba ginötö tahalö zi sambua angetula.

So ösa gangetula nihalöda, lö ebua lua-luania ba waʼaurida. Hizaʼi, so göi gangetula nihalöda ebua lua-luania ba waʼaurida. Angetula nihalöda andrö zangoromaʼö hadia tefaudu lala wangera-ngerada sanandrösa ba zatulö hegöi si fasala. Angetula simane daʼö, tola göi so lua-luania khöda hegöi ba niha niʼomasiʼöda, he na sökhi mazui si lö sökhi. Angetulada andrö moʼamakhaita ia sanandrösa:

• Ba waʼorudu hegöi fangowalu

• Ba wanörö sindruhu, ba halöwö, hegöi ba gefe

• Ba lala ba wangebuaʼö iraono

• Ba nifaluada ba niha böʼö

Hewisa enaʼö tola öʼila wa angetula nihalömö andrö tola iʼasogö waʼohahau dödö khöu hegöi ba nösi nomou?

Fanofu sinangea taʼangerönusi yaʼia daʼö: Hadia zanolo yaʼo enaʼö tola sökhi gangetula nihalögu sanandrösa ba zatulö hegöi si fasala?

Itutunö ba majalah andre hadia mbörö wa tola tafaduhusi tödö niwaʼö Zura Niʼamoniʼö sanandrösa ba zatulö hegöi si fasala ba hewisa enaʼö tola möi fanoloda daʼö.