Ba wamobörö, no tatutunö hewisa waö-waö Kroesus si kala me fasuwö khö Razo Weresia, börö me no ifaelungu ia samaʼeleʼö moroi ba Delfi. Na ba Zura Niʼamoniʼö, so wamaʼeleʼö sahöli-höli dödöda sanandrösa khö Razo Weresia si no muzara-zara waʼaluania.

Mato 200 fakhe silalö fatua lö si tumbu razo andrö, samaʼeleʼö moroi ba Heberaiʼo sotöi Yesaya no irai itötöi döi Giro. Itutunö hewisa na ilawa mbanua Mbabilona sabölö andrö Kiro.

Yesaya 44:24, 27, 28: ”Daʼö niwaʼö Yehowa, . . . sangumaʼö ba namo: Yaʼogoʼö ndraʼugö! Ba boto nidanö andrö khöu, ba otufo ubeʼe! Sameʼe töi Kiro andrö ’Kubalo khögu’; ba yaʼia zamalua nihonogöigu andrö, fefu, wangumaʼö ba khö Yeruzalema andrö: Yatetaruʼö zui! Ba ba gosali andrö: Yatefadane-dane!”

Moloʼö sejarawan Yunani sotöi Herodotus, no lafindrakö ira saradadu Kiro lala Nungo Nidanö Oiferati si numalö misa ba mbanua Mbabilona. Börö lala nifalua Giro andre wa tola laʼötö nidanö ira saradadunia ba numalö ira ba Mbabilona. Me no lakalaisi mbanua daʼö, iʼefasi niha Yahudi si no laʼosawuyu ba Mbabilona andrö Kiro. Itehegö khöra wangawuli hegöi ba wangehaogö Yeruzalema si no ladudugö 70 fakhe silalö.

Yesaya 45:1: ”Daʼö niwaʼö Yehowa khö nibayoininia andrö, khö Kiro andrö—niraʼugu tanga kambölö, ba wanguhundragö fönania soi niha ba ba wameta böbö talu razo, enaʼö teboka mbawandruhö fönania ba enaʼö tenga nikusi saʼae mbawa göli.”

Möi niha Weresia ba mbanua andrö, latörö mbawandruhö sebua si no mufasa ba mbawa göli. No teboka manö mbawandruhö daʼö, olifu ira wondruhö. Na laʼila menaʼö niʼera-era Giro andrö ira niha Mbabilona, tola laduhö fefu mbawa göli si teboka, saekhu ba lala nungo nidanö. Hizaʼi, simane salua, tebai lafalua hadia ia.

Sahöli-höli dödö salua andre no sambua moroi ba zi hauga ngawua wamaʼeleʼö ba Zura Niʼamoniʼö si lö fulitö alua. a Na mamaʼeleʼö niha gulidanö, asese moʼamakhaita ia khö lowalangira sofaya. Hizaʼi, famaʼeleʼö Zura Niʼamoniʼö sindruhu-ndruhu moroi khö zi no irai mangumaʼö, ”Sangombakha lua-lua, iʼotarai mböröta, iʼotarai götö föna saʼae, lua-lua zi lö alua na.”​—Yesaya 46:10.

 Ha Lowalangi sindruhu, sotöi Yehowa zi tola mamaduhuʼö simane daʼö. Eluaha döinia ”Yaʼia Mbörö Wa Alua”. Daʼa zangoromaʼö faʼabölönia ba wangiʼila hegöi ba wotatugöi salua ba zi so miföna si faudu ba gohitö dödönia. Daʼa zamaduhuʼö khöda wa hasambalö iʼoʼozui fefu zi no ifabuʼu.

Hadia omasiʼö öʼila nifaʼeleʼö Zura Niʼamoniʼö sanandrösa ba götöda andre? Mato 2.000 fakhe silalö, ifaʼeleʼö Sura Niʼamoniʼö wa so dania ”mbaŵa si lö sökhi ba ngaluo safuria andre”. Hadia ngaluo safuria daʼö? Tenga sanandrösa ba gulidanö mazui niha, hizaʼi ba waʼudusa, famakao, ba fangabu dödö salua ba niha gulidanö ba zi hauga ribu fakhe. Datafaigi ösa wamaʼeleʼö sanandrösa ba ”ngaluo safuria”.

