1. Fangowalu

Lö fagölö-gölö mbua gera-era niha sanandrösa ba wangowalu hegöi lala ba wanöndra faʼohahau dödö ba wongambatö.

ELUAHANIA: Lowalangi zamobörö fongambatö, ba ha yaʼia zangila hewisa enaʼö tola ohahau dödö zi sambua fongambatö. (Mareko 10:​6-9) Na foʼomo ira matua hegöi foʼomo ira alawe faoma laʼameʼegö tödö zoguna khö nawöra zamösana, tenga ha soguna khöra samösa, hasambalö larasoi waʼomuso dödö ba wongambatö. Na samösa foʼomo ira matua iʼameʼegö tödö ba ifalua zi sökhi khö woʼomonia ira alawe, daʼö zangoromaʼö wa iʼomasiʼö woʼomonia andrö. Simanö göi woʼomo ira alawe, na ituhini ba ihaogö wehedenia khö woʼomonia ira matua daʼö dandra wa ifosumange woʼomonia andrö.

BUA WANUTURU LALA MOROI BA ZURA NIʼAMONIʼÖ: So sambua fongambatö moroi ba Vietnam sotöi Quang hegöi Thi, lawaʼö wa lö irai larasoi waʼomuso dödö ba wongambatöra. Quang, asese ifalua zi lö baga khö woʼomonia. Imane, ”Lö uʼameʼegö tödö hadia nirasoi Thi ba asese uʼafökhöiʼö dödönia.” Andrö ba gafuriata, iʼandrö Thi enaʼö fabali ira. Imane Thi, ”Urasoi wa tebai saʼae ufaduhusi tödö ba ufosumange woʼomogu.”

Ba gafuriata, Quang hegöi Thi lafahaʼö ira ba Zura Niʼamoniʼö, ba lafalua mene-mene niwaʼö ba Efeso 5:33 ba wongambatöra. Imane Quang, ”Ayati daʼa zanolo yaʼo ba wangiʼila wa moguna uforomaʼö waʼasökhi dödö. Uforege enaʼö irasoi Thi wa uʼomasiʼö ba uʼameʼegö tödö nirasoinia hegöi soguna khönia. Me no ufalua daʼö, ufuli urasoi wa iʼomasiʼö ba ifosumange ndraʼo.” Imane Thi, ”Me ufalua mene-mene si so ba Efeso 5:33 ba uforomaʼö wa ufosumange woʼomogu, urasoi wa itugu iʼomasiʼö ba ilumöʼö ndraʼo ba urasoi göi waʼahono dödö.”

 2. Hewisa Gamuatada ba Niha Böʼö

Ato niha zamalua si lö atulö khö nawönia börö me faböʼö madora, soi, sikhala, agama, mazui börö me yaʼira andrö homo hegöi lesbian.

ELUAHANIA: Lö nifahaʼö Zura Niʼamoniʼö ita enaʼö fatuwu ita ba niha si faböʼö mado hegöi soi khöda, mazui fatuwu ita ba ndra matua somasi ba nawönia ira matua mazui ba ndra alawe somasi ba nawönia ira alawe. Hizaʼi, ifarou ita Sura Niʼamoniʼö enaʼö tafosumange fefu niha gofu hadia madonia, soinia, he niha si kayo hegöi niha si numana. (Halöwö Zinenge 10:34) Hewaʼae lö fao dödöda ba nifaduhusira tödö mazui nifalua niha böʼö, moguna enaʼö lö tebulö tafalua zi sökhi khöra ba tafosumange ira.—Mataiʼo 7:12.

BUA WANUTURU LALA MOROI BA ZURA NIʼAMONIʼÖ: Me mböröta, no lafahaʼö Daniel wa niha moroi ba Asia no tobali udu soinia. Daʼö mbörö wa fatuwu sibai ia ba niha Asia si falukha khönia, ba asese iʼailasi ira föna niha sato. Imane Daniel, ”So ba dödögu wa ha soigu zinangea utuhini ba lö irai uʼangeragö hadia fasala wangera-ngera mazui nifaluagu andrö.”

