No mufabuʼu halöwö khö Blessing * tobali sangehaogö bu ba Eropa. Hizaʼi, me no aefa fulu ngaluo lö aetu laböbözi, lafetaʼu ia na itandraigö ilau moloi ba hasambalö lafakao zoroi yomonia si so ba mbanua. Aefa daʼö, lafaso ia mohalöwö tobali ira alawe sohorö-horö.

Lö zi lö tola lö moguna isöndra gefe Blessing ero wongi 200 irugi 300 euro ba wobuʼa gömö, faʼebua 40.000 euro * si no itatugöi ndra alawe sangonorogö tödö nahia wohorö. Itutunö Blessing, ”Asese utandraigö ulai moloi, hizaʼi ataʼudo göi na lafakao zoroi yomogu. No tefaʼuʼu ndraʼo.” Simanö daʼö göi zalua ba niha sarakhagö öfa zuta niʼosawuyu ba industri internasional famalua amuata wohorö.

Arakhagö 4.000 fakhe ba zilalö, so samösa zi bohou ebua sotöi Yosefo nifamawa ndra talifusönia. Aefa daʼö, tobali ia sawuyu ba nomo niha si so faka ba Miserai. Tenga simane Blessing, lahaogö-haogö ua khö Yosefo ba wamobörö. Hizaʼi, me itimbagö wondrönisi moroi khö woʼomo ira alawe zokhö yaʼia, laböbögö khönia zi lö duhu wa itandraigö ihoröni ndra alawe andrö. Ba gafuriatania, lebeʼe ba gurunga ba larate ia siʼöli.​—I Moze 39:1-20; Zinunö 105:17, 18.

Yosefo samösa sawuyu me götö föna; Blessing samösa sawuyu ba abad si-21. Hizaʼi, yaʼira si darua andre no tobali gamawaö niha, si no so ba zi hauga abad. Labaliʼö niha simane gama-gama nigale hegöi börö wangalui hare.

Fasuwöta no lala fondrege zalio ba ngawalö soi ba wanöndra sawuyu. Teʼombakhaʼö wa iʼohe 90.000 dahana Razo Miserai Tutmose III me no möna moroi ba wasuwöta ba Ganaʼana. Tobali ira sawuyu ba pertambangan,  lafaso wamazökhi nahia-nahia wamosumange, ba lakhao lala nidanö.

Barö wamatörö Kekaisaran Romawi, oya iʼasogö zawuyu göi fasuwöta. Ba börö gangandröwa sanandrösa ba zawuyu andrö wa itaria alua wasuwöta. Ba abad siföföna, arakhagö matonga moroi ba nono mbanua Roma tobali sawuyu. Ato zawuyu moroi ba Miserai hegöi Roma nifaso ba wohalöwö ba lö sökhi lafolau khöra. Duma-dumania, awai andrö tola auri zawuyu ba pertambangan Romawi ha mato 30 fakhe.

Moloʼö welalö ginötö, itugö lö saʼe faʼasökhi nifalua khö zawuyu. Iʼotarai abad si-16 irugi abad si-19, no tobali hare sebua bisnis wamawa sawuyu ba gotalua Afrika hegöi Amerika. Ifatunö UNESCO, ’So mato 25 irugi 30 zuta ndra matua, ira alawe, ba iraono nitagö ba muʼamawa.’ Ngaotu ribu zi mate ba ginötö woʼötö Samudra Atlantik. Imane samösa sawuyu si lö si mate sotöi Olaudah Equiano, ”Ngarö-ngarö ndra alawe hegöi ngarö-ngarö niha sarakhagö mate zangaʼasogö faʼataʼu sebua.”

Fangosawuyu andrö tenga ha faʼabu dödö salua ba götö föna. Moloʼö Organisasi Buruh Internasional, arakhagö 21 zuta ndra matua, ira alawe, ba iraono zohalöwö tobali sawuyu barö fangosawuyu ba ha maʼifu gazi mazui lö hadöi gazi. Sawuyu ba götö iadaʼa mohalöwö ba pertambangan, pabrik tekstil, pabrik batu bata, nahia wamalua horö, hegöi ba nomo niha. Hewaʼae lö nitehegö famareta, hizaʼi fangosawuyu simane daʼa tenga itugu alö.

Börö zi lö sökhi si no irai alua khöra, ato zawuyu zangodödögö enaʼö tola aefa. Me abad siföföna SM, so samösa gladiator (sawuyu mazui niha nikuru nigazi ba waʼudusa föna niha sato ba götö Romawi) sotöi Spartacus hegöi zi 100.000 zawuyu tanö böʼö samadaö khö Roma hizaʼi lö aʼozu. Me abad si-18, mamadaö zawuyu si so ba Pulau Hispaniola ba Karibia khö zokhö yaʼira. Börö zi lö sökhi nifalua khö ndra sawuyu andrö wa tola so fasuwöta talifusö ba zi 13 fakhe. Buania, tobali soi si no teʼefaʼö Haiti me 1804.

