Hadia no irai manofu-nofu ndraʼugö sanandrösa ba zalua khöu hegöi ösi nomou ba zi so miföna? Hadia kayo ndraʼugö dania ba ato zangomasiʼö yaʼugö mazui abu dödöu börö me lö awö-awöu? Hadia anau nosou mazui mate ndraʼugö ba waʼalio? Daʼö manö nisofu-sofu niha ba zi hauga ribu fakhe faʼara.

Ato niha sagatua-tua iadaʼa, lafahaʼö ira ba ngawalö zalua si tehöngö ba zi sagörö ulidanö, ba latahö hadia zalua ba zi so miföna. Hewaʼae oya nifaʼeleʼöra si no alua, tanö böʼö so göi zi lö itörö, so ösa zaʼozu ba waʼabu dödö. Duma-dumania me 1912, so zanöndra telegraf nirkabel sotöi Guglielmo Marconi, no irai ifaʼeleʼö, ”Ba zi so miföna, lö saʼae alua wasuwöta sagötö muʼogunaʼö nirkabel andre.” So göi samösa agen Decca Record Company, lö itemaʼö grup musik The Beatles me 1962, ba faduhu dödönia wa lö mofozu nifalua grup musik samake gitar andre ba zi lö ara tö.

Ato zangodaligö faʼabölö ndra malaʼika si lö sökhi ba wangiʼila salua ba zi so miföna. So ösa zangalui fanuturu lala moroi khö ndra sanahö döfi. Fanahö döfi andrö no sambua tuho si no toʼölö mufaʼanö ba majalah hegöi koran. Tanö böʼö manofu-nofu ira khö ndra si faeta mazui ba duku ba ”wombaso” salua ba zi so miföna, laʼogunaʼö kartu tarot, numero, mazui suʼa danga.

Enaʼö laʼila hadia zalua ba zi so miföna, so ösa niha me mböröta sanofu bua gera-era ndra samaʼeleʼö, si toʼölönia khö ndra fandrita samaʼema oroisa moroi khö lowalangi nifosumangera. Duma-dumania, Razo Kroesus moroi ba Lidia, ifaʼoheʼö mbualania sebua böli khö zamaʼeleʼö ba Delfi, Yunani. Iʼandrö enaʼö muʼombakhaʼö khönia hadia lua-luania na fasuwö ia khö Giro moroi ba Weresia. Imane samaʼeleʼö daʼö wa ifakiko zi ”sambua famatörö sebua” dania Kroesus andrö na fasuwö ia khö Giro. Möi fasuwö Kroesus börö me faduhu dödönia wa hasambalö möna ia, hizaʼi famatörönia samösa nifakikonia!

Lö tatu niwaʼö zamaʼeleʼö andrö ba ifaelungu niha. Tola manö atulö niwaʼönia andrö gofu haniha sa zi möna ba wasuwöta daʼö. Rugi sibai Kroesus ba wamaʼeleʼö andrö börö me faʼateʼala nitemania. Ba ginötö andre, hadia mofozu lala si toʼölö laʼogunaʼö niha ba wangiʼila salua ba zi so miföna?