Arakhagö fefu niha tola laʼila samösa lua-lua si sökhi hegöi si fasala moroi ba zi sambua angetula. Duma-dumania, ato zi fatuwu ba niha samalua fabunusa, samalua amuata fohorö, mazui samaka-makao iraono side-ide. Ba lasuno sibai niha sangoromaʼö faʼatulö, faʼasökhi dödö, hegöi sanöfaigö ba dödönia salua khö nawönia. Hizaʼi, so zangumaʼö wa lö laʼila lafili hezo zatulö mazui si fasala ba ginötö lahalö gangetula sanandrösa ba waʼorudu, ba wanörö sindruhu, hegöi ba wangebuaʼö iraono. Lawaʼö tödöra wa tola lahalö gangetula gofu hadia manö zomasi ira. Börö daʼö, ato niha zangodaligö hadia niwaʼö dödöra samösa mazui niwaʼö niha böʼö ba ginötö ihalö gangetula. Hadia sökhi lala wangera-ngera simane daʼö?

Ba ginötö tahalö gangetula sanandrösa ba zatulö hegöi si fasala, itaria taʼodaligö niwaʼö dödöda side-ide. (Roma 2:​14, 15) Iraono manö tola lafaehusi hezo zatulö hegöi si lö atulö, ba asese itegu-tegu ira tödöra na no lafalua zala. Na itugu tedou waʼebua-bua ndraono andrö, tola itugu lafahaʼö ira hezo zatulö ba si fasala moroi ba niha si so ba zi fasuira mazui moroi ba agama si farahu yaʼira. Daʼö mbörö wa tarasoi waʼomuso dödö na sökhi gangetula nihalöda ba itegu-tegu ita tödöda na lö tefaudu gangetulada.

Tödöda side-ide zamarou yaʼita ba wangoromaʼö wa tarasoi hadia nirasoi niha böʼö, taforomaʼö wangandrö saohagölö, lö ebua dödö zambuana, hegöi ba wangoromaʼö faʼahakhö dödö ba niha böʼö. Daʼö göi zanaha yaʼita enaʼö böi tafalua gamuata si möi fangafökhö dödö niha böʼö mazui si möi fangailada irege ba gafuriata itegu-tegu ita tödöda.

Hadia lua-luania na asese taʼodaligö niwaʼö dödöda? Imane si samösa ono matua si bohou ebua sotöi Garrick, ”Ufalua gofu hadia manö zomasi-masi dödögu.” Hewaʼae ba wamaiginia atulö zi sambua angetula nihalönia, hizaʼi ba gafuriata lö sökhi lua-luania. Itutunö wa ”asese ifalua gamuata fohorö, iʼogunaʼö narkoba, asese mabu ia, ba oya sibai zi lö sökhi nifaluania”.

Baero na taʼodaligö niwaʼö dödöda samösa, itaria göi taʼodaligö niwaʼö niha böʼö ba ginötö tahalö gangetula. Tola möi fanoloda daʼö börö me tola tafahaʼö ita moroi ba zi no irai alua khöra mazui ba waʼatua-tua niʼokhögöra. Na tafalua zatulö moloʼö niwaʼö nösi nomoda, si fahuwu khöda, hegöi niha böʼö, sindruhunia no taforomaʼö wa taʼameʼegö tödö mbua gera-erara.

Hadia lua-luania na taʼodaligö niwaʼö niha böʼö? Samösa nono alawe sotöi Priscila, igoʼö hadia nifalua ndra awö-awönia irege ba gafuriata ifalua gamuata wohorö ba niha si faböʼö-böʼö. Hewaʼae atulö ba wamaigi niha böʼö nifaluania andrö, hizaʼi lö irasoi waʼohahau dödö. Imane, ”Börö me ugoʼö-goʼö nifalua niha böʼö, lö urasoi waʼohahau dödö. Daʼö zondrönisi tödögu ba wamalua amuata faʼabodo ba si möi famaʼala waʼaurigu.”

Na tafatimbaisi hadia niwaʼö dödöda hegöi niwaʼö niha böʼö, tola möi fanoloda daʼö ba ginötö tahalö zi sambua angetula. Hizaʼi, lö ibönö na ha daʼö manö niʼodaligöda. Itaria, tola möi famakikoda mazui faʼauri niha böʼö gangetula nihalöda börö me lö ahori taʼila hadia lua-luania gangetulada andrö. (Amaedola 14:12) Hewaʼae sökhi ba wamaigida mazui ba wamaigi niha böʼö zi sambua angetula, hizaʼi tola manö lö sökhi lua-luania mazui lö tefaudu saʼae na mufalua gangetula andrö. Duma-dumania, so zi lö fatema ba dödö niha ba zilalö, hizaʼi fatema ba dödöra iadaʼa. Ba gofu hadia zi fatema ba dödö niha ba zilalö, te ambö tefaudu ia ba ginötöda andre.

Hadia so wanuturu lala sabölö sökhi ba wotatugöi hezo zatulö ba si fasala? Hadia so goi-goi sanandrösa ba gamuata si tola taʼoʼö ba ginötöda andre ba si lö mangaʼasogö khöda faʼafatö dödö ba zi so miföna?

Taʼandrö saohagölö börö me so wanuturu lala sanandrösa ba gamuata si lö irai tebulö, si tola mufaduhusi tödö, ba tefaudu ia gofu haʼökhö manö. Tatutunö ba artikel aefa daʼa, hezo tola tasöndra wanuturu lala andrö enaʼö tetolo ita ba wotatugöi hezo zatulö ba si fasala.