SO AGAMA ba zi sagörö ulidanö, simane Gereja Katolik Roma, ngawalö gereja Ortodoks, Buddha, ba tanö böʼönia, lö zi lö tola lö lafalua waʼauri selibat ira sondröniaʼö hegöi ndra klerusnia. Börö daʼö, ato göi zangumaʼö wa daʼö mbörö wa itugu tedou zamalua horö, nifalua ndra sondröniaʼö ba ngawalö agama.

Tobali, lö fasala na so zanofu: Hadia no mutatugöi selibat khö genoni niha Keriso? Enaʼö muʼila fanema linia, datafaigi mbörötania ba faʼatedounia ba hewisa wamaigi Lowalangi.

Moloʼö Encyclopædia Britannica selibat yaʼia daʼö ”falömangowalu ba lö ifalua waʼorudu ba ndra alawe mazui ba ndra matua. Toʼölö mufakhai daʼa ba niha si so dadaoma ba agama mazui si faböbö ba agama”. Ba huhuo sebua Paus Benediktus XVI khö Majelis Agung Roma me 2006, ifakhai huhuonia wa lö zi tola lö lafalua selibat simane ”si toʼölö lafalua niha fatua götö ndra Sinenge”.

Hizaʼi, lö lafalua waʼauri selibat ira niha Keriso ba abad siföföna. Ifangelama ira sinenge sotöi Faulo, sauri ba ginötö abad siföföna, sanandrösa ba niha-niha sameʼe fehede geheha samaelungu hegöi sanenawa fangowalu.​—I Timoteo 4:1-3.

Awena ba götö abad si dua, ibörötaigö so faʼauri selibat ba gereja-gereja ”niha Keriso” ba soi tanö ba Gaekhula. Moloʼö buku Celibacy and Religious Traditions, ”tefaudu daʼa ba zawena tefalua si so ba Kekaisaran Romawi enaʼö lataha dödöra ba wamalua faʼorudu”.

Mato hauga abad aefa daʼö, dewan gereja ba tefotöi göi ira Bapak-Bapak Gereja lafarou dödö ndra sondrönia ba agama ba wamalua faʼauri selibat.  Moloʼö yaʼira, wamalua faʼorudu no sambua faraʼiö ba lö tefaudu ia ba halöwö zondröniaʼö ba agama. Hewaʼae simanö, moloʼö Encyclopædia Britannica wa ”ato pastor ba so göi ösa uskup si so donga me irugi abad si-10”.

Ba Konsili Lateran nifalua ba Roma me 1123 ba 1139, lö zi lö tola lö lafalua waʼauri selibat. Ba irugi iadaʼa lö manö si tebulö lafalua daʼö Gereja Katolik Roma. Tobali, lö taya waʼabölö gereja hegöi fangaluira, börö na mangowalu samösa pastor hasambalö ibeʼe fefu khö nononia gokhöta niʼokhögönia moroi ba gereja.

Tola muʼila hewisa wamaigi Lowalangi selibat andrö ba Daromalinia, Sura Niʼamoniʼö. Natabaso wehede Yesu sanandrösa ba niha si lö mangowalu ”börö Mbanua zorugo andrö” simane yaʼia. (Mataiʼo 19:12) Itutunö göi Faulo simane daʼö sanandrösa ba niha Keriso somasi mangai angetula wa lö mangowalu simane yaʼia, ”börö duria somuso dödö andrö”.​—I Korindro 7:37, 38; 9:23.

Hizaʼi, lö irai ibeʼe goroisa Yesu hegöi Faulo khö ndra enoni ba wamalua faʼauri selibat. Itutunö Yesu wa no sambua buala na lö mangowalu börö lö fefu zoloʼö khönia tola lafalua zimanö. Me isura Faulo sanandrösa ba niha si lö irai mangowalu, imane wangumaʼö, ”Ba lö khögu oroisa Zoʼaya, ba era-eragu manö uʼombakhaʼö.”​—Mataiʼo 19:11; I Korindro 7:25.

Baero daʼö, oya göi itutunö Sura Niʼamoniʼö wa ato göi genoni niha Keriso sangowalu me abad siföföna, simane sinenge sotöi Fetero. (Mataiʼo 8:14; Mareko 1:29-31; I Korindro 9:5) Sindruhunia, börö me oya zamalua horö ba Roma me luo daʼö, andrö wa isura Faulo wa satua ba mbanua niha Keriso si no mangowalu enaʼö ”böi samodombua donga” ba ”si so ono soloʼö”.​—I Timoteo 3:2, 4. 

Tenga fangowalu si lö mamalua faʼorudu daʼa, börö me no iwaʼö Sura Niʼamoniʼö wa ”yamutörö gömönia [lö tola lö] ba ndra alawe ira matua” ba yaʼira si no mangowalu ”böi mifabali ami khö nawömi” yaʼia daʼö sanandrösa ba waʼorudu. (I Korindro 7:3-5) Tobali, sindruhu-ndruhu lö nitatugöi Lowalangi ba genoni niha Keriso enaʼö lafalua waʼauri selibat.

Na lö nitatugöi waʼauri selibat, hadia mbörö wa isuno Yesu hegöi Faulo walömangowalu andrö? Börö me oya ginötö si tola laʼogunaʼö niha si lö mangowalu ba wamaʼema turia somuso dödö. Lö hadöi si tobali daha-tahara börö me lö moguna laʼera-era simane si toʼölö laʼaombösi tödö niha si no mangowalu.​—I Korindro 7:32-35.

Nehegö duma-duma David. Ihalö gangetula ba wobato wohalöwö moroi ba halöwönia sebua gazi ba Mexico City. Aefa daʼö, findra ia ba mbanua side-ide si so ba Kosta Rika ba wamahaʼö Sura Niʼamoniʼö ba niha. Hadia aoha khö David wamalua daʼö börö me lö sangowalu ia? Imane wangumaʼö, ”Tatu manö. Hewaʼae abua sa ba wofaudugö ba zi toʼölö lafalua niha hegöi lala waʼauri si faböʼö, hizaʼi börö me ha yaʼo samösa niʼonorogögu tödö, itugu aoha khögu wamaudugö daʼö fefu.”

Samösa niha Keriso si lö mangowalu sotöi Claudia, findra ia ba nahia-nahia sabölö oya moguna sanuriaigö. Imane wangumaʼö, ”Owua-wua dödögu ba wamalua halöwögu khö Lowalangi. Itugu aro wamatigu hegöi fahuwusagu khö Lowalangi börö me aboto ba dödögu wa iʼameʼegö tödö ndraʼo.”

Lö moguna tobali noro dödö na lö mangowalu. Imane Claudia, ”Hewaʼae mangowalu ndraʼugö mazui löʼö, tola owua-wua dödöu na öbeʼe zabölö sökhi khö Lowalangi Yehowa.”​—Zinunö 119:1, 2.