Na omasiʼö aboto ba dödöu zi samösa niha, moguna öʼila waö-waö waʼaurinia hegöi fanandraigö si no irai alua khönia. Na omasiʼö aboto ba dödöu Lowalangi, moguna göi öʼila hadia manö zi no ifalua. Oya sibai nifalua Lowalangi me götö föna. Wa ifalua daʼö, enaʼö tatema mbua iadaʼa hegöi ba zi so miföna.

Lowalangi Yehowa no Somböi Fondrege Zebua, ba ’tola taʼila hewisa ia sindruhunia moroi ba niwöwöinia’. (Roma 1:20) ”Yaʼia, Samazökhi tanö ba [waʼabölönia hegöi ba] waʼatua-tuania andrö ba samologö banua si yawa ba waʼaboto ba dödönia.” (Yeremia 10:12) Tola göi oroma khöda waʼomasinia moroi ba niwöwöinia sahöli-höli dödöda.

Angeragö atö hewisa waʼatohude niha gulidanö föna Yehowa, ifazökhi ita ”famaedonia”. (1 Moze 1:27) Eluahania, iwöwöi ita enaʼö tola taʼoʼö gamuatania sahöli-höli dödö moloʼö faʼabölöda. No tebeʼe khöda waʼatua-tua ba wamati mazui faʼatua-tua sanandrösa ba lala wangera-ngera Lowalangi hegöi oroisania. Na taforege ba woloʼö daʼö, itugu ohahau dödöda ba moʼeluaha waʼaurida. Sabölö tohudenia, itehegö khöda ba wangokhögö amakhaita si sökhi khönia.

Na tanehegö niwöwöi Lowalangi ba gulidanö andre, tola taʼila hewisa dödö Lowalangi khöda. Itutunö sinenge sotöi Faulo wa Lowalangi andrö ’lö tebulö ia ba wamaduhuʼö sanandrösa khönia ba ifalua zi sökhi yaʼia daʼö ibeʼe khöda deu hegöi baŵa wamasi, ba iʼabusoiʼö ita faoma ö si möi fangomuso dödöda’. (Halöwö Zinenge 14:17) Oya sibai nibeʼe Lowalangi khöda ba lö ahori taʼogunaʼö naʼi. Iʼasogö fefu hadia ia enaʼö tola ohahau dödöda. Hizaʼi, ha duma-duma side-ide daʼö sanandrösa ba gohitö dödö Lowalangi khöda.

Ifazökhi gulidanö andre Yehowa enaʼö toröi ita sagötö faʼara. Imane Sura Niʼamoniʼö, ”Tanö andre, ba no ibeʼe ba nono niha” ba ”tenga tanö si lö niha-niha ifazökhi; enaʼö mowanua yawa  niha, wamazökhinia yaʼia”. (Zinunö 115:16; Yesaya 45:18) Haniha zi toröi ba daʼö ba irugi hawaʼara? ”Satulö tödö zokhö tanö dania, yaʼira zowanua ba danö, si lö mamalö-malö.”​—Zinunö 37:29.

Daʼö mbörö wa ifataro Yehowa niha siföföna sotöi Adamo ba Khawa ba kabu si sökhi si so ba gulidanö ”ba wangehao ba ba wanaro”. (1 Moze 2:8, 15) So dombua halöwö si tohude nibeʼe Lowalangi khöra: ”Miʼoʼono ba miʼoyaʼö ami, mifoʼösi gulidanö ba mibeʼe barö mbawami.” (1 Moze 1:28) Sindruhunia, tola laʼokhögö waʼohahau dödö ba faʼauri si lö aetu ba gulidanö andre ira Adamo ba Khawa. Hizaʼi, lö laʼoʼö li Lowalangi irege tenga sinangea ira tobali niha ’satulö tödö sangokhögö tanö dania’. Hewaʼae simanö, lö si tebulö gohitö dödö Yehowa ba wamobörö sanandrösa ba niha hegöi ba gulidanö. Mututunö daʼö ba duho aefa daʼa. Iadaʼa, datatutunö danö böʼö si no ifalua Lowalangi.

Lafotöi Sura Niʼamoniʼö andrö Taromali Lowalangi. Hana wa ibeʼe khöda Zura Niʼamoniʼö Yehowa? Ohitö dödönia si oföna yaʼia daʼö enaʼö tafahaʼö ita sanandrösa khönia. (Gamaedola 2:1-5) Sindruhu sa wa lö hadöi buku sameʼe fanema li sanandrösa ba ngawalö wanofu soʼamakhaita khö Lowalangi. (Zangombakha 3:11) Hizaʼi, tohude sibai Zura Niʼamoniʼö börö me fefu nösinia tola möi fanoloda ba wangokhögö faʼaboto ba dödö sanandrösa khö Lowalangi. Tola oroma khöda mbua-bua Lowalangi ba nifaluania ba nono mbanuania. Taʼila hewisa niha somasi ia hegöi si fatuwu ia. (Zinunö 15:1-5) Tafahaʼö ita hewisa dödö Lowalangi sanandrösa ba wamosumange, amuata, hegöi okhöta. Oroma göi ba Zura Niʼamoniʼö hewisa mbua-bua Yehowa andrö moroi ba wehede awö nifalua Nononia, Yesu Keriso.​—Yohane 14:9.

Baero daʼö, ibeʼe khöda Daromalinia Yehowa enaʼö ohahau dödöda ba moʼeluaha waʼaurida. Ba Zura Niʼamoniʼö, itutunö khöda Yehowa lala ba wangokhögö faʼohahau dödö yomo ba nomo, hewisa enaʼö tahonogö dödöda ba zi no so, ba tola tataögö waʼaombö-aombö dödö. Simane nitutunöda dania ba majalah daʼa, so wanema li nibeʼe Zura Niʼamoniʼö sanandrösa ba wanofu-nofu andre: Hana wa oya sibai gabula dödö? Hadia zalua dania ba zi so miföna? Itutunö göi Sura Niʼamoniʼö hadia manö zi no ifalua Lowalangi enaʼö ohahau dödö niha ba gulidanö, simane ohitö dödönia ba wamobörö.

