Satulö ba si Fasala: Sura Niʼamoniʼö—Fanuturu Lala si Tola Muʼodaligö
Lö taʼila tatatugöi wa hasambalö atulö gangetula nihalöda sanandrösa ba gamuata na ha teʼodane-dane daʼö ba niwaʼö dödöda samösa mazui niwaʼö niha böʼö. Ifatunö khöda Sura Niʼamoniʼö hana wa tawaʼö zimanö. Baero daʼö, tola göi itolo ita ba wangiʼila hezo zatulö mazui si fasala, ba na taʼoʼö ia tola tarasoi waʼomuso dödö hegöi faʼahono dödö.
MOGUNA KHÖDA WANUTURU LALA MOROI KHÖ LOWALANGI
Ba Zura Niʼamoniʼö, ifatunö Lowalangi Yehowa a wa moguna ba niha gulidanö wanuturu lala moroi khönia ba tebai latatugöi samösa lala waʼaurira. (Yeremia 10:23) Daʼö mbörö wa ihenaigö ba Zura Niʼamoniʼö wanuturu lala sanandrösa ba gamuata. Iʼomasiʼö sibai niha gulidanö Yehowa ba lö omasi ia na tekiko mazui teʼala waʼaurida börö gangetula si fasala nihalöda. (5 Moze 5:29; 1 Yohane 4:8) Baero daʼö, so göi waʼatua-tua hegöi faʼaboto ba dödö khö Zomböi yaʼita irege ha yaʼia zinangea mameʼe fanuturu lala fondrege zi sökhi khöda. (Sinunö 100:3; 104:24) Hewaʼae simanö, lö irai ifaso niha gulidanö Lowalangi ba woloʼö goi-goinia.
Ibönökhi Yehowa fefu zoguna khö Gadamo hegöi Khawa si tola mangaʼasogö faʼomuso dödö khöra. (1 Moze 1:28, 29; 2:8, 15) Ihenaigö göi wanuturu lala sinangea laʼoʼö. Hizaʼi, itehegö khöra Lowalangi ba wamili samösa hadia laʼoʼö wanuturu lala andrö mazui löʼö. (1 Moze 2:9, 16, 17) Ba gafuriata, Adamo hegöi Khawa abölö laʼoʼö niwaʼö dödöra samösa moroi ba niwaʼö Lowalangi. (1 Moze 3:6) Hadia lua-luania? Hadia larasoi waʼomuso dödö niha gulidanö börö me no laʼoʼö niwaʼö dödöra samösa? Löʼö. Sagötö ba zi hauga ngaotu fakhe, no taʼila samösa wa lö faʼohahau dödö hegöi faʼomuso dödö na tasawö goi-goi Lowalangi.—Sangombakha 8:9.
No tehenaigö wanuturu lala ba Zura Niʼamoniʼö si tola manolo yaʼita ba wangai angetula si tefaudu sanandrösa ba gamuata, gofu hezo toröi ita mazui gofu hewisa lala waʼaurida. (2 Timoteo 3:16, 17; faigi kotak ” Buku Soguna ba Niha Fefu”.) Hadia wanuturu lala nibeʼe Zura Niʼamoniʼö?
Fahaʼö ndraʼugö nasa hadia mbörö wa mufotöi Zura Niʼamoniʼö andrö ”fehede Lowalangi”.—1 Tesalonika 2:13. Faigi video Haniha Bua Gera-eraʼö Zura Niʼamoniʼö Andrö? si so ba jw.org.
ITUTUNÖ KHÖDA SURA NIʼAMONIʼÖ HADIA ZOMASI LOWALANGI TAFALUA
Itutunö Sura Niʼamoniʼö hewisa dödö Lowalangi ba niha gulidanö iʼotarai me föna. Daʼö zanolo yaʼita ba wangiʼila hezo zatulö hegöi si fasala ba wamaigi Lowalangi, ba hezo zangaʼasogö bua si sökhi hegöi si möi famaʼala waʼaurida. (Sinunö 19:7, 11) Na tafahaʼö ita ba daʼö, tola tetolo ita ba wangai angetula si tefaudu ba waʼaurida sero maʼökhö.
Duma-dumania, nehegö mene-mene nisura ba Gamaedola 13:20, ”Niha si fao ba zatua-tua, ba atua-tua ia göi dania, hizaʼi niha si faʼawö ba niha si bodo, ba falukha ia wamunu.” Iʼotarai me föna irugi ba ginötöda andre, lö tebulö waʼatulö niwaʼö ba mene-mene andrö. Oya goi-goi sebua böli ba si möi fanoloda bakha ba Zura Niʼamoniʼö.—Faigi kotak ” Lö Tebulö Moguna Mene-Mene Zura Niʼamoniʼö”.
Hizaʼi te manofu ndraʼugö, ’Hadia sindruhu-ndruhu tola itolo ndraʼo mene-mene Zura Niʼamoniʼö?’ Ba artikel aefa daʼa, itutunö dania duma-duma si no irai alua.
a Yehowa yaʼia daʼö töi Lowalangi.—Sinunö 83:18.
