”TOLA mofanö bus, ba tebai mofanö niha Cina daʼa!” Daʼö nirongo Alexandra me modadao ia ba bus sombalo-baloi ba wanörö ola zi dombua soi ba Amerika Selatan. Möi tou Alexandra ba ifaigi hadia zalua. So samösa ndra matua niha Cina sawuyu-wuyu, sangogunaʼö li Spanyol si no ambö-ambö ba wotutunö salua khönia khö zozago ola. Tola fahuhuo Alexandra ba li Cina börö me farahu ia ba mbanua niha Keriso Zamaduhuʼö Yehowa sangogunaʼö li Cina. Tobali, itolo ifoʼeluaha nitutunö ndra matua andrö.

Ifatunö ira matua andrö wa ono mbanua daʼö ia. Hizaʼi, no larabu sura-sura hegöi kefenia. Ba wamobörö ua lö faduhu dödö zozago khönia, ba iböbögö khö Alexandra wa no farahu ia ba wamawa niha. Ba gafuriatania faduhu dödö zozago andrö. Hizaʼi, moguna ibeʼe gefe ira matua andrö börö me lahuku ia me lö hadöi sura-surania. Börö me lö hadöi kefenia, andrö wa ifafizaʼö khönia gefe Alexandra faʼebuania 20 dolar AS (ambö töra 270.000 rupiah). Iʼandrö sibai saohagölö ira matua andrö khö Alexandra ba ifabuʼu wa hasambalö itöraigö wameʼe moroi ba zi 20 dolar AS ba ginötö igati. Ifatunö Alexandra wa lö idöna-döna zulö; omuso dödönia ba wanolo börö me no sinangea daʼö. Ibeʼe khö ndra matua andrö mato hauga ngawua mbuku sanandrösa ba Zura Niʼamoniʼö ba ifarou enaʼö ifahaʼö ia ba Zura Niʼamoniʼö khö ndra Samaduhuʼö Yehowa.

No sambua faʼomuso dödö na so zoböwö ba niha si lö faʼila. Niha si so agama hegöi si löʼö, lafalua zi sökhi khö nawöra. Hadia omasi göi ndraʼugö ba wanolo niha soroi ba dödö? Moguna taʼangeraigö wanofu andrö börö me imane Yesu, ”Ohahau dödö ba wameʼe, moroi ba wanema.” (Halöwö Zinenge 20:35) Tefaudu göi daʼa ba ilmiah börö me moloʼö ndra peneliti tola so gunania khöu samösa na mameʼe. Datatutunö hadia manö gunania.

Moroi ba zi no alua, asese moʼamakhaita ira waʼowua-wua dödö hegöi mameʼe. Imane sinenge sotöi Faulo, ’Si no aoha gölö ba wameʼe, daʼö sa zomasi Lowalangi.’ Eluahania yaʼia daʼö niha Keriso somasi ba wameʼe enaʼö soroi ba dödö ba wanolo ira talifusö si so faʼambö-ambö. (II Korindro 8:4; 9:7) Lö iwaʼö Faulo wa mameʼe ira ba niha börö me owua-wua dödöra. Hizaʼi, owua-wua dödöra börö me tola mameʼe ba niha.

Sindruhu sa, moloʼö sambua penelitian wa na mameʼe ”tola ifuli mohalöwö bagian-bagian guto zi samösa-mösa niha sanandrösa ba waʼohahau dödö, amakhaita ba niha, hegöi nifaduhusi tödö, iʼasogö waʼomuso dödö”. Moloʼö penelitian tanö böʼö göi wa ”abölö sökhi na tabeʼe gefe ba niha böʼö moroi na taʼogunaʼö samösa”.

