No muturiaigö duria somuso dödö sanandrösa ba Wamatörö Lowalangi ba zi sagörö ulidanö, simane si no ifaʼeleʼö Yesu. (Mataiʼo 24:14) No mututunö ba mbuku Danieli wa Lowalangi zamatörö ba Wamatörö andrö. Ba faza 2 moroi ba mbuku Danieli, so wamaʼeleʼö sanandrösa ba wamatörö niha gulidanö sabölö ebua kuaso iʼotarai Mbabilona me föna irugi ba ginötöda andre. Ba ayati 44 itutunö hadia zalua ba zi so miföna:

”Iʼasogö gamatöröwa Lowalangi ba zorugo, amatöröwa si tebai adudu, götö-götö waʼara, ba faʼasalawa daʼö, ba lö möi ba niha böʼö; irasa dania gamatöröwa no mege fefu, ba ihori, ba yaʼia, ba lö tebulö, irugi zi lö aetu.”

Famaʼeleʼö daʼa hegöi tanö böʼönia ba Zura Niʼamoniʼö zangoromaʼö wa Famatörö Lowalangi dania zangohori famatörö niha gulidanö, ba iʼasogö waʼohahau dödö hegöi faʼahono dödö ba gulidanö. Hewisa dania waʼaurida na tohare Wamatörö Lowalangi? Datatutunö ösa mbuʼusa li sahöli-höli dödö si lö ara tö alua.

• LÖ HADÖI FASUWÖTA SAʼAE

  Zinunö 46:10: ’Lowalangi zanenawa fanuwö irugi wondrege danö, samatö fana, solewa totoa doho, sanunu alitö kureta.’

  Khalaigö atö hewisa gulidanö daʼa dania na fefu gefe hegöi faʼonekhe ba wangehaogö fangöna ba wasuwöta, muʼogunaʼö ia ba wanolo niha, tenga ba wamunu yaʼira! Sindruhu-ndruhu alua daʼö dania na no tohare Wamatörö Lowalangi.

• LÖ HADÖI FÖKHÖ SAʼAE

  Yesaya 33:24: ”Samösa lö ba mbanua sangumaʼö: No gönado safökhö khögu.”

  Khalaigö atö gulidanö na lö hadöi niha si göna fökhö tödö, kanker, malaria, awö danö böʼönia. Lö moguna so ruma saki hegöi dalu-dalu. Ba zi so föna, moʼahonoa niha gulidanö.

• LÖ HADÖI BAŴA LOFO

  Zinunö 72:16: ”Fahöna mbua nowi ba danö, ba hili yawa.”

  Fahöna dania gö niʼasogö danö andre ba niha fefu ba tola laʼa. Lö hadöi saʼae zolofo mazui soʼamböta gizi.

• LÖ HADÖI FAʼAFÖKHÖ SAʼAE, FAʼABU DÖDÖ, HEGÖI FAʼAMATE

  Famaʼeleʼö 21:4: ”Iʼosi [Lowalangi] daŵa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö, me no numalö ziföföna andrö.”

   Eluahania, taʼokhögö waʼauri soʼahonoa sagötö faʼara ba gulidanö faradaiso! Daʼö zi no ifabuʼu Somböi yaʼita sebua faʼomasi, Lowalangi Yehowa.

Hadia faya-faya fefu mbuʼusa li daʼö? Arakhagö fefu niha ladöna-döna waʼauri nifabuʼu Zura Niʼamoniʼö, hizaʼi abua khöra wokhalaigö faʼauri si lö aetu andrö. Lö ahöli dödöda ba daʼa börö me samösa lö niha si no irai mangokhögö faʼauri simane daʼö.

Iʼotarai me mböröta, no teʼosawuyu niha ba horö hegöi ba waʼamate. Tebai aefa ira ba waʼafökhö, famakao, ba fangabu dödö irege ato zangumaʼö wa no si toʼua daʼö ba waʼauri. Hizaʼi, tenga daʼö gohitö dödö Lowalangi Yehowa, Somböi yaʼita.

Imane Lowalangi enaʼö tola faduhu dödöda ba mbuʼusa linia, ”Lö mangawuli khögu lö boto, atö na no mofozu zomasido ibeʼe ba na no ifalua ba nifaʼoheʼögu yaʼia.”​—Yesaya 55:11.

Imane Sura Niʼamoniʼö wa Yehowa andrö Lowalangi ”si tebai falimo”. (Tito 1:2) Börö me no ifabuʼu Lowalangi ngawalö zahöli-höli dödö andre, angeragö atö: Hadia tola auri niha ba gulidanö Faradaiso si no mufabuʼu andrö sagötö faʼara? Hadia zinangea tafalua enaʼö tola tatema mbua ba mbuʼusa li Lowalangi andrö? So wanema linia ba duho-tuho aefa daʼa.