So nasa danö böʼö zangoromaʼö hadia mbörö wa tohude sibai Zura Niʼamoniʼö. Faʼara wanura Sura Niʼamoniʼö yaʼia daʼö töra 1.600 fakhe, ba so mato 40 ndra matua sanura yaʼia. Hizaʼi, ha sambua tuho Zura Niʼamoniʼö börö me moroi khö Lowalangi ia. (2 Timoteo 3:16) Tenga simane ngawalö nisura me föna, lö tebulö nösi Zura Niʼamoniʼö ba zi hauga fakhe waʼara. Oroma daʼö ba ngahönö manuskrip kuno Zura Niʼamoniʼö. Lö taya Zura Niʼamoniʼö hewaʼae so zamorege enaʼö lö lafoʼeluaha ia, lö labeʼe ba niha sato, ba lö latehegö mubaso. Ba ginötö andre, ha Sura Niʼamoniʼö zabölö oya mubeʼe ba niha ba sabölö oya mufoʼeluaha. Moroi ba daʼa taʼila wa ”si lö tebulö daromali Lowalangida andrö, irugi zi lö aetu”.​—Yesaya 40:8.

So nasa nifalua Lowalangi khöda. Simane si no mututunö mege, lö foloʼö khö Gadamo. Lua-luania, aekhu ia ba horö irege tebai auri ia hegöi ngaʼötönia sagötö faʼara. Hewaʼae simanö, no ifaduhuʼö Lowalangi wa tola auri niha ba gulidanö sagötö faʼara simane ohitö dödönia ba wamobörö. ”Böröta horö andrö, ha samösa niha zamobörö ba faʼamate andrö börö horö, andrö wa ikhamö fefu niha faʼamate börö me no dozi samazökhi horö ira.” (Roma 5:12) Hulö lö aʼozu gohitö dödö Lowalangi börö me lö moloʼö Gadamo. Hizaʼi, hadia nifalua Yehowa?

Hasambalö tefaudu nifalua Yehowa andrö ba mbua-buania. Ifalua waʼatulö Yehowa me ifatörö hukuma khö Gadamo ba Khawa ba zala nifaluara. Hizaʼi, börö me so khö Lowalangi waʼomasi, ibeʼe  wanötöna ba ngaʼötöra. Si fao faʼatua-tua, itatugöi Yehowa enaʼö tola teʼasiwai zalua andrö ba iʼanemaiʼö iʼombakhaʼö gangetulania. (1 Moze 3:15) Ibokai khöda lala enaʼö teʼefaʼö ita moroi ba horö ba faʼamate yaʼia me iʼogunaʼö Nononia, Yesu Keriso. Hewisa wamaluania daʼö?

Enaʼö teʼefaʼö niha gulidanö moroi ba lua-lua nitemara börö wamadaö nifalua Gadamo, ifatenge Yesu ba gulidanö andre Yehowa ba wanuturu lala saekhu ba waʼauri hegöi ba ’wameʼe nosonia höli zato’. * (Mataiʼo 20:28; Yohane 14:6) Tola tobali höli Yesu börö me niha soʼahonoa ia simane Adamo. Hizaʼi, tenga simane Adamo, lö faröi Yesu ba woloʼö khö Lowalangi irugi ba waʼamatenia. Sindruhunia, tenga sinangea mate Yesu, andrö wa isusugi ia Yehowa enaʼö tola ifuli auri ia ba zorugo. No ibeʼe wanötöna Yesu ba niha gulidanö enaʼö laʼokhögö waʼauri si lö aetu, si lö aʼozu ifalua Adamo. ”Hulö simane ba walömoloʼö niha si ha samösa andrö no möi börö wa dozi niha mamalua horö, ba börö woloʼö zi samösa andrö no möi börö wangatulö niha sato khö Lowalangi.” (Roma 5:19) Iʼogunaʼö höli nibeʼe Yesu andrö Lowalangi ba wamaduhuʼö khöda wa hasambalö alua zi no ifabuʼu, irege tola taʼokhögö waʼauri si lö aetu ba gulidanö.

Oya sibai zi no ifalua Yehowa ba wangasiwai abula dödö salua börö walömoloʼö Gadamo. Oya wamahaʼö nihalöda sanandrösa khö Yehowa moroi ba zalua andrö. Duma-dumania, taʼila wa lö hadöi si tola manaisi ohitö dödö Yehowa, ba fefu niwaʼönia hasambalö ”mofozu”. (Yesaya 55:11) Aboto ba dödöda wa iʼomasiʼö sibai ita Yehowa. ”Daʼa lala Lowalangi ba wangoromaʼö faʼomasinia khöda: Ifatenge Nononia si ha sambua ba gulidanö enaʼö tasöndra waʼauri ba döinia. Ifatenge Nononia Lowalangi tobali sumange fangatulö ba horöda, tenga börö me no taʼomasiʼö ia hizaʼi börö me no iʼomasiʼö ita.”​—1 Yohane 4:9, 10.

Lowalangi andrö ”lö alimagö khönia Nononia hewaʼae tefakao ba ibeʼe salahida”. Andrö, tola faduhu dödöda wa si fao ”faʼasökhi dödö . . . iʼamualagö khöda danö böʼö” si no ifabuʼu. (Roma 8:32) Hadia manö nifabuʼu Lowalangi khöda? Mututunö daʼö ba duho aefa daʼa.