2 Timoteo 3:1-5: ”Ba ngaluo safuria . . . , amuata niha ba daʼö ha tana khöra laʼalui, sangomasiʼö anaʼa, sanuno yaʼira, sangosebua, sangoʼaya, si lö mamondrongo li zatua, si lö mangila mangandrö saohagölö, si faröi, si lö mangomasiʼö awöra, si lö fahasara dödö, samöbögö si lö duhu, si lö fanaha tödö, safaito, si lö mangomasiʼö si sökhi, si manga mböli, sabeʼe högö, si fayawa, sangomasiʼö isö-isö dödöra moroi ba waʼomasira Lowalangi, hulö soloʼö khö Lowalangi ira wamaigida ba no sangosilöʼögö faʼabölönia andrö.”

Hadia lö fao dödöu wamaduhuʼö wa simane daʼö gamuata niha ba ginötö daʼa? Hadia aboto ba dödöu wa no ifasui ita niha sohöni-höni yaʼira samösa, sangomasiʼö anaʼa, hegöi si fayawa? Hadia lö aneheʼö wa fatandro sibai niha ba ambö hasara dödöra khö nawöra? Tatu öʼila samösa wa no tehöngö walömoloʼö li ndra satua, ba ato niha sangomasiʼö isö-isö dödöra samösa moroi ba waʼomasira Lowalangi. Ero maʼökhö itugu tedou manö waʼalösökhi gamuata niha.

Mataiʼo 24:6, 7: ”Mirongo dania wasuwöta salua misa. . . . Maoso dania zi sambua soi isuwö soi böʼö, simanö göi zalua ero sambu-sambua famatörö.”

Moloʼö si no mutahö, töra 100 zuta niha si mate ba wasuwöta hegöi faʼudusa iʼotarai 1914, töra moroi ba waʼato nono mbanua ba ngawalö soi. Tola ökhalaigö wege-ege niha, faʼabu dödö, ba famakao nitaögöra. Hadia laʼameʼegö tödö zalua andrö niha ba ngawalö soi ba labato wasuwöta?

Mataiʼo 24:7: ”Alua lofo sabölö-bölö.”

Imane Program Pangan Dunia, ”Sindruhunia, obönö mbalazo niha ba gulidanö andre. Hizaʼi, 815 zuta niha—samösa moroi ba zi dasiwa—ero bongi mörö manö ira, lö si manga. So göi zofökhö—samösa moroi ba zi datölu—börö waʼambö gizi.” Moloʼö si no mutahö, mato tölu zuta ndraono si mate ero röfi börö waʼolofo.

Luka 21:11: ”Alua ndruru danö sabölö-bölö.”

So mato 50.000 kali alua ndruru danö sabölö-bölö nirasoi niha ero röfi, ba mato 100 ba gotaluania zamakiko tomosa, ba mato sakali ba zi döfi alua ndruru danö sabölö-bölö sibai. Moloʼö si no mutahö, ba gotalua ndröfi 1975 ba 2000, so 471.000 niha si mate börö ndruru danö.

Mataiʼo 24:14: ”Teturiaigö dania Wamatörö Lowalangi andrö, turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.”

Ira Samaduhuʼö Yehowa si töra walu zuta waʼato, laturiaigö ba lafaduhuʼö misa duria somuso dödö sanandrösa ba Wamatörö Lowalangi kira-kira ba zi 240 ngawalö soi. Laturiaigö duria somuso dödö misa ba mbanua sebua, banua side-ide, ba gatua, hegöi ba mbanua si so ba hili. Na no awai halöwö daʼa moloʼö somasi Lowalangi, imane samaʼeleʼö, ”Awena dania amozua götö danö andre.” Hadia geluahania? Daʼö gamozua wamatörö niha gulidanö ba tebörögö ngaluo si bohou, yaʼia daʼö Famatörö Lowalangi. Hadia mbuʼusa li salua dania barö Wamatörö Lowalangi? Baso atö duho aefa daʼa.