Satulö ba si Fasala: Goi-Goi Haniha Zomasiʼö Öʼoʼö?
Fefu wanuturu lala nifilida sanandrösa ba gamuata hasambalö so lua-luania ba waʼaurida. Börö me aboto ba dödö Lowalangi Yehowa daʼö, andrö wa omasi ia na taʼoʼö goi-goinia.
Omasi Yehowa na tarasoi waʼowua-wua dödö ba faʼahono dödö ba waʼauri.
”Yaʼo Yehowa Lowalangiu, samahaʼö yaʼugö ba zi sökhi, sameʼe khöu fanuturu lala ba döröwau. Sindruhu-ndruhu omasido na öʼoʼö niwaʼögu, börö me tobali dania simane ungo nidanö waʼahono dödöu, ba simane dulu nasi dania fefu zi sökhi nifaluamö.”—Yesaya 48:17, 18.
Börö me Lowalangi Zomböi yaʼita, ha yaʼia zabölö mangila hadia zinangea tafalua enaʼö tola sökhi lala waʼaurida. Omasi ia na taʼoʼö wanuturu lala nibeʼenia börö me aboto ba dödönia wa no si sökhi khöda daʼö. Na taʼoʼö wanuturu lala Lowalangi ba ginötö tahalö zi sambua angetula, hasambalö sökhi lua-luania. Tarasoi waʼahono dödö hegöi faʼowua-wua dödö.
Lö iʼandrö khöda Yehowa ba wamalua si lö sagu khöda tafalua.
”Lö abua sibai goroisa nifaʼemagu khömi maʼökhö mazui si tebai mikhamö.”—5 Moze 30:11.
Na tafalua goi-goi Lowalangi sanandrösa ba gamuata, te so zinangea tabulöʼö moroi ba lala wangera-ngera hegöi nifaluada. Hizaʼi, lö iʼandrö khöda Yehowa zi tebai tafalua. Börö me yaʼia Zomböi yaʼita, iʼila ndrohu-ndrohu zi tola tafalua. Na itugu aboto ba dödöda haniha Yehowa, taʼila wa ”tenga safökhö woloʼö oroisania”.—1 Yohane 5:3.
No ifabuʼu Yehowa wa hasambalö itolo niha somasi moloʼö goi-goinia.
”Yehowa Lowalangiu ndraʼo, ugogohe dangau kambölö ba umane khöu, ’Böi ataʼufi. Hasambalö utoloʼö.’”—Yesaya 41:13.
Faduhu dödöda wa hasambalö tola tafalua goi-goi Lowalangi börö me itolo ita. Iʼogunaʼö Daromalinia, Sura Niʼamoniʼö ba wanolo yaʼita enaʼö taʼokhögö waʼabölö hegöi tötönafö.
Zuta niha ba zi sagörö ulidanö si no morasoi wa moʼeluaha waʼaurira börö me laʼoʼö goi-goi Zura Niʼamoniʼö. Tola göi ötema mbua si sökhi na öfahaʼö ndraʼugö ba mene-mene si so ba Zura Niʼamoniʼö. Enaʼö tola öʼila sanandrösa ba daʼö, börögö wamahaʼö yaʼugö ba brosur Lala ba Wanöndra Faʼohahau Dödö Sagötö Faʼara! si no tehenaigö ba jw.org. Ba brosur andrö, so wamahaʼö sanandrösa:
-
Hewisa Zura Niʼamoniʼö Wanolonia Yaʼugö?
-
Nifabuʼu Zura Niʼamoniʼö Sameʼe Khöda Fanötöna
-
Hadia Tola Mufaduhusi Tödö Zura Niʼamoniʼö?
Na itugu öfahaʼö ndraʼugö ba Zura Niʼamoniʼö, itugu aboto ba dödömö wa moguna mene-menenia irugi iadaʼa ba ”fefu goroisania tola mufaduhusi tödö ba lö tebulö sagötö faʼara”. (Sinunö 111:7, 8) No lala sabölö sökhi na taʼaurifagö goi-goi Zura Niʼamoniʼö ba waʼaurida sanandrösa ba gamuata. Hizaʼi, lö irai ifaso ita Lowalangi ba wamalua daʼö. (5 Moze 30:19, 20; Yosua 24:15) No angetulada samösa daʼö.
