HADIA NO ÖTATUGÖI HEWISA WAʼAURIU BA ZI SO MIFÖNA? Ato niha si faduhu tödö wa no mufakhoi fefu zalua ba waʼaurira. Na so zi lö aʼozu lafalua, ha daʼa niwaʼöra, ”No sinehe khögu daʼö!”

Tanö böʼönia, afatö dödöra börö me laʼila wa tenga itugu sökhi gulidanö si lö atulö ba safaito andre. Te no laʼalui lala enaʼö lasöndra waʼohahau dödö, hizaʼi lö manö nasa tebato wasuwöta, faʼalösökhi, bencana alam, ba fökhö. Lamane tödöra, ’Hadia guna nasa wa uforege?’

Sindruhu sa na so zalua ba waʼauriu, tola manö molua-lua ia ba niʼera-erau. (Zangombakha 9:11) Hizaʼi, tola öfili hadia zomasiʼö öfalua sanandrösa ba waʼauriu ba zi so miföna. Iʼombakhaʼö Sura Niʼamoniʼö wa yaʼugö zotatugöi faʼauriu ba zi so miföna. Fatimbaisi atö niwaʼönia.

Börö me Moze zondröniaʼö iraono Gizaraʼeli me föna, imane khöra me arakhagö larugi Danö Amabuʼula, ”No ufaedo ira khöu waʼauri waʼamate, ba howu-howu ba fangelifi, ba no ufaedo khöu; ba faʼauri saʼae tuyu, enaʼö auriʼö, yaʼugö andrö, awö ngaʼötömö dania; omasiʼö Lowalangiu, Yehowa, ba fondrondrongo linia ba olemba khönia.”​—5 Moze 30:15, 19, 20.

”No ufaedo ira khöu waʼauri waʼamate, ba howu-howu ba fangelifi . . . ba faʼauri saʼae tuyu.”​—5 Moze 30:19

Atulö! No iʼefaʼö ndraono Gizaraʼeli Lowalangi ba wangosawuyu niha Miserai, itehegö khöra tobali niha niʼefaʼö ba larasoi waʼohahau dödö ba Danö Amabuʼula. Hizaʼi, lö iʼanemaiʼö alua khöra daʼö. Enaʼö latema howu-howu andrö, moguna ’latuyu waʼauri’. Hewisa lalania? ’Omasiʼö Lowalangiu, ba fondrondrongo linia ba olemba khönia.’

Simanö göi zi tola öfili ba ginötö andre, ba daʼö zötatugöi faʼauriu ba zi so miföna. Na öfili ba wangomasiʼö Lowalangi, öfondrondrongo linia, ba öʼolembai ia, eluahania öfili waʼauri si lö aetu ba gulidanö faradaiso. Hizaʼi, hadia manö zi farahu ba lala andre?

Faʼomasi no amuata siföföna niʼokhögö Lowalangi. Eheha niʼamoniʼö zamarou sinenge sotöi Yohane me imane, ”Lowalangi andrö no faʼomasi.” (1 Yohane 4:8) Andrö wa imane Yesu me lasofu khönia hadia ziföföna moroi ba goroisa, ”Omasiʼö Yehowa Lowalangiu moroi siʼaikö ba dödöu, nosou maʼasambua, ba era-erau maʼafefu.” (Mataiʼo 22:37) Moguna so dane-dane saro na omasi ita fahuwu khö Lowalangi Yehowa, tenga börö waʼataʼu mazui no sinangea taʼoʼö niwaʼönia hewaʼae lö taʼila hadia mbörö, hizaʼi börö waʼomasi. Hana wa tafili ba wangomasiʼö yaʼia?

Faʼomasi Yehowa ba niha gulidanö fagölö simane faʼomasi zatua ba ndraonora. Hewaʼae lö moʼahonoa, satua sebua faʼomasi lafahaʼö ndraonora, lafarou dödö, latolo, ba lafotu enaʼö ohahau dödöra ba mofozu waʼaurira. Hadia zulö nitötöna ndra satua? Nitötönara ba ndraono enaʼö laʼomasiʼö ira ba lafalua zi no mufahaʼö khöra, börö me si sökhi khöra daʼö. Simanö göi Namada soʼahonoa si so ba zorugo. Omasi ia na taʼandrö saohagölö ba ngawalö nifaluania khöda.