Ba gafuriata, ifahaʼö ia Daniel ba Zura Niʼamoniʼö. Imane, ”Moguna ubulöʼö lala wangera-ngeragu. Fagölö fefu niha ba wamaigi Lowalangi, gofu hezo moroi soira. Ba moguna uʼokhögö lala wangera-ngera simane daʼö.” Itutunö Daniel hadia nirasoinia na falukha ia ba niha si faböʼö soi khönia. Imane, ”Lö uʼangeragö iadaʼa gofu hezo moroi soira. Iadaʼa uʼomasiʼö fefu niha ba usöndra zi fahuwu khögu moroi ba ngawalö soi.”

 3. Kefe

Ato niha zomasi kayo börö me lawaʼö tödöra wa daʼö zangaʼasogö khöra faʼomuso dödö hegöi faʼauri si sökhi.

ELUAHANIA: Sindruhu sa wa moguna khöda gefe. Hizaʼi, tenga daʼö zotatugöi ba wanöndra faʼohahau dödö hegöi faʼauri si sökhi. (Amaedola 18:11; 23:​4, 5) Hizaʼi, na taʼoʼö wanuturu lala moroi khö Lowalangi si so ba Zura Niʼamoniʼö, tola taʼokhögö waʼomuso dödö hegöi faʼahono dödö ba zi so miföna.—1 Timoteo 6:​17-19.

BUA WANUTURU LALA MOROI BA ZURA NIʼAMONIʼÖ: Samösa nono matua sotöi Cardo moroi ba Indonesia samorege ba wolohi faʼakayo. Imane, ”Iadaʼa no uʼokhögö hadia zi tobali ohitö dödö niha sato, yaʼia daʼö tola ulau manörö-nörö, ba uʼöli gama-gama sebua böli, moto hegöi omo.” Hizaʼi, fefu daʼö lö siʼogötöʼö. Imane, ”So niha solimo yaʼo, ba kefe si no uʼowuloi ba zi hauga fakhe taya ba zi ha sabata. Hizaʼi, hatö faʼafatö dödö zalua khögu börö me no taya fefu gokhötagu, ba iadaʼa urasoi wa lö eluaha waʼaurigu andre.”

Ba gafuriata, ibörögö ifalua mene-mene Zura Niʼamoniʼö Cardo sanandrösa ba gefe. Iadaʼa, lö ihorigö saʼae waʼabölönia ba wolohi faʼakayo. Hizaʼi, ihalö gangetula ba woʼöna-önaiʼö faʼaurinia. Imane Cardo, ”Iadaʼa no uʼokhögö wahuwusa si sökhi khö Yehowa. Daʼö harato si lö irai taya. Uʼila mörö ba zi bongi, ba sindruhu-ndruhu usöndra waʼowua-wua dödö.”

 4. Faʼorudu

Faböʼö-böʼö mbua gera-era si fatema ba dödö niha sanandrösa ba waʼorudu.

ELUAHANIA: Itutunö Sura Niʼamoniʼö wa so nola-olania ba wangoromaʼö faʼedöna ba wamalua faʼorudu. Moguna taʼaröuʼö ita ba gamuata fohorö farahu ba daʼö fohoröni donga zodonga, pelacuran, famalua faʼorudu fatua lö mangowalu, homoseks, lesbian hegöi sohoröni urifö. (1 Korindro 6:​9, 10) Famalua faʼorudu no buala moroi khö Lowalangi, ba ha niha si no mangowalu zi tola mamalua daʼö.—Amaedola 5:​18, 19.

BUA WANUTURU LALA MOROI BA ZURA NIʼAMONIʼÖ: Imane si samösa ira alawe moroi ba Australia sotöi Kylie, ”Me lö sangowaludo, uwaʼö tödögu na ufalua waʼorudu, tola urasoi waʼomasi ba faʼahono dödö. Hizaʼi, faböʼö zalua. Lö khögu faʼahono dödö ba hulö zi lö eluaha waʼaurigu.”

Ba gafuriata, ifahaʼö ia Kylie ba Zura Niʼamoniʼö, ba ifalua mene-mene sanandrösa ba waʼorudu. Imane, ”No ufahaʼö ndraʼo wa so goi-goi Lowalangi solumöʼö yaʼita enaʼö lö tarasoi waʼafökhö ba faʼafatö dödö. Iadaʼa no uʼokhögö woʼomo si sökhi irege urasoi waʼahono dödö ba faʼomasi. Börö me no uʼoʼö wanuturu lala moroi ba Zura Niʼamoniʼö, telumöʼö ndraʼo moroi ba ngawalö zi lö sökhi si möi fangabu dödö!”