Böi AETU Dötönaföu
BA DUHO si no tataluʼi, oroma wa tola manö taya dötönaföda ba waʼauri börö me oya gabula dödö. Ba ginötö ötaögö gabula dödöu samösa, te manofu-nofu ndraʼugö hadia ebua mböli waʼauri andre ba hadia so zoʼameʼegö tödö yaʼugö ma löʼö. Yafaduhu dödöu, iʼameʼegö tödö ndraʼugö Lowalangi. Iʼomasiʼö sibai ndraʼugö.
Imane sanura Sinunö 86 ba wangoromaʼö faʼafaduhu dödönia khö Lowalangi, ”Uʼangaröfili ndraʼugö, na baŵa waʼafökhö khögu, öfondrondrongo sa ligu.” (Zinunö 86:7) Te manofu ndraʼugö, ’Hewisa wamondrondrongo Lowalangi ligu ”na baŵa waʼafökhö”?’
Hewaʼae lö iʼanemaiʼö iʼasiwai gabula dödöu Lowalangi, ifaduhuʼö khöda Taromalinia, Sura Niʼamoniʼö, wa tola ibeʼe khöu waʼohahau dödö ba wanaögö yaʼia, ”Böi mibusi tödö hadia ia, mibokai khö Lowalangi ba wangandrö si fao fangalulu na so zabu dödömi ba ngawalö hadia ia, yafao wangandrö saohagölö, irorogö dödömi awö gera-erami faʼohahau dödö andrö khö Lowalangi, sabölö moroi ba gera-era niha fefu.” (Filifi 4:6, 7) Angeragö ayati Zura Niʼamoniʼö andre samaduhuʼö khöda wa sindruhu-ndruhu iʼameʼegö tödö ita Lowalangi.
Sindruhu-ndruhu Iʼameʼegö Tödö Ita Lowalangi
”Sambua na so [ziliwi] niʼosiwawöi Lowalangi. . . . Abölö tohude ami moroi ba wofo andrö.”—Luka 12:6, 7, nisura ba gahe zura.
ANGERAGÖ: Ato niha si lö moʼameʼegö tödö wofo side-ide. Hizaʼi, iʼameʼegö tödö ira Lowalangi. Lö taya ba duduma hörönia fefu ziliwi side-ide; no sebua böli wofo andrö ba wamaiginia. Mendrua manö niha gulidanö, abölö ebua mbölira föna Lowalangi moroi ba ziliwi. Niha andrö omböila dangania sabölö tohude ba gulidanö. Mufazökhi ira ’famaedo’ Lowalangi. Tola laʼokhögö ba laforomaʼö gamuata si sökhi simane niʼokhögönia.—1 Moze 1:26, 27.
”He Yehowa, ösekhegö ndraʼo ba no aboto ba dödöu ndraʼodo. . . . Ösöndra gera-eragu . . . Tandraigö ndraʼodo, ba yaʼaboto ba dödöu gera-eragu.”—Zinunö 139:1, 2, 23.
ANGERAGÖ: Aboto ba dödö Lowalangi hewisa ndraʼugö sindruhunia. Iʼila hadia nösi dödöu si tobini hegöi niʼera-erau. Hewaʼae lö aboto ba dödö niha böʼö gabula dödöu awö waʼaombö-aombö dödöu, hasambalö iʼameʼegö tödö ndraʼugö Lowalangi ba omasi ia itoloʼö. Daʼö zameʼe khöda famarou dödö ba waʼauri andre.
Itolo Ndraʼugö Lowalangi ba Ibeʼe Khöu Wanuturu Lala
”He Yehowa, fondrondrongo wangandrögu, akha irugi dögi dalingau weʼaogu andre. . . . Beʼe mbörö dalingau khögu, na uʼangaröfili ndraʼugö; taʼi-taʼi fondrondrongo khögu. . . . Me no ifondrondrongo wangandrö zi numana.”—Zinunö 102:2, 3, 18.
ANGERAGÖ: Iʼotarai me awena so gabula dödö ba niha gulidanö, no itöngöni nidanö höröra Yehowa. (Zinunö 56:9) Simanö göi nidanö höröu. Lö olifu Lowalangi fefu wamakao nirasoimö hegöi idanö höröu börö me iʼomasiʼö sibai ndraʼugö.
”Böi tokeaʼö, Lowalangiu sa ndraʼodo: uʼabeʼeʼö ndraʼugö, ba utoloʼö . . . Yaʼodo saʼae, Yehowa, Lowalangimö andrö . . . sangumaʼö khöu: Böi busi dödöu, utoloʼö.”—Yesaya 41:10, 13.
ANGERAGÖ: Hasambalö itolo ndraʼugö Lowalangi. Na tebai ötaögö gabula dödö andrö, tola itolo ndraʼugö.
So Dötönafö si Sökhi ba zi So Miföna
”Simanö sa waʼomasi Lowalangi nösi gulidanö, itehegö Nononia si ha sambua, enaʼö lö tekiko dozi samati khönia, ba lasöndra waʼauri si lö aetu.”—Yohane 3:16.
ANGERAGÖ: Iʼomasiʼö sibai ndraʼugö Lowalangi, ba itehegö Nononia, Yesu, tobali höli salahimö. Börö höli andre wa so dötönaföu ba zi so miföna, ohahau dödöu ba tola auri ndraʼugö irugi zi lö aetu. *
Hewaʼae abu sibai dödöu ba hulö zarakhagö aetu dötönaföu ba waʼauri, sökhi na öhaogö wamahaʼö yaʼugö ba Daromali Lowalangi ba ödouʼö wamatiu ba dötönafö si no ifabuʼu Lowalangi. Na öfalua daʼö, tola ohahau dödöu ba faduhu dödöu wa ebua sibai mböli waʼauri andre.
^ Enaʼö öʼila danö böʼö nasa hewisa wanema bua moroi ba höli nibeʼe Yesu, faigi video Manörö Tödö Faʼamate Yesu ba www.pr418.com/nia. Faigi ba SANANDRÖSA KHÖMA > FANÖRÖ TÖDÖ.
Te Göi Adöni Dödöu
SANANDRÖSA KHÖMA
Hana Wa Moguna Tafahaʼö Ita ba Zura Niʼamoniʼö?
No ihenaigö Sura Niʼamoniʼö wanema li ba wanofu-nofu sabölö moguna ba waʼauri niha si zuta faʼato ba zi sagörö ulidanö. Hadia omasi öʼila wanema linia?
MANURIAIGÖ
Bua Nitemau me Iʼameʼegö Tödö Ndraʼugö Lowalangi
Sura Niʼamoniʼö zanolo yaʼita ba wangokhögö famati saro ba nifabuʼu Lowalangi ba zi so föna.
MANURIAIGÖ
Buala Lowalangi Fondrege Zebua—Hadia Mbörö Wa Ebua Sibai Mbölinia?
Hadia manö mbörö wa tola faehu mbuala andrö moroi ba danö böʼö? Na taʼangerönusi daʼö tola möi fondrouʼö woʼameʼegöda tödö höli.