Faʼaheta Gizaraʼeli ba Miserai, hewaʼae na ato no sambua fangefaʼö sahöli-höli dödö ba wangosawuyu sagötö sejarah. Te tölu zuta mazui fefu soi andrö niʼefaʼö moroi ba wangosawuyu. Ba no sinangea muʼefaʼö ira. Moloʼö Sura Niʼamoniʼö ”oi halöwö niforege khöra”. (II Moze 1:11-14) Faraʼo samösa ba ibeʼe fareta enaʼö labunu fefu nono sawuyu ba ndraono Gizaraʼeli enaʼö lö monönö waʼatora.​—II Moze 1:8-22.

 Tohude wangefaʼö ndraono Gizaraʼeli andre moroi ba danö Miserai börö me fao danga Lowalangi. Imane Lowalangi khö Moze, ”Noa sa uʼila waʼabölö-bölö wamakaora andrö. Andrö möido tou saʼae, ba wangefaʼö yaʼira.” (II Moze 3:7, 8) Irugi iadaʼa, gofu hezoso so niha Yahudi misa ba lafalua gowasa Fasa ba wanörö tödö salua andrö.​—II Moze 12:14.

Imane Sura Niʼamoniʼö, ”Khö Lowalangida Yehowa sa, ba lö famuyuʼö huku,” ba daʼa göi zamaduhuʼö khöda wa lö tebulö Lowalangi. (II Ngaʼötö 19:7; Maleakhi 3:6) Ifatenge Yesu Lowalangi ”ba wanuriaigö fangefa ba nikuru . . . , ba wamolala nifakao, ba wangefa”. (Luka 4:19) Hadia daʼa geluahania wa teʼefaʼö dozi sawuyu? Tatu manö tenga. Mufatenge Yesu ba wangefaʼö niha moroi ba wangosawuyu horö hegöi faʼamate. Imane wangumaʼö, ”Ba iʼefaʼö ami si duhu andrö.” (Yohane 8:32) Iadaʼa, oya lala zi duhu andrö nifahaʼö Yesu ba wangefaʼö niha.​—Faigi kotak ” Teʼefaʼö moroi ba Wangosawuyu Tanö Böʼö”.

Sindruhunia, faehu lala niʼogunaʼö Yehowa ba wanolo Yosefo hegöi Blessing enaʼö tola aefa ira moroi ba wangosawuyu. Tola öbaso waö-waö Yosefo sahöli-höli dödö andrö ba Zura Niʼamoniʼö, ba mbuku I Moze faza 39 irugi 41. Iʼodödögö sibai göi Blessing enaʼö tola aefa ia moroi ba wangosawuyu.

Me no aefa lafofanö ia moroi ba zi sambua soi si so ba Eropa, möi Blessing ba Spanyol. Ba daʼö falukha ia khö ndra Samaduhuʼö Yehowa ba ifahaʼö ia ba Zura Niʼamoniʼö khöra. Ihalö gangetula ba wobohouni lala waʼaurinia ba iʼalui halöwönia si tata. Aefa daʼö, mangalulu ia khö ndra alawe sangonorogö tödö nahia wohorö si no irai mohalöwö ia enaʼö tola muʼalösi gömö si lö tola lö ibuʼa ero waŵa. Samuza maʼökhö, tohare telefo khö Blessing moroi khö ndra alawe andrö. Omasi ia ba wo heta fefu woʼömö Blessing ba iʼandrö waʼebolo dödönia. Hadia zalua? No ifahaʼö ia göi khö ndra Samaduhuʼö Yehowa! Imane Blessing, ”Iʼogunaʼö lala sahöli-höli dödö si duhu andrö ba wangefaʼö yaʼita.”

Abu sibai dödö Lowalangi Yehowa wamaigi falöʼatulö nifalua khö ndraono Gizaraʼeli me tobali ira sawuyu ba Miserai. Tatu manö hulö zimanö daʼö göi dödönia wamaigi falöʼatulö salua mane maʼökhö. Sindruhu sa ba wangefaʼö fefu ngawalö wangosawuyu moguna wamohouni sebua ba niha gulidanö. Hizaʼi no ifabuʼu Lowalangi wa hasambalö ifalua wamohouni andrö. ”Ba tadöna-döna mbanua si yawa, si bohou, ba tanö si bohou, dali gamabuʼula linia andrö—ba zahono faʼatulö dödö.”​—II Fetero 3:13.