Hadia no irai tumbu ba dödöu wa tebai oya öfalua hadia ia börö me lö khöu? Sindruhunia, tola larasoi waʼowua-wua dödö fefu niha na ’si no aoha gölö ba wameʼe’ ira. Tenga dali oya nibeʼe, hizaʼi moguna atulö gohitö  dödönia ba wamalua daʼö. So samösa Zamaduhuʼö Yehowa sameʼe dolo-tolo khö zamazökhi majalah andre si fao sura. Imane wangumaʼö, ”No hauga fakhe, ba ha maʼifu zi tola ubeʼe gefe ba Balai Mbanua Lowalangi.” Itohugö nasa, ”Ba no oya sibai zulö nibeʼe Yehowa moroi ba zi no ubeʼe. . . . Saohagölö me no mitehegö khögu wameʼe dolo-tolo. Terara sibai dödögu.”

Tatu manö, tenga dali gefe na mameʼe ba niha. Tola göi mubeʼe danö böʼö.

Imane Sura Niʼamoniʼö, ”Ba niha sebua tödö, ba khönia zi sökhi nisöndrania; ba safaito, ba ifakao nösinia.” (Gamaedola 11:17) Niha si sökhi tödö omasi manolo. Itehegö ibeʼe ginötö, faʼabölö, foʼameʼegö tödö ba tanö böʼönia. Tola oya itema mbua, ba si föföna sibai yaʼia daʼö tola möi faʼasökhi ba mbotonia.

Penelitian zangoromaʼö wa niha sasese manolo niha böʼö ambö asese mofökhö ba ambö stres. Si toʼölönia ambö mofökhö ira. Niha si so fökhö si tebai döhö, simane sklerosis multipel mazui HIV, tola itugu alö wökhöra na asese lalau mameʼe ba niha. Omasi manolo niha böʼö göi tola sökhi lua-luania ba zi sandru ba alkohol sarakhagö mamöhöli. Tola iʼalösi stres hegöi faʼamangandrauli dödö ba wemabu.

So göi zangumaʼö wa daʼö mbörönia yaʼia daʼö ”faʼahakhö dödö, faʼoböwö, ba faʼasökhi dödö zi tola mangalösi tödö si lö baga”. Faʼomasi ba wamuala göi tola iʼalösi stres hegöi faʼamanöi ndro. Tola göi alio taya dandra-tandra stres zi samösa niha börö no mate niha niʼomasiʼöra na latolo niha böʼö.

Sindruhu wa sökhi ba khöu na mameʼe.

Ifarou ndra nifahaʼönia Yesu, ”Mibeʼe, ba tebeʼe khömi; suʼa-suʼa nifozuzu, nisösö, nihöndrögö, si falawu, lafaduwa ba gahetami; suʼa-suʼa sa niʼanuʼaʼömi, laʼanuʼaʼö zui khömi dania.” (Luka 6:38) Ba ginötö mameʼe ndraʼugö ba niha, tola manö mangandrö saohagölö ira ba terou göi dödöra ba wameʼe. Tobali, mameʼe ba niha tola möi famobörö falulu fohalöwö hegöi fahuwusa.

Lamane ira peneliti samahaʼö ba gamakhaita niha wa ”niha si lö irai moʼangeraigö yaʼia samösa manö tola tobali famarou ba niha böʼö ba wamalua daʼö”. Sindruhunia, ”ha ba wombaso sanandrösa ba waʼasökhi dödö sahöli-höli dödö, tola ibeʼe itugu oböwö niha”. Tobali, moloʼö sambua penelitian, ”hadia nifalua zi samösa-mösa niha ba gotalua niha sato tola molua-lua ba niha si ngafulu mazui si ngaotu faʼato, moroi ba gotalua daʼö so ösa si lö irai ifalukhaisi mazui lö irai iʼila”. Mazui tola mumane wangumaʼö, famalua faʼoböwö hewaʼae ha sakali tola fatöfa ba niha böʼö ba zi sambua orudua niha sato. Hadia omasiʼö toröi ba nahia simane daʼö? Tatu manö, börö me tola oya ötema mbua na itugu ato niha somasi mamuala.

