FANOTÖNA SAHÖLI-HÖLI DÖDÖ DAʼA! No ifabuʼu Somböi yaʼita wa ibeʼe khöda waʼauri si lö aetu ba gulidanö andre. Hizaʼi, ato zi lö faduhu tödö ba daʼö. Lamane, ’Samuza inötö hasambalö mate ita. No si toʼölö daʼö ba waʼauri.’ So göi zangumaʼö wa tola tasöndra waʼauri si lö aetu, hizaʼi tenga ba gulidanö andre. Lawaʼö wa auri niha sagötö faʼara ba zorugo na no aefa mate ira. Hewisa moloʼö yaʼugö?

Fatua lö öbeʼe wanema li, datatutunö wanema li Zura Niʼamoniʼö sanandrösa ba zi tölu ngawua wanofu andre: Moroi ba lala wamazökhi niha, hadia niʼilada sanandrösa ba waʼaurida ba zi so miföna? Hadia gohitö dödö Lowalangi ba gulidanö hegöi ba niha? Hana wa mate niha?

Niha gulidanö andre faböʼö moroi ba ngawalö zauri niwöwöi Lowalangi ba gulidanö. Hadia geluahania? Itutunö Sura Niʼamoniʼö, ha niha gulidanö niwöwöi ’famaedo’ Lowalangi ba ”si fakhili-khili” khönia. (1 Moze 1:26, 27) Eluahania, so ba niha gamuata hegöi ösi dödö niʼokhögö Lowalangi, simane faʼomasi ba faʼatulö.

Baero daʼö, tebeʼe göi ginötö ba niha ba woʼangeragö hadia ia hegöi ba wangai angetula. Tola göi lafaehusi hezo zatulö ba si lö atulö ba tebeʼe khöra waʼaterou dödö enaʼö fahuwu khö Lowalangi. Daʼö mbörö wa taʼandrö saohagölö ba waʼasökhi mbanua si yawa awö danö, ba ngawalö niwöwöi, seni, musik, hegöi karya sastra. Sabölö moguna, niha gulidanö tola lafosumange Zomböi yaʼira. Andrö wa faehu sibai niha gulidanö moroi ba danö böʼö.

Angeragö atö daʼa: Ibeʼe Lowalangi ba niha fefu mbuala andrö ba tola ladouʼö waʼatua-tuara irugi zi lö aetu. Hadia guna wa ibeʼe fefu daʼö Lowalangi na ha ngafulu fakhe auri ita? Rahu-rahunia, omasi Lowalangi na taʼokhögö waʼauri si sökhi ba gulidanö andre sagötö faʼara.

Ato zangumaʼö wa ifazökhi niha Lowalangi tenga enaʼö auri ira sagötö faʼara ba gulidanö. Moloʼö yaʼira, tefazökhi gulidanö andre tobali nahia ba zi sabata. Muʼogunaʼö ia ba wotatugöi haniha zinangea möi ba zorugo hegöi si fao khö Lowalangi ba wanöndra faʼauri si lö aetu. Na sindruhu atö daʼa, eluahania börö Lowalangi wa tola alua zi lö sökhi ba gulidanö. Hizaʼi, tenga simane daʼö Lowalangi.  Imane Sura Niʼamoniʼö, ”Me no satulö lala andrö khönia fefu, Lowalangi si lö faröi ia, lö falimosa khönia, satulö tödö ba sadölö tödö ia!”​—5 Moze 32:4.

Ihaogö wanutunö Sura Niʼamoniʼö hadia gohitö dödö Lowalangi ba gulidanö andre: ”Banua si yawa andrö, ba no banua Yehowa; ba tanö andre, ba no ibeʼe ba nono niha.” (Zinunö 115:16) Sindruhu sa, ifazökhi gulidanö andre Lowalangi tobali nahia si sökhi ba niha, si lö tebulö irugi zi lö aetu. Ifoʼösi göi ngawalö hadia ia ba gulidanö andre enaʼö ohahau dödöda ba waʼauri sagötö faʼara.​—1 Moze 2:8, 9.

