Na omasi ita taʼila haniha zi samösa niha, si oföna tasofu yaʼia daʼö ”Haniha döimö?” Na tabeʼe wanofu daʼö khö Lowalangi, hadia niwaʼönia?

”Yaʼo Yehowa, daʼö döigu.”​—Yesaya 42:8.

Moguna khö Lowalangi döinia. Lö hadöi niha sameʼe töi Lowalangi, yaʼia samösa zamili töinia. Imane Yehowa, ”Daʼö döigu, irugi zi lö aetu, daʼö wamotöi yaʼodo götö-götö waʼara.” (2 Moze 3:15) Ba Zura Niʼamoniʼö abölö oya tesöndra döi Lowalangi moroi ba döinia ba faka simane Fondrege Zabölö, Ama, Soʼaya mazui Lowalangi. Abölö oya göi tesöndra ia moroi ba döi niha simane Aberahamo, Moze, Dawido mazui Yesu. Ba daʼö oroma wa omasi Yehowa ifatunö döinia khöda. Imane Sura Niʼamoniʼö, ”Ba akha aboto ba dödöra wa no ha yaʼugö zotöi Yehowa, wa ha yaʼugö Wondrege Zalawa ba gulidanö maʼasagörö.”​—Zinunö 83:19.

Moguna döi andrö khö Yesu. Simane si so ba Wangandrö Zoʼaya, ifahaʼö ndra soloʼö khönia Yesu enaʼö lamane wangandrö khö Lowalangi, ”Yateʼamoniʼö döimö.” (Mataiʼo 6:9) Mangandrö göi Yesu khö Lowalangi, ”He Ama, folakhömi döimö.” (Yohane 12:28) Iʼofönaiʼö Yesu ba wamolakhömi töi Lowalangi ba waʼaurinia. Daʼö mbörö wa tola imane ba wangandrönia, ”No uʼombakhaʼö khöra döimö, ba utohugö nasa wangombakha.”​—Yohane 17:26.

Moguna döi daʼö ba niha sangokhögö faʼaboto ba dödö sanandrösa khö Lowalangi. Ono mbanua Lowalangi me götö föna, aboto ba dödöra wa folumöʼö hegöi fangefa nitemara, moʼamakhaita daʼö ba döi Lowalangi. ”Hati saro döi Yehowa andrö, ba daʼö isawa satulö tödö, ba tebai lakhamö ia.” (Gamaedola 18:10) ’Dozi soʼangaröfili töi Yehowa, ba niʼorifi.’ (Yoeli 3:5) Iforomaʼö Sura Niʼamoniʼö wa töi Lowalangi, daʼö zamaböʼöni niha samosumange  yaʼia. ”Ba niha böʼö fefu, ba no töi Lowalangira khöra, ba wanörö lalara, ba khöda, ba no töi Lowalangida Yehowa, ba wanöröda lalada, götö-götö waʼara!”​—Mikha 4:5; Halöwö Zinenge 15:14.

Töi daʼö zangoromaʼö haniha Lowalangi. Ato zagatua-tua sangumaʼö eluaha döi Yehowa, ”Yaʼia Mbörö Wa Alua”. Ifatunö Lowalangi Yehowa geluaha döinia me iforomaʼö ia khö Moze ba me imane, ”Yaʼo-yaʼodo manö ndraʼodo andre.” (2 Moze 3:14) Eluaha ngawua wehede daʼa ba li Heberaiʼo yaʼia daʼö ”Ubaliʼö Ndraʼo Gofu Hadia Manö Zomasido.” Moroi ba döinia taʼila wa Lowalangi andre tenga ha Somböi ngawalö hadia ia, hizaʼi so khönia waʼabölö ba wangogunaʼö omböila dangania ba wamalua ohitö dödönia. Hewaʼae oya gamalalata döi Lowalangi sangoromaʼö dadaoma, kuaso mazui faʼabölönia, hizaʼi ha Yehowa döinia sindruhu. Töi daʼö zangoromaʼö fefu sanandrösa khönia ba tola ibaliʼö ia gofu hadia manö zomasi ia.

Töi daʼö zangoromaʼö wa iʼameʼegö tödö ita Lowalangi. Eluaha döi Lowalangi zangoromaʼö wa lö tebulö iʼameʼegö tödö niwöwöinia, tefarahu göi ita ba daʼö. Baero daʼö, börö me no ifatunö khöda döinia, ba daʼö oroma wa omasi Lowalangi taʼokhögö waʼaboto ba dödö sanandrösa khönia. Iʼotarai ba wamobörö no iʼofönaiʼö ifatunö döinia fatua lö tasofu. Ba daʼa taʼila wa omasi Lowalangi na tarasoi wa sindruhu-ndruhu so ia ba tola ahatö ita khönia. Yaʼia andrö tenga ha lumö-lumö ba lö fandröndröu sibai ia moroi khöda.​—Zinunö 73:28.

Na taʼogunaʼö döi Lowalangi, daʼö zangoromaʼö wa adöni dödöda khönia. Duma-dumania, öʼandrö ba niha sedöna fahuwu khöu enaʼö ikaoni ndraʼugö ba döi nibeʼeu. Hewisa dödömö na lö iʼogunaʼö döi si no öwaʼö andrö? Te so khöu waʼaombö-aombö dödö, hadia sindruhu-ndruhu omasi ia ahatö khöu. Simane daʼö göi Lowalangi. No ifatunö khöda Yehowa haniha döinia ba ifarou ita enaʼö taʼogunaʼö döinia andrö. Na taʼoʼö daʼö, no taforomaʼö khö Yehowa wa omasi ita ahatö khönia. Itöngöni niha ”samosumange töinia”!​—Maleakhi 3:16.

Lala si oföna sinangea tafalua enaʼö aboto ba dödöda Lowalangi yaʼia daʼö tafahaʼö ita sanandrösa ba döinia. Hizaʼi, tenga ha ndrege daʼö. Moguna taʼila haniha ia zindruhunia moroi ba döinia andrö. Datafahaʼö ita sanandrösa ba gamuatania.