No itutunö khöda artikel si no tataluʼi wa lö ara tö ihori niha si lö sökhi Lowalangi awö gabula dödö niʼasogöra maʼafefu. Tola faduhu dödöda wa hasambalö alua daʼö. Hadia mbörö? Börö me no ifabuʼu Taromali Lowalangi, Sura Niʼamoniʼö:

”Si taya nösi gulidanö.”​—1 YOHANE 2:17.

Tola faduhu dödöda wa so zi teʼorifi dania börö me no ifabuʼu göi ayati andrö:

”Soloʼö somasi Lowalangi auri sagötö faʼara.”

Börö daʼö, enaʼö teʼorifi ita, moguna tafalua hadia zomasi Lowalangi. Enaʼö taʼila hadia zomasi Lowalangi, moguna taʼokhögö waʼaboto ba dödö sanandrösa khönia.

Imane Yesu, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu si ha sambua.” (Yohane 17:3) Enaʼö teʼorifi ita sagötö faʼara, moguna ’aboto ba dödöda’ sanandrösa khö Lowalangi. Eluahania, lö ibönö na ha asala tafaduhuʼö wa so Lowalangi mazui aboto ba dödöda zindruhu sanandrösa khönia. Moguna tobali ita si fahuwu khönia. Hulö simane na omasi ita fahuwu ba niha, moguna tabeʼe ginötöda khöra. Simane daʼö göi na omasi ita fahuwu khö Lowalangi, moguna tabeʼe ginötöda ba wamahaʼö yaʼita ba Zura Niʼamoniʼö enaʼö aboto ba dödöda sanandrösa khönia. Angeragö atö zindruhu si tola taʼila moroi ba Zura Niʼamoniʼö sanolo yaʼita ba wangaʼaroʼö fahuwusada khö Lowalangi.

Enaʼö terorogö waʼaurida, moguna manga ita ero maʼökhö. Hizaʼi, imane Yesu, ”Tenga ha ba gönia auri niha, hizaʼi ba ngawalö li si otarai mbawa Yehowa.”​—Mataiʼo 4:4.

Ba götöda andre, tola tasöndra wehede Yehowa ba Zura Niʼamoniʼö. Na öfahaʼö ndraʼugö ba daʼö, tola öʼila hadia nifalua Lowalangi ba götö föna, ba götöda iadaʼa, hegöi ba zi so miföna.

Tola manö omasi ita tafalua zomasi Lowalangi, hizaʼi abua khöda wamöhöli amuata si fatuwu khönia. Hadia zinangea öfalua na alua khöu zimane daʼö? Moguna öʼokhögö waʼaboto ba dödö sanandrösa khö Lowalangi ba öʼandrö khönia wanolo.

Angeragö atö zalua khö zi samösa ira alawe sotöi Sakura b si no irai mamalua amuata wohorö. Me ibörögö ifahaʼö ia ba Zura Niʼamoniʼö, iʼila goroisa Lowalangi wa moguna ’iʼaliokö wanimba amuata wohorö’. (1 Korindro 6:18) Tola iböhöli gamuatania si lö sökhi andrö Sakura börö me iʼandrö waʼabölö moroi khö Lowalangi. Hizaʼi, moguna nasa iforege ba wolawa fondrönisi dödö. Imane Sakura, ”Na tumbu ba gera-eragu ngawalö zoʼamakhaita ba gamuata wohorö, lö ubiniʼö wanutunö khö Yehowa hadia nirasoigu andrö. Aboto ba dödögu wa tebai ulawa wondrönisi dödö na uʼodaligö waʼabölögu samösa. Börö me mangandrö ndraʼo khö Yehowa, itugu ahatö ndraʼo khönia.” Simane Sakura, so zuta niha somasi mamahaʼö yaʼira sanandrösa khö Lowalangi. Ibeʼe khöra waʼabölö Lowalangi enaʼö tola labulöʼö waʼaurira ba laʼomusoiʼö dödönia.​—Filifi 4:13.

Na itugu aboto ba dödöu Lowalangi, tola göi itugu ”aboto ba dödö Lowalangi” wa si fahuwu sebua böli khönia ndraʼugö. (Galatia 4:9; Sinunö 25:14) Buania, tola auri ndraʼugö ba gulidanö si bohou. Hizaʼi, hewisa sibai gulidanö si bohou andrö? Artikel aefa daʼa zanutunö khöda fanema linia.