Fanahö döfi no sambua lala wamaigi salua ba zi so miföna. Faduhu dödö niha ba daʼa wa so lua-lua ndröfi, baŵa, hegöi planet ba waʼaurida. Lamane ira sanahö döfi, amuata hegöi faʼauri zi samösa niha ba zi so miföna tetatugöi moloʼö fetaro ngawalö zi so ba dalu mbanua me tumbu ia.

No so wanahö döfi andre iʼotarai me götö Mbabilona me föna, ba tehöngö manö nasa irugi iadaʼa. Moloʼö survei ba Amerika Serikat me döfi 2012, so sambua niʼotölu zangumaʼö wa fanahö döfi andrö no ”tefaudu ba waʼatua-tua” niha, ba 10 persen zangumaʼö wa ”tefaudu sibai” ia. Hadia atulö daʼö? Löʼö. Datatutunö hadia mbörö.

• Lö faʼabölö ba planet hegöi ba ndröfi ba wotatugöi faʼauri niha simane nitutunö ira sanahö döfi.

• Si toʼölönia, fanahö döfi andrö tenga ha ba zi samösa niha mufanandrösa ia, andrö wa tola manö laʼogunaʼö ia ba niha fefu.

• Mufalua wanahö döfi andrö moloʼö nifaduhusi tödö niha me föna, lamane wa ifasu-fasui gulidanö andre planet. Sindruhunia sa, luo nifasu-fasuinia.

• Na laʼandrö ba zi hadauga zanahö döfi enaʼö latahö waʼauri si samösa niha, no faböʼö-böʼö mbua gera-erara.

• Lamane ira sanahö döfi wa tola laföföʼö niha tobali 12 zodiak, moloʼö baŵa waʼatumbura. Hizaʼi, barö zi hauga ngaotu fakhe, no tebulö wetaro gulidanö irege lö tefaudu saʼae tanggal zodiak andrö ba ndröfi si tobali töi zodiak daʼö me italuʼi ia luo.

Lawaʼö wa ba zodiak tola oroma gamuata niha. Sindruhunia sa, hewaʼae so zi fagölö baŵa waʼatumbu, no faböʼö-böʼö gamuatara. Lö amakhaita gamuata zi samösa niha ba mbaŵa waʼatumbunia. No latatugöi ira sanahö döfi hewisa gamuata hegöi bua-bua zi samösa niha fatua lö niʼilara niha daʼö. Hadia tenga no fanahö-nahö tödö geluahania daʼö?

Iʼotarai me föna, asese möi niha wangandrö tolo khö zi faeta. Me mböröta, so zanahö salua ba zi so miföna, ifaigi ndroto-ndroto gurifö hegöi niha mazui inehegö hewisa na manga manu. So göi zamaigi bulu tesi mazui hamo kofi. Na iadaʼa, laʼogunaʼö kartu tarot, bola kristal, ludo, hegöi fakake tanö böʼö ba ”wombaso” salua ba zi samösa niha. Hadia tola mufaduhusi tödö daʼö? Tebai. Datatutunö hadia mbörö.

Tebulö-bulö manö nitutunö ba waetasa. Na faböʼö lala waetasa nifalua, faböʼö göi wanema linia hewaʼae fagölö wanofu hegöi tuhonia. Hewaʼae fagölö lala niʼogunaʼö, tola manö faböʼö wanema linia. Duma-dumania, möita ba zi darua niha si faeta, ba ”labaso” kartu tarot si fagölö ba wanutunö salua khöda ba zi so miföna. Na dali zindruhunia, fagölö menaʼö nitahöra. Hizaʼi, sasesenia no faböʼö-böʼö.

Ato niha si lö faduhu tödö ba lala niʼogunaʼö niha samalua faetasa hegöi ohitö dödöra. So zangumaʼö wa si toʼölönia lafaigi-faigi lagu mboto niha sanofu khöra, tenga sindruhu-ndruhu labaso kartu mazui bola kristal. Duma-dumania, manofu niha si toʼölö mamalua faetasa andrö ba niha sangondrasi yaʼia, ifondrondrongo wanema linia ba inehe-nehegö lagu mboto niha daʼö. Ba zi lö idöna-idöna, sindruhunia no iʼombakhaʼö ösa zanandrösa khönia niha daʼö, ba si toʼölönia niha samalua faetasa ifuli itötöi fefu niwaʼö niha daʼö. Na no faduhu dödö niha daʼö ba nitutunö niha si faeta andrö, awena laʼandrö gefe sebua.

Hulö no mutatugöi waʼaurida ba zi so miföna na mufalua wanahö döfi hegöi faetasa. Hadia atulö daʼö? Iʼombakhaʼö Sura Niʼamoniʼö wa tola tafili hadia ia nifaduhusida tödö mazui somasi ita tafalua. Itutunö göi wa tetatugöi waʼaurida ba zi so miföna moloʼö hadia nifilida.​—Yosua 24:15.

So dani tanö böʼö ba niha samosumange Lowalangi wa latimbagö wanahö döfi hegöi faetasa. Iʼelifi ngawalö wakelemusa Lowalangi. Imane Sura Niʼamoniʼö, ”Böi falukha ba khömi . . . si faeta ba he sanahö lawuo ba he sanaka [ulö] ba he si fakelemu; ba he sanaka, böʼönia, ba he samahede bekhu, ma bekhu waetasa, sanofu ba zi no mate, hadia ia. Me no sogoro Yehowa a dozi solau simanö.”​—5 Moze 18:10-12.