Ba Gapura Titus, so dombua gambara sebua si no muhaogö. Daʼö zanutunö wa no alua zahöli-höli dödö me mböröta. Hizaʼi, lö ato zangila wa moʼamakhaita gapura daʼa ba Zura Niʼamoniʼö. Gapura Titus andrö no tobali samaduhuʼö si lö hede sanandrösa ba wamaʼeleʼö Zura Niʼamoniʼö si no alua.

Me böröta abad siföföna M, ebua sibai Wamatörö Romawi, iʼotarai ba mbanua Inggris hegöi Gaul (iadaʼa Prancis) numalö ba Mesir. Ohahau sibai dödö niha ba mbanua daʼö ba kayo göi ira. Hizaʼi, so sambua mbanua si tobali börö waʼalangu dödö ba Roma, yaʼia daʼö Provinsi Yudea.

Imane Encyclopedia of Ancient Rome, ”Ba Wamatörö Romawi faoma Yudea, faoma fatuwu khöra nawöra. Ba gotalua mbanua nifatörö Romawi, lö irai so zimane daʼö. Lö omasi niha Yahudi khö ndra samatörö yaʼira, yaʼia daʼö niha moroi ba soi böʼö si lö moʼameʼegö tödö zi toʼölö lafalua. Ba lö göi omasi niha Romawi ba niha Yahudi sabeʼe högö.” Latötöna ira niha Yahudi enaʼö so zamatörö yaʼira, si tola mamofanö niha Romawi ba ifangawuli wamatörö si sökhi ba Gizaraʼeli. Hizaʼi me döfi 33 M, no iʼombakhaʼö Yesu Keriso wa adudu dania mbanua Yeruzalema.

Imane Yesu, ”Ba ginötönia dania, lafazökhi göli eu satarö si faʼudu khöu ba zi fasuimö. Lafaʼuʼu ba lalaziʼö ndraʼugö iʼotarai watalinga danö. Lafaloʼo ndraʼugö ba danö ba lahori nonou. Lö latehegö falaete gara ba nawönia kara.”​—Luka 19:43, 44.

Tatu manö manofu-nofu dödö ndra nifahaʼö Yesu ba wehedenia daʼö. Dua hari aefa daʼö me lafaigi gosali ba Yeruzalema, so samösa moroi ba gotaluara zangumaʼö, ”He Samahaʼö, faigi atö, hawaʼasökhi gara daʼö hegöi tomosania!” Me luo daʼö, faʼanau gara si hauga ngawua ba gosali andrö töra 11 meter, faʼebolonia 5 meter, ba faʼalawania 3 meter! Hizaʼi, imane Yesu, ”Ba ginötönia dania, fefu niʼilami andrö ahori tedudugö. Lö hadöi saʼae kara si falaete ba nawönia kara.”​—Mareko 13:1; Luka 21:6.

Aefa daʼö, ifatunö khöra Yesu, ”Na miʼila so zaradadu samasui Yeruzalema, eluahania daʼö lö aratö tedudugö Yeruzalema. Niha si so ba Yudea enaʼö moloi ia ba hili, si so bakha ba mbanua enaʼö ilau mofanö, ba si so ba mbanua si fasui böi yamöi ira ba daʼö.” (Luka 21:20, 21) Hadia itörö niwaʼö Yesu?

Tölu ngafulu a tölu fakhe no numalö ba tefakao nasa niha Yudea barö wamatörö Romawi. Hizaʼi me döfi 66 M, me itagö gefe ba gosali si samösa pejabat Romawi sotöi Gesius Florus, aukhu sibai dödö niha Yahudi. Gösö lasuwö Yeruzalema, ato zaradadu Romawi nibubunu, ba laʼombakhaʼö wa no teʼefaʼö ira moroi ba Roma.

 Mato tölu waŵa aefa daʼö, töra 30.000 zaradadu Romawi nidöniaʼö Cestius Gallus, lasuwö Yeruzalema ba wokalaisi niha samadaö. Iʼanemaiʼö möi niha Romawi ba mbanua andrö ba lafakiko göli tanö baero gosali. Hizaʼi ba zi lö mudöna-döna, mangawuli furi zaradadu Romawi. Omuso dödö niha Yahudi samadaö ba gösö lagohi zaradadu Romawi. Börö me no laröi Yeruzalema ira niha si fasuwö andrö, tola moloi niha Keriso moroi ba mbanua daʼö, simane niʼoroiʼö Yesu. Numalö ira ba hili ba zi tambai Nungo Nidanö Yoridano.​—Mataiʼo 24:15, 16.

Döfi aefa daʼö, ifuli omasi Roma wanuwö Yudea. Sakali daʼa, Jenderal Vespasianus zondröniaʼö ba ononia Titus. Hizaʼi me döfi 68 M, mate Kaisar Nero, ba lö ara aefa daʼö mangawuli Vespasianus ba Roma tobali kaisaro. Iadaʼa, Titus zondröniaʼö ba wanuwö Yudea ba iʼohe mato 60.000 ndra saradadu.

Me baŵa si Önö 70 M, ifaretakö ndra saradadunia Titus ba wolobö eu ba mbanua Yudea. Aefa daʼö, lafasindro göli eu satarö ba zi fasui Yeruzalema. Faʼanau göli andrö fitu kilometer. Me baŵa si Siwa, ira saradadu Romawi andrö larabu ba latunu Yeruzalema awö gosalinia. Ladudugö fefu gara ba gosali, simane sibai nifaʼeleʼö Yesu ba zilalö. (Luka 19:43, 44) Moloʼö si no mutahö, ”sambua niʼoʼöfa ofeta matonga zuta niha si mate ba Yeruzalema hegöi ba mbanua böʼö ba soi daʼö”.

Me döfi 71 M, mangawuli Titus ba Gitalia ba lafalua gowasa ira niha Romawi ba wanemaʼö yaʼia. Fao fefu niha ba mbanua daʼö ba wangowasaini sambua faʼamöna sebua si no irai alua ba Roma.

Ato zamalua pawai ba lala ba Roma. Ahöli-höli dödö niha ba waʼoya harato niforomaʼö, köfa si no lakalaisi, famadumaisi fasuwöta, awö gama-gama si no larabu moroi ba gosali ba Yeruzalema.

Titus wangali Vespasianus tobali kaisaro me döfi 79 M. Hizaʼi dua fakhe aefa daʼö, mate Titus ba zi lö mudöna-döna. Akhinia Domitianus wangalinia ba iʼanemaiʼö ifasindro gapura kemenangan ba wanörö tödö si no ifalua Titus.

Ba ginötö daʼa, so ngaotu ribu niha si möi ba Roma ero röfi, ahöli-höli dödöra wamaigi Gapura Titus. So zangumaʼö wa daʼö sambua karya seni sebua. Tanö böʼö lamane wa daʼö dandra waʼapade wamatörö Romawi. So göi zi lö olifu me adudu Yeruzalema awö gosalinia.

Hizaʼi, ba niha si no tefahaʼö ba Zura Niʼamoniʼö, tohude nasa Gapura Titus andrö. No tobali ia samaduhuʼö si lö hede, tandra wa famaʼeleʼö Zura Niʼamoniʼö andrö tola mufaduhusi tödö, tefaudu, ba moroi khö Lowalangi.​—2 Fetero 1:19-21.