NA NO mate niha niʼomasiʼöu, te faböʼö-böʼö nirasoimö. Tola manö örasoi waʼabu dödö, hulö zi lö awö, ba lö faʼabölöu. Tola göi mofönu ndraʼugö, itahigö ndraʼugö tödömö, ba so khöu waʼataʼu. Aombö dödöu hadia so dötönaföu ba waʼauri andre mazui löʼö.

Na mate niha niʼomasiʼöu, lö fasala na ihawui ndraʼugö faʼabu dödö hewaʼae tenga ha ba zi sabata. Daʼö dandra wa sindruhu-ndruhu öʼomasiʼö niha daʼö. Hizaʼi, hadia tola ösöndra wondrara dödö ba gabula dödömö andrö?

Na lö aetu örasoi wangabu dödö, tola öʼoʼö wanuturu lala andre ba wanöndra fondrara dödö:

BÖI AILA NDRAʼUGÖ BA WANGOROMAʼÖ FAʼABU DÖDÖ

Faböʼö-böʼö lala zi samösa niha ba wamaehagö faʼabu dödönia, simanö göi ginötö niʼogunaʼönia. Na meʼe ndraʼugö, tola örasoi maʼifu waʼahono dödö. Imane Vanessa si no mututunö ba wamobörö, ”Ulau meʼe; omasido na aheta waʼabu dödögu.” Imane Sofía me mate nakhinia ono alawe ba zi lö mudöna-döna, ”Afökhö sibai woʼangeragö salua andrö. Hulö na mubokai ba musasai zokho si lö nasa oköli, tebai utaha waʼafökhö, hizaʼi tola döhö.”

TUTUNÖ HADIA NIRASOIMÖ HEGÖI NIʼERA-ERAMÖ

No si toʼölö na itaria lö omasiʼö so niha ba zi fasuimö. Faʼabu dödö börö waʼamate andrö no sambua  noro sabua, na ha yaʼugö zoluʼi. Itörö tödö Jared si no 17 fakhe, hadia nifaluania me mate bapania, ”Ututunö ba niha