HULÖ si toʼölö manö na mufaigi foe-foe fese si hulö dundraha si so ba danga Jordan. Hizaʼi, daʼa harato fondrege zebua böli ba dödönia. Itutunö Jordan, ”Si fahuwu ba nösi nomoma Russell, si no numalö döfi, ba ibeʼe daʼö khögu me iraono ndraʼo nasa.” Me no aefa mate Russell aboto ba dödö Jordan wa oya zi no ifalua Russell ba waʼauri duania hegöi khö zatuania, itolo ira ba ginötö si basaki. Imane nasa Jordan, ”No oya niʼilagu sanandrösa khö Russell iadaʼa. Itugu uʼameʼegö tödö mbuala andrö moroi na ba zilalö.”

Moroi ba duma-duma Jordan, tola manö ba wamaigi niha ösa no ide-ide mböli zi sambua mbuala mazui lö ba dödöra. Moguna muʼameʼegö tödö zamualagö hewaʼae na ide-ide mböli mbuala andrö. Itutunö Sura Niʼamoniʼö mbuala fondrege zebua böli, taʼila ia moroi ba ngawua wehede si no tehöngö sangumaʼö, ”Simanö sa waʼomasi Lowalangi nösi gulidanö, no ibeʼe Nononia andrö si ha sambua, enaʼö lö tekiko dozi samati khönia, enaʼö so khöra waʼauri si lö aetu.”​—Yohane 3:16.

So sambua mbuala si tola molua-lua ba waʼauri si lö aetu! Hadia fefu mbuala tola ebua gunania? Hewaʼae so ösa niha si lö moʼameʼegö tödö mbuala andrö, hizaʼi laʼameʼegö tödö sibai daʼö ira niha Keriso sindruhu börö me no ”sebua böli”. (Zinunö 49:9; I Fetero 1:18, 19) Tobali hadia mbörö wa iʼamualagö Lowalangi waʼauri Nononia andrö ba gulidanö?

Ifatunö sinenge sotöi Faulo hadia mbörönia, ”Andrö, simane böröta horö andrö ba gulidanö, wa no ha samösa niha zamobörö, awö lua-lua horö andrö, faʼamate, awö wa no ikhamö niha fefu faʼamate andrö.” (Roma 5:12) Iʼodödögö niha siföföna sotöi Adamo wa lö moloʼö khö Lowalangi, ba tefakao ia ba lua-luania mate. Börö Gadamo wa tola mate fefu ngaʼötönia.

 ”Luo horö sa, ba faʼamate, ba buala faʼebua dödö Lowalangi andrö, ba no faʼauri si lö aetu ba khö Keriso Yesu, Soʼaya yaʼita.” (Roma 6:23) Enaʼö teʼefaʼö niha moroi ba wanguhuku faʼamate, ifatenge Nononia Lowalangi yaʼia daʼö Yesu Keriso ba gulidanö ba wameʼe faʼaurinia soʼahonoa. Börö nibeʼenia andrö yaʼia daʼö ”höli” wa tola laʼokhögö waʼauri si lö aetu dozi niha samati khö Yesu.​—Roma 3:24.

Iʼodela Yesu Keriso Lowalangi ba wameʼe howu-howu ba nono mbanuania, imane Faulo, ”Ba nisuno Lowalangi, ba mbualania andrö, si tebai tawaʼö faʼebua.” (II Korindro 9:15) Höli andrö no buala fondrege zebua irege tebai tafoʼamaedolagö ia. Hizaʼi, moroi ba ngawalö mbuala Lowalangi ba niha gulidanö, hadia mbörö wa no fondrege zi tohude höli andrö? Hadia mbörö wa faehu ia moroi ba mbuala Lowalangi tanö böʼö? * Ba hewisa zinangeania ita ba wotemaʼö daʼö? Makaoni ndraʼugö ba wombaso fanema li Zura Niʼamoniʼö moroi ba wanofu-nofu ba zi dombua artikel aefa daʼa.