Ba zi lö ara tö, tefasindro ba gulidanö Wamatörö Lowalangi si so ba zorugo. Na no alua daʼö, hasambalö tobali nahia safönu faʼomuso dödö gulidanö andre, so wahasara dödö ba niha fefu ba lafalua halöwö si sökhi sangaʼasogö khöra faʼahono dödö. Yesu Keriso nifataro Lowalangi ba wamatörö ulidanö. Iʼameʼegö tödö sibai nono mbanuania Yesu tenga simane ira samatörö ba götöda iadaʼa. Mamatörö ia si fao faʼomasi, faʼasökhi dödö, faʼahakhö dödö, hegöi faʼatulö.​—Yesaya 11:4.

Ba gulidanö si bohou dania, lö saʼae tefabali-bali niha börö soira mazui madora. (Famaʼeleʼö 7:9, 10) Fefu niha hasambalö laʼomasiʼö Lowalangi hegöi awöra niha, ba falulu fohalöwö ira si fao fahasara dödö ba wondrorogö ulidanö, simane ohitö dödö Lowalangi ba wamobörö.​—Sinunö 115:16.

Na Famatörö Lowalangi zamatörö ulidanö andre, hasambalö iheta fefu ngawalö bencana alam Somböi yaʼita. (Sinunö 24:1, 2) Me so Yesu ba gulidanö, no irai ifahono mbade sabölö-bölö ba wangoromaʼö hadia zi tola ifalua börö waʼabölö Lowalangi. (Mareko 4:39, 41) Barö wamatörö Keriso, lö saʼae moguna ataʼu niha ba bencana alam. Baero daʼö, so waʼatulö ba gotalua niha hegöi urifö ba lö saʼae tafakiko gulidanö andre.​—Hosea 2:18.

Hasambalö moʼahonoa mboto niha gulidanö maʼafefu. Lö mofökhö ira, atua, mazui mate. (Yesaya 35:5, 6) Toröi ira ba nahia si sökhi sibai ba si lö taʼunö, simane Kabu Edena me mböröta. Fahöna göi mbua zinanö ba gulidanö si bohou ba tebönökhi mbalazo ngawalö zauri ba gulidanö. (1 Moze 2:9) Fefu niha sauri ba gulidanö Faradaiso hasambalö ”abuso dania [ira] wemanga roti” simane iraono Gizaraʼeli me föna.​—3 Moze 26:4, 5.

Fefu niha si so barö Wamatörö Lowalangi, faoma laforomaʼö waʼasökhi dödö hegöi faʼatulö ba nawöra. Lö hadöi saʼae fasuwöta, lö laʼogunaʼö kuasora ba zi lö atulö, ba lö saʼae basaki wangalui soguna. Ifabuʼu Sura Niʼamoniʼö, ”Dozi niha modadao ira ba lumö nagu khöra zamösana hegöi ba lumö geu ara; lö hadöi sametaʼu yaʼira.”​—Mikha 4:3, 4.

Ero sambu-sambua ösi nomo toröi ira ba nomora samösa ba lö so so dödöra alai na lafofanö ira moroi ba daʼö. Hasambalö latema mböli gölö ba ngawalö halöwö nifaluara. Simane niwaʼö Zura Niʼamoniʼö, ’tenga zaya-zaya gölö waʼamarase’ niha sauri ba gulidanö si bohou.​—Yesaya 65:21-23.

Ifabuʼu Sura Niʼamoniʼö, ”Anönö danö faʼaboto ba dödö sanandrösa khö Yehowa.” (Yesaya 11:9) Fefu niha si so barö Wamatörö Lowalangi, lafahaʼö ira sanandrösa ba waʼatua-tua sahöli-höli dödö niʼokhögö Zomböi yaʼita, Yehowa, hegöi sanandrösa ba ngawalö niwöwöinia si sökhi sibai. Lö laʼogunaʼö waʼaboto ba dödö niʼokhögöra andrö ba wamazökhi fakake wasuwöta mazui ba wamaʼala niha böʼö. (Yesaya 2:4) Hizaʼi, lafahaʼö ira ba wangokhögö faʼatulö ba nawöra niha hegöi ba wondrorogö ulidanö.​—Sinunö 37:11.

No ihaogö ifaʼanö gulidanö andre Lowalangi enaʼö owua-wua dödöda toröi ba daʼö ero maʼökhö. Omasi ia na auri ita ba gulidanö sagötö faʼara. (Sinunö 37:29; Yesaya 45:18) Enaʼö alua gohitö dödönia andrö, hasambalö ”iheta waʼamate sagötö faʼara”. (Yesaya 25:8) Ifabuʼu Sura Niʼamoniʼö, ”Iʼosi dawa hörö fefu ba höröra. Lö hadöi saʼae faʼamate, faʼabu dödö, fege-ege, mazui fökhö.” (Famaʼeleʼö 21:4) Hasambalö ibeʼe waʼauri si lö aetu ba niha niʼorifinia me ifakiko gulidanö si lö sökhi andre hegöi ba niha nisusuginia ba gulidanö si bohou, si tebai muʼerai faʼato.​—Yohane 5:28, 29; Halöwö Zinenge 24:15.

 Iadaʼa, so hauga zuta niha ba zi sagörö ulidanö samaʼanö yaʼira enaʼö tola auri ira ba gulidanö si bohou. Hewaʼae lö moʼahonoa ira, laforege wangomusoiʼö tödö Lowalangi. Hewisa wamaluara daʼö? Lafahaʼö ira sanandrösa khö Lowalangi Yehowa hegöi Yesu Keriso nifatengenia.​—Yohane 17:3.

Alui hewisa lala enaʼö teʼorifi ndraʼugö na muhori gulidanö andre dania ba auri ndraʼugö ba gulidanö si bohou si lö ara tö tohare. Fahaʼö ndraʼugö ba Zura Niʼamoniʼö khö zi samösa Samaduhuʼö Yehowa, miʼogunaʼö mbuku Lala ba Wanöndra Faʼohahau Dödö Sagötö Faʼara!