NIHA GULIDANÖ

Niwaʼö Zura Niʼamoniʼö: ’Tenga si lö eluaha wamazökhi Lowalangi ulidanö andre, hizaʼi enaʼö mowanua niha ba daʼö.’​—YESAYA 45:18.

ULIDANÖ

Niwaʼö Zura Niʼamoniʼö: ”Numalö zi sagötö niha ba tohare zi sagötö, hizaʼi lö tebulö so gulidanö sagötö faʼara.”​—SANGOMBAKHA 1:4.

ELUAHANIA: Moloʼö Sura Niʼamoniʼö, lö tefakiko gulidanö andre ba lö tebulö mowanua niha ba daʼö. Na simanö, hadia zalua na tohare waʼatua danö?

ANGERAGÖ ATÖ: Ifaedogö waʼatua danö Sura Niʼamoniʼö ba zalua me götö Noakhi. Me luo daʼö, no ”afönu gulidanö faʼalösökhi”. (1 Moze 6:13) Börö daʼö, iʼasogö molö sabölö-bölö Lowalangi ba wangohori niha si lö sökhi. Hizaʼi, ilumöʼö Noakhi hegöi ösi nomonia börö me niha satulö tödö ira. Imane Sura Niʼamoniʼö, ’Alua molö sabölö-bölö mböröta ba wamakiko ulidanö me luo daʼö.’ (2 Fetero 3:6) Hizaʼi, hadia zi tehori? Niha si lö sökhi, tenga ulidanö. Börö daʼö, na itutunö Sura Niʼamoniʼö sanandrösa ba wamakiko ulidanö, lö manandrösa daʼö ba planet andre. Hizaʼi, manandrösa daʼö ba wangohori niha si lö sökhi hegöi abula dödö salua ba gulidanö.

ABULA DÖDÖ HEGÖI FAʼALÖSÖKHI

Niwaʼö Zura Niʼamoniʼö: ”Hatö maʼifu tö ba lö hadöi saʼae niha si lö sökhi; na öfaigi nahania, ba lö yaʼia saʼae. Hizaʼi, niha si so fangide-ngideʼö zokhö tanö dania, ba owua-wua dödöra börö me fahöna waʼatulö.”​—SINUNÖ 37:10, 11.

ELUAHANIA: Sindruhu sa, no tehori waʼalösökhi me Anönö Danö Idanö ba götö Noakhi. Hewaʼae simanö, ifuli zui laʼasogö gabula dödö ba niha böʼö ira niha si lö sökhi. Hizaʼi, ba zi lö ara tö, hasambalö ihori waʼalösökhi andrö Lowalangi. Tefaudu daʼö ba niwaʼö ba ayati no mege wa ”lö hadöi saʼae niha si lö sökhi”. Ba wangohori faʼalösökhi si so ba gulidanö andre, iʼogunaʼö Wamatörönia Lowalangi, yaʼia daʼö amatöröwa si so ba zorugo samatörö niha satulö tödö.

ANGERAGÖ ATÖ: Hadia omuso dödö ndra samatörö ba gulidanö andre ba wotuhini Famatörö Lowalangi? Moloʼö Sura Niʼamoniʼö, löʼö. Börö me lö khöra faʼatua-tua, hasambalö lalawa Wamatörö Lowalangi. (Sinunö 2:2) Hadia lua-luania? Hasambalö tehori wamatörö niha gulidanö, ba ha Famatörö Lowalangi ”zi lö tebulö irugi zi lö aetu”. (Danieli 2:44) Hizaʼi, hana wa lö tola löʼö muhori wamatörö niha gulidanö?

Niwaʼö Zura Niʼamoniʼö: ”Lö faʼabölö ba niha ba wotatugöi bekania.”​—YEREMIA 10:23.

ELUAHANIA: Me tewöwöi niha gulidanö, lö nibeʼe khöra waʼabölö ba wamatörö faʼaurira samösa. Lö mofozu ira ba wamatörö niha böʼö hegöi ba wangasiwai abula dödöra.

ANGERAGÖ ATÖ: Itutunö Britannica Academic wa lö hadöi famatörö si tola ”mangasiwai abula dödö salua ba zi sagörö ulidanö, simane faʼanumana, faʼolofo, fökhö, bencana alam, faʼalösökhi, hegöi fasuwöta”. Imane nasa, ”So ösa niha . . . si faduhu tödö wa tola teʼasiwai gabula dödö andrö na muʼosambuaʼö fefu wamatörö ba gulidanö andre.” Hizaʼi, börö me niha si lö moʼahonoa zi tobali samatörö, lö khöra faʼabölö ba wangasiwai abula dödö si no mututunö moroi yawa andrö. Ha Famatörö Lowalangi zi tola mangasiwai fefu gabula dödö salua ba gulidanö sagötö faʼara.

Börö daʼö, moloʼö Sura Niʼamoniʼö, lö moguna ataʼu ita na tohare waʼatua danö, yaʼia daʼö fangohori niha si lö sökhi ba zi sagörö ulidanö. Sindruhunia, no sinangea tadöna-döna waʼalua daʼö börö me hasambalö ibulöʼö gulidanö satua andre Lowalangi tobali ulidanö si bohou!

Hawaʼara alua daʼö? Fanema linia so ba artikel aefa daʼa.