So sambua zi no irai alua ba Florida, AS, zangoromaʼö bua si sökhi moroi ba wameʼe andre. So sambua ngawawa Zamaduhuʼö  Yehowa sameʼe fanolo ba niha si göna bade sebua ba daʼö. Me labalo-baloi waʼatohare zoguna ba wangehaogö zi sambua omo, laʼila wa so sambua göli nomo zi faola si no tekiko. Ba laʼoroʼö wanolo khö zi faola omo andrö ba wangehaogö. Lö ara aefa daʼö, imane si faola andrö ba zura nibeʼenia ba gödo sebua ndra Samaduhuʼö Yehowa, ”Uʼandrö sibai saohagölö. No usöndra niha si sökhi amuata sagötö falukhado ba niha.” Fangandrönia saohagölö zamarou yaʼia ba wamaʼoheʼö dolo-tolo sebua ba ifotöi nifalua ndra Samaduhuʼö Yehowa halöwö sahöli-höli dödö.

Fondrege zahöli-höli dödö nisöndra ndra ilmuwan yaʼia daʼö ”sindruhunia no so ba dödö niha ba wanolo niha böʼö”. Moloʼö penelitian daʼö, ”no laforomaʼö waʼasökhi dödö iraono fatua lö lafomaha ira mohede”. Hadia mbörö? Ibeʼe wanema li Sura Niʼamoniʼö wa muwöwöi niha ”famaedo Lowalangi”, eluahania, laʼokhögö mbua-bua simane niʼokhögö Lowalangi.​—I Moze 1:27.

So sambua mbua-bua sahöli-höli dödö niʼokhögö Zomböi yaʼita Lowalangi Yehowa andrö yaʼia daʼö faʼoböwö. Ibeʼe khöda waʼauri hegöi fefu zi moguna khöda si möi faʼowua-wua dödö. (Halöwö Zinenge 14:17; 17:26-28) Tola aboto ba dödöda Namada si so ba zorugo hegöi ohitö dödönia khöda na tafahaʼö ita ba Daromalinia, Sura Niʼamoniʼö. Ifahaʼö göi ita buku andrö hadia nifalua Lowalangi enaʼö so khöda waʼowua-wua dödö ba zi so föna. * (I Yohane 4:9, 10) Lowalangi Yehowa no gumbu faʼoböwö ba iwöwöi ndraʼugö simane famaedonia. Tobali, tola öʼoʼö Lowalangi ba wameʼe göi ba niha böʼö, hasambalö sökhi ba khöu ba öʼomusoiʼö dödönia.​—Heberaiʼo 13:16.

Hadia itörö tödöu Alexandra nitutunö moroi ba wamobörö artikel andre? Hadia zalua aefa daʼö? So samösa sewa si so ba bus andrö sangumaʼö wa saniboʼö kefe Alexandra. Hizaʼi, ba nahia wolombase bus si sambua, ihubungi ndra awö-awönia ira matua nitolonia megeno ba iʼanemaiʼö ibuʼa gömönia si 20 dolar AS. Aefa daʼö, iʼoʼö göi niwaʼö Alexandra ba ibörögö ifahaʼö ia ba Zura Niʼamoniʼö. Tölu waŵa aefa daʼö, Omuso sibai dödö Alexandra me falukha ia khö ndra matua andrö ba kebaktian khö ndra Samaduhuʼö Yehowa sangogunaʼö li Cina ba Peru. Si tobali tandra wangandrönia saohagölö, ikaoni Alexandra hegöi ndra awö-awö Alexandra si möi ba kebaktian andrö ba wemanga ba restorannia.

Tola owua-wua dödöda na tafalua wameʼe hegöi ba wanolo niha böʼö. Ba mendrua manö na tatolo göi niha enaʼö aboto ba dödöra Gumbu fefu mbuala si sökhi, yaʼia daʼö Lowalangi Yehowa! (Yakobo 1:17) Tobali, hadia omasi ötema mbua moroi ba wameʼe?