TOLA fawuka waʼauri zi samösa niha na faröi khönia ngambatönia. Hewaʼae simanö, so ösa niha si tola mangefaʼö sala ngambatönia si no mamalalini era-era ba laforege wangokhögö mangawuli fongambatö si sökhi. * Hizaʼi, hewaʼae tola larorogö wongambatöra aefa daʼö hegöi na löʼö, sindruhunia foʼomo si lö fasala hasambalö larasoi waʼafökhö ba faʼabu dödö ba ginötö faröi khöra ngambatöra. Hewisa lala enaʼö tola lataögö gabula dödöra andrö?

Ato woʼomo si lö fasala zanöndra fondrara dödö ba Mbuku Niʼamoniʼö hewaʼae afökhö dödöra me no iröi ira foʼomora. Aboto ba dödöra wa iʼameʼegö tödö dawa höröra Lowalangi ba ahakhö dödönia ira.​—Maleakhi 2:13-16.

”Ba waʼoya ngawalö waʼabu dödögu andrö, ba iʼokafui dödögu fondrara tödö andrö khöu.”​—Zinunö 94:19.

Itörö tödö Bill, ”Me ubaso ayati daʼö, ukhalaigö wa ihaogö iʼokafui dödögu Yehowa, simane faʼahakhö dödö nama khö nononia.”

”Ba zebua tödö ebua dödöu.”​—Zinunö 18:26.

Imane Carmen me no iröi ia foʼomonia ba zi hauga waŵa, ”No faröi khögu woʼomogu, hizaʼi faduhu dödögu wa lö iröi ndraʼo Yehowa. Lö afatö dödögu ibeʼe.”

”Böi mibusi tödö hadia ia, mibokai khö Lowalangi ba wangandrö si fao fangalulu na so zabu dödömi ba ngawalö hadia ia, irorogö dödömi awö gera-erami faʼohahau dödö andrö khö Lowalangi.”​—Filifi 4:6, 7.

Imane Sasha, ”Asese ubaso ayati daʼa. Börö me lö uböhöli wangandrö, ibeʼe khögu waʼohahau dödö Lowalangi.”

Ba wamobörö, niha si no mututunö moroi yawa no mege, larasoi waʼide-ide dödö. Hizaʼi, faduhu dödöra khö Lowalangi Yehowa ba lasöndra wamarou dödö me labaso Daromalinia. No irasoi daʼa Bill, ”Börö wamati wa tola moʼeluaha waʼaurigu hewaʼae hulö na tebai muʼazökhi ba mböröta. Sagötö me utörö ’mbawa danö andrö, si göna lumö waʼamate’, lö faröi khögu Lowalangi.”​—Zinunö 23:4.