Hawaʼara Tohare Waʼatua Danö?
Simane niʼilada ba artikel si no tataluʼi, me itutunö Sura Niʼamoniʼö sanandrösa ba waʼatua danö, tenga daʼö geluahania wa tehori gulidanö mazui niha sowanua ba daʼö. Hizaʼi, nihori yaʼia daʼö amatöröwa niha gulidanö si lö sökhi hegöi abula dödö salua ba götöda andre. Na simanö, hadia no ifatunö Sura Niʼamoniʼö hawaʼara alua daʼö?
ANGERAGÖ NIWAʼÖ YESU SANANDRÖSA BA WAʼATUA DANÖ:
”Andrö böi miförö börö me lö miʼila mbaŵa hegöi inötö.”—MATAIʼO 25:13.
”Andrö böi miförö, miʼangelama börö me lö miʼila ginötö si no mutatugöi andrö.”—MAREKO 13:33.
No itatugöi Lowalangi hawaʼara tohare gamozua götö daʼa. Sindruhu sa, samösa lö sangila ba gulidanö andre ’mbaŵa hegöi inötönia’. (Mataiʼo 24:36) Hizaʼi, tola taʼila wa lö ara tö tohare gamozua andrö. No itutunö Yesu khö ndra nifahaʼönia hadia manö zalua si tobali tandra wa no ahatö waʼatua danö.
TANDRA
Imane Yesu, ”Maoso dania zi sambua soi isuwö soi böʼö, simanö göi zalua ero sambu-sambua famatörö. Alua lofo sabölö-bölö misa hegöi duru danö.” Fefu zalua andrö no tobali tandra ”gamozua götö daʼa”. (Mataiʼo 24:3, 7) Itutunö göi wa hasambalö alua ”ngawalö wökhö”. (Luka 21:11) Moloʼö yaʼugö, hadia no alua ngawalö zi no ifaʼeleʼö Yesu andrö?
Iadaʼa, ato niha si tefakao börö wasuwöta, faʼolofo, duru danö, hegöi ngawalö wökhö. Duma-dumania, me döfi 2004, so ndruru danö sabölö-bölö ba Samudra Hindia irege alua tsunami. Lua-luania, so mato 225.000 niha si mate. Ba zi tölu fakhe, so mato 6,9 zuta niha si mate ba zi sagörö ulidanö börö pandemi COVID-19. No iwaʼö Yesu wa salua andrö zangoromaʼö wa no ahatö gamozua götö daʼa.
”NGALUO SAFURIA”
Itutunö Sura Niʼamoniʼö wa inötö fatua lö tohare waʼatua danö mufotöi ia ”ngaluo safuria”. (2 Fetero 3:3, 4) Iwaʼö 2 Timoteo 3:1-5 wa itugu lö sökhi gamuata hegöi nifalua niha ba ngaluo safuria. (Faigi kotak ” Fatua Lö Tohare Waʼatua Danö”.) Hadia öʼila ba ginötö andre niha sangoromaʼö fakhögusa, samaʼuʼu, samalua si lö sökhi, hegöi si lö mangomasiʼö awönia? Daʼa göi dandra wa no ahatö waʼatua danö.
Hadia ara awai nasa ngaluo safuria? Moloʼö Sura Niʼamoniʼö, ”lö ara tö”. Aefa daʼö, ifakiko dania ”niha samakiko ulidanö” Lowalangi.—Famaʼeleʼö 11:15-18; 12:12.
NO AHATÖ GULIDANÖ FARADAISO!
No itatugöi Lowalangi hawaʼara ihori niha si lö sökhi hegöi ngawalö nifaluara. (Mataiʼo 24:36) Hizaʼi, so duria si sökhi, yaʼia daʼö ’lö omasi Lowalangi na tekiko fazamösa’. (2 Fetero 3:9) Ibeʼe khöda ginötö ba wamahaʼö yaʼita sanandrösa ba gohitö dödönia hegöi ba woloʼö niwaʼönia. Hadia mbörö? Börö me omasi ia na teʼorifi ita moroi ba gulidanö si lö ara tö ifakiko andre ba auri ita ba gulidanö si bohou, yaʼia daʼö ba Waradaiso.
No itatugöi Lowalangi enaʼö tefahaʼö fefu niha ba zi sagörö ulidanö. Ohitö dödönia yaʼia daʼö enaʼö laʼila hewisa lala ba wogamö ulidanö si bohou barö Wamatörönia. Iwaʼö Yesu wa hasambalö teturiaigö duria somuso dödö sanandrösa ba Wamatörö Lowalangi ”ba zi sagörö ulidanö misa”. (Mataiʼo 24:14) Miliar za niʼogunaʼö ndra Samaduhuʼö Yehowa ba zi sagörö ulidanö ba wamahaʼö niha ba Zura Niʼamoniʼö. Iwaʼö Yesu wa tefalua halöwö fanuriaigö ba zi sagörö ulidanö fatua lö tohare waʼatua danö.
Hatö maʼifu tö ginötö nitehegö ba niha ba wamatörö. Hizaʼi, so duria somuso dödö, yaʼia daʼö tola teʼorifi ndraʼugö ba auri ba gulidanö Faradaiso si no ifabuʼu Lowalangi. Artikel aefa daʼa zanutunö hewisa enaʼö tola auri ndraʼugö ba gulidanö si bohou.
Famaʼeleʼö Yesu sanandrösa ba ”ngaluo safuria” tobali dane-dane khöda ba wangokhögö fanötöna
Te Göi Adöni Dödöu
MANURIAIGÖ
Hawaʼara Tohare Wamatörö Lowalangi ba Gulidanö?
So ösa ndra nifahaʼö Yesu si lö faröi zomasi mangila hawaʼara tohare Wamatörö Lowalangi. Hadia wanema li nibeʼenia ba wanofura?