Ba li siföföna niʼogunaʼö ba wanura Sura Niʼamoniʼö, ngawua wehede ”fondrondrongo” eluahania ”oʼö”. Hadia tenga daʼö geluahania me tawaʼö ba ndraono side-ide, ”Fondrondrongo li zatuau”? Simanö göi, na tafondrondrongo li Lowalangi eluahania tafahaʼö ita khönia ba taʼoʼö niwaʼönia. Tebai tarongo hewisa sibai li Lowalangi, hizaʼi tola tafondrondrongo linia na tabaso Daromalinia, Sura Niʼamoniʼö, ba tafalua ba waʼaurida.​—1 Yohane 5:3.

Moguna sibai tafondrondrongo li Lowalangi. Andrö wa imane Yesu, ”Tenga ha ba gönia auri niha, hizaʼi ba ngawalö li si otarai mbawa Yehowa.” (Mataiʼo 4:4) Moguna manga ita ero maʼökhö, ba abölö moguna nasa waʼaboto ba dödö sanandrösa khö Lowalangi. Hadia mbörö? Itutunö Razo Selomo satua-tua, ”Baʼa-baʼa zino saʼae waʼatua-tua ba baʼa-baʼa zino [göi] ganaʼa, ba hare ba waʼaboto ba dödö, ba iʼorifi zi so yaʼia faʼatua-tua andrö.” (Zangombakha 7:12) Faʼatua-tua ba faʼaboto ba dödö moroi khö Lowalangi zolumöʼö ba sanolo yaʼita iadaʼa ba wangai angetula si fao faʼatua-tua, solohe yaʼita ba waʼauri si lö aetu ba zi so miföna.

Törö tödöu gamaedola Yesu ba duho si no tataluʼi me imane, ”No ide-ide mbawa göli ba ise-ise lala saekhu ba waʼauri andrö, ba lö ato zanöndra yaʼia.” (Mataiʼo 7:13, 14) Na tatörö lala simane daʼö, abölö sökhi na fao ita ba niha sangila lala andrö enaʼö tola tarugi zi möi ita. Simanö göi, böi tebulö ahatö ita khö Lowalangi na omasi ita tasöndra waʼauri si lö aetu. (Zinunö 16:8) Hadia geluahania?

Ero maʼökhö, oya halöwö sinangea ba somasi ita tafalua. Tola arörö ita ba daʼö irege lö inötöda woʼangeragö hadia niʼandrö Lowalangi khöda. Daʼö mbörö wa iʼamenesi ita Sura Niʼamoniʼö, ”Mifaigi sibai hewisa wanörömi lala andrö, böi sambö fangera-ngera, hizaʼi enaʼö simane niha satua-tua. Haogö wangogunaʼö inötö börö me so ita ba ngaluo si lö sökhi.” (Efeso 5:15, 16) Moguna taʼofönaiʼö Lowalangi ba waʼaurida na omasi ita lö tebulö ahatö khönia.​—Mataiʼo 6:33.

Lö hadöi si tola tafalua ba wombulöʼö salua khöda me föna, hizaʼi so zi tola tafalua enaʼö ohahau dödöda ba waʼaurida ba zi so miföna hegöi faʼauri niha niʼomasiʼöda. Itutunö Sura Niʼamoniʼö wa iʼomasiʼö ita Lowalangi Yehowa, Amada si so ba zorugo. Iʼombakhaʼö göi khöda hadia zomasi ia tafalua. Nehegö atö hadia nisura zamaʼeleʼö sotöi Mikha:

”No iwaʼö khöu, yaʼugö niha, hadia zi sökhi! Ba hadia goroisa Yehowa khöu, baero ba wolau satulö ba ba wangomasiʼö awöu ba faböi fayawa ndraʼugö ba wanörö lalamö, föna Lowalangiu?”​—Mikha 6:8.

Hadia ötemaʼö wogaoni moroi khö Yehowa ba wanörö lalania? Na ötema, ösöndra howu-howu sagötö faʼara. Yaʼugö samösa zotatugöi!