BUALA fonderege zebua andrö zamarou tödöda ba wangandrö saohagölö. Itutunö Yesu wamahaʼö me no aefa ifadöhö niha so fökhö si lö hadöi dalu-dalunia me götö daʼö. Samösa moroi ba gotalua zi dafulu andrö ba ”ifuli ia, iʼebuaʼö linia wanuno Lowalangi”. Imane Yesu, ”Hadia, tenga dafulu ira zi döhö fökhö? Heza so zi dasiwa?” (Luka 17:12-17) Hadia wamahaʼönia? Alio taʼolifugö zi sökhi si no irai ifalua niha böʼö khöda!

Höli, tenga simane mbuala tanö böʼö. Daʼa mbuala fondrege zebua si no irai mubeʼe. Tobali, hewisa wotemaʼöu buala Lowalangi andrö soguna khöu?

• Moguna öʼila haniha Zamuala. Lö fefu niha tola manema faʼauri si lö aetu si no ihenaigö höli. Hizaʼi, imane Yesu ba wangandrönia khö Lowalangi, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu andrö, si ha sambua, ba enaʼö, aboto ba dödöra zinengeu andrö, Yesu Keriso.” (Yohane 17:3) Na so niha sangumaʼö khöu wa no irai so zanolo yaʼugö me iraonoʼö nasa, hadia lö omasi öʼila haniha ia ba hadia mbörö wa itoloʼö? No ibeʼe  höli Lowalangi Yehowa enaʼö auri niha. Tenga ha öʼila haniha ia hizaʼi tola göi fahuwu ndraʼugö khönia. Ifarou Sura Niʼamoniʼö, ”Miʼondrasi Lowalangi, ba iʼondrasi ami!”​—Yakobo 4:8.

• Oromaʼö wamati ba höli. ”Khö zamati khö Nono andrö so waʼauri si lö aetu.” (Yohane 3:36) Hadia geluahania oromaʼö wamati? Eluahania, moroi ba nifalua oroma wa mamati ba höli. (Yakobo 2:17) Hadia manö zinangea mufalua? Tola öʼokhögö mbuala andrö na öʼodödögö ba wangokhögö yaʼia ba omasi ötema. Tobali moguna öʼodödögö ba wangokhögö ba omasi ötema höli. Lalania? Fahaʼö ndraʼugö wa omasi Lowalangi na teʼorifi ndraʼugö, ba moguna oroma daʼö ba nifaluau. * Angandrö khö Lowalangi ba wangandrö fengefa hegöi tödö side-ide si lö sinegu. Hatöʼögö khö Lowalangi si fao faʼafaduhu dödö, wa no ifabuʼu höli wa ba zi so föna, latema waʼatulö, faʼahono dödö, hegöi faʼowua-wua dödö niha sangoromaʼö famati sagötö faʼara!​—Heberaiʼo 11:1.

• Ondrasi Wanörö Tödö faʼamate Yesu. No ihonogöigö Yesu zinangea mufalua ero röfi enaʼö tola tatörö tödöda höli. Sanandrösa ba daʼö imane wangumaʼö, ”Mitörö-törö tödömi ndraʼo, ba zimane.” (Luka 22:19) Lafalua wanörö tödö andrö ira Samaduhuʼö Yehowa ba ngaluo Salasa, 11 mbaŵa si Öfa 2017, aefa aekhu luo. Arakhagö sambua za wamalua yaʼia, fao ba daʼö ba wodunö-dunö geluaha waʼamate Yesu ba hewisa wa tola iʼasogö howu-howu hegöi gunania ba ginötö iadaʼa ba ba zi so föna. Me ndröfia, arakhagö 20 zuta niha ba zi sagörö ulidanö zangondrasi Fanörö Tödö. Makaoni göi ndraʼugö ba wefao khöma ba wotemaʼö mbuala fondrege zebua andrö moroi khö Lowalangi.