”Banua si yawa andrö, ba no banua Yehowa; ba tanö andre, ba no ibeʼe ba nono niha.”—Zinunö 115:16

Ihaogö wanutunö Sura Niʼamoniʼö hadia mbörö wa iwöwöi niha gulidanö Lowalangi. Iʼandrö Lowalangi ba ngambatö si oföna enaʼö ’lafoʼösi gulidanö ba labeʼe barö mbawara, lafatörö zaliwa-liwa ba danö fefu, sanana-nana ba gulidanö’. (1 Moze 1:28) Tebeʼe khöra halöwö ba wondrorogö kabu si sökhi si toröi ira ba laʼeboloʼö irugi ba wondrege danö. No sambua halöwö fondrege zi sökhi daʼa! Omasi Lowalangi na auri Gadamo hegöi Khawa awö fefu ngaʼötöra ba gulidanö sagötö faʼara, tenga ba zorugo.

Na simanö, hana wa mate ita? Itutunö Sura Niʼamoniʼö wa samösa ba gotalua ndra malaʼika nifazökhi Lowalangi, nifotöi Afökha Satana ba gafuriata, iforege wamakiko nifakhoi Lowalangi ba Gedena. Hadia nifaluania?

Idönisi dödö ndra satuada siföföna sotöi Adamo hegöi Khawa enaʼö fao ira wamadaö khö Lowalangi. Iwaʼö Satana wa no itaha zi sökhi khöra Lowalangi, yaʼia daʼö buala ba wotatugöi samösa hezo zatulö ba si lö atulö. Faduhu dödöra khö Zatana ba mamadaö ira khö Lowalangi. Lua-luania, atua ira ba mate simane sibai niwaʼö Lowalangi. Lö saʼae tebeʼe khöra ginötö ba wanöndra faʼauri si lö aetu ba Waradaiso si sökhi.​—1 Moze 2:17; 3:1-6; 5:5.

Molua-lua khöda wamadaö Gadamo andrö hegöi Khawa irugi iadaʼa. Imane Taromali Lowalangi, ”Böröta horö andrö, ha samösa niha [Adamo] zamobörö ba faʼamate andrö börö horö, andrö wa ikhamö fefu niha faʼamate.” (Roma 5:12) Mate ita börö me tatema horö ondröita hegöi faʼamate moroi khö zatuada siföföna, tenga börö nitatugöi Lowalangi mazui ohitö dödönia si lö aboto ba dödöda.

Hasambalö aʼozu gohitö dödö Lowalangi ba niha hegöi ba gulidanö andre hewaʼae no alua wamadaö ba Gedena. Faʼomasi ba faʼatulö Lowalangi soʼahonoa zangoʼou yaʼia ba wamokai lala enaʼö tola teʼefaʼö ita moroi ba horö ba faʼamate. Itutunö sinenge sotöi Faulo, ”Luo horö sa ba faʼamate, ba buala faʼebua dödö Lowalangi andrö yaʼia daʼö faʼauri si lö aetu ba khö Keriso Yesu Soʼaya yaʼita.” (Roma 6:23) Lowalangi sebua faʼomasi, ”itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu”. (Yohane 3:16) Itehegö waʼaurinia Yesu tobali höli irege tola taʼokhögö mangawuli fefu howu-howu si taya börö horö Gadamo. a

Ba zi lö ara tö, alua mbuʼusa li Lowalangi sanandrösa ba gulidanö faradaiso. Tola toröi ndraʼugö ba daʼö na öʼoʼö mene-mene Yesu andre, ”Mitörö mbawa göli sise-ise andrö, me no ebua mbawa göli ba ebolo lala saekhu ba waʼatekiko, ba ato zanörö daʼö. Hizaʼi, no ide-ide mbawa göli ba ise-ise lala saekhu ba waʼauri andrö, ba lö ato zanöndra yaʼia.” (Mataiʼo 7:13, 14) Na simanö, tetatugöi waʼauriu ba zi so miföna moloʼö nifiliu. Hadia nifaluau?