So ösa mbuala sebua böli ba dödöda börö me motöi niha samualagö yaʼia mazui niha nifosumangeda. Buala tanö böʼönia hewaʼae no ide-ide mbölinia, hizaʼi muʼameʼegö tödö sibai börö me samualagö yaʼia ösi nomoda mazui awöda nifaduhusida tödö. Hulö simane daʼö mbuala nibeʼe Russell khö Jordan nitutunö ba artikel si öföna. Hewisa göi mbuala sanandrösa ba höli?

Si oföna, imane Sura Niʼamoniʼö, ”Ifatenge ba gulidanö Nononia Lowalangi, ononia si ha sambua andrö, enaʼö auri ita balazi ia.” (I Yohane 4:9) Sindruhu-ndruhu daʼa mbuala fondrege zebua. Lö hadöi zabölö baero Lowalangi. Sanandrösa khönia, imane samösa niha Heberaiʼo samaʼanö sinunö, ”Yaʼugö zotöi Yehowa, wa ha yaʼugö Wondrege Zalawa ba gulidanö maʼasagörö.” (Zinunö 83:19) Tenga sinangea tatema mbuala andrö moroi khö gumbu salawa.

Si dua, Lowalangi andrö ba no ’Amada’. (Yesaya 63:16) Hewisa wa tola? Ibeʼe khöda waʼauri. Baero daʼö, lö göi faröi ia khöda ba woʼameʼegö tödö yaʼita hulö zimane ama soʼamegö tödö iraononia. Sanandrösa ba niha Geferai, imane Lowalangi, ”Hadia ono omasiö saʼae khögu mado Geferai, ono börö waʼomuso dödö . . . Andrö humulu-hulu bakha dödögu khönia—tebai lö uhakhösi tödö ia!” (Yeremia 31:20) Simanö göi dödö Lowalangi khö nono mbanuania iadaʼa. Tenga ha fondrege zalawa ba Somböi ia khöda, hizaʼi Ama si lö faröi göi ia  ba Awöda. Hadia tenga no buala fondrege zebua daʼö?

So ösa mbuala sebua böli mubeʼe ia tenga börö me no sinangea, hizaʼi börö waʼomasi soroi ba dödö. Ba lö idöna-döna zulö samuala moroi ba zi sökhi si no ilau.

Ibeʼe Nononia omasiö Lowalangi börö waʼomasinia khöda. Imane Sura Niʼamoniʼö, ”Ba daʼö no oroma waʼomasi Lowalangi andrö, ba khöda, me no ifatenge ba gulidanö Nononia Lowalangi, Ononia si ha sambua andrö.” Hadia gunania? ”Enaʼö auri ita balazi ia.” (I Yohane 4:9) Hadia sinangea ifalua daʼö Lowalangi? Tatu manö löʼö! ’Fangöhöli andrö, ba khö Yesu Keriso’ no sambua lala ba wangoromaʼö ’faʼebua dödö’ Lowalangi.​—Roma 3:24.

Hadia mbörö wa no ’faʼebua dödö’ Lowalangi mbuala andrö? Imane Sura Niʼamoniʼö, ”Ba iʼoromaʼö waʼomasinia ita Lowalangi, me no mate salahida Keriso, me samazökhi horö ita na.” (Roma 5:8) Faʼomasi si lö mangalui tana khönia zamarou tödö Lowalangi ba wanolo faʼatebai niha, si lö fanötöna, safönu horö. Faʼomasi daʼö tenga sinangea tatema, mendrua manö ba wanulönida khönia. Mbualania no fondrege zebua ba wangoromaʼö faʼomasi si no irai alua.

So ösa mbuala niʼameʼegö tödö sibai börö me ebua zi no ifalua niha samuala. Ba ginötö itehegö zi samösa niha gomasiönia sebua böli ba ibeʼe khöda, tatu wa taʼameʼegö tödö sibai daʼö börö zi no ifalua.

”Ibeʼe Nononia andrö si ha sambua” Lowalangi. (Yohane 3:16) Tenga ha ibeʼe gomasiönia. Ngahönö fakhe faʼara me ifazökhi mbanua si yawa awö danö Lowalangi, falulu fohalöwö khönia Yesu ba tobali ia niha niʼomasiʼö. (Gamedola 8:30) Yesu andrö ba no ’Ono waʼomasi’ khö Lowalangi ba ”famaedo Lowalangi si lö oroma”. (Kolese 1:13-15) Lö irai so gamakhaita fondrege zaro baero niʼokhögöra.

Hizaʼi ’lö alimagö khö Lowalangi Nononia’. (Roma 8:32) Ibeʼe khöda Yehowa wondrege zi sökhi. Lö buala sabölö sökhi moroi andrö.

So ösa mbuala niʼameʼegö tödö sibai börö me tefaudu moguna sibai ia. Duma-dumania, so niha sanolo yaʼugö ba wamuʼa mböli dalu-dalumö me toröiʼö ba rumah sakit me inötö mofökhöʼö börö me lö faʼabölöu ba wamuʼa yaʼia! Hadia tenga sebua böli mbuala andrö?

”Simane ba khö Gadamo sa, wa ahori mate ira ba daʼö, simanö göi ba khö Keriso, ahori teʼorifi ira dania.” (I Korindro 15:22) Börö me ngaʼötö Gadamo ita, daʼö mbörö wa ”mate” ita fefu ba hasambalö göna ita fökhö ba faʼamate mazui tebai atulö ita föna Lowalangi hegöi sebua olalöwa ita fönania. Ba me no niha sebua horö ita, tebai tatolo ita samösa mazui niha böʼö enaʼö ”teʼorifi”. Imane Sura Niʼamoniʼö, ”Lö sangila mangöhöli talifusönia, lö sangila mameʼe höli khö Lowalangi . . . Irugi zi lö aetu.” (Zinunö 49:8, 9) Moguna sibai khöda wanolo börö me tebai tabuʼa mböli höli andrö. Lö faʼabölöda na lö sanolo.

Börö waʼebua waʼomasi Yehowa, daʼö mbörö wa ’ibuʼa mböli dalu-dalu’ soguna khöda, eluahania börö Yesu wa ”ahori teʼorifi”. Hana wa tola ifalua daʼa höli? ”Ihaogö ita do Nononia Yesu, iheta horöda fefu.” Mamati ba do Yesu zamokai  khöda bawandruhö ba wanöndra faʼauri si lö aetu ba teʼefaʼö horöda. (I Yohane 1:7; 5:13) Ba hadia nifalua höli ba niha niʼomasiʼöda si no mate? ”Moroi ba niha sa waʼamate andrö, ba moroi ba niha [Yesu] göi wemaoso zi mate andrö.”​—I Korindro 15:21. *

Lö buala sabölö ebua baero niʼamualagö gumbu salawa mazui ifalua börö waʼomasi sebua simane höli Yesu. Lö irai so zamualagö khöda simane niʼamualagö Lowalangi Yehowa khöda. Ba lö hadöi buala sabölö moguna baero zi no ifalua khöda ba wangeheta yaʼita moroi ba horö ba faʼamate. Sindruhu lö hadöi buala fondrege zebua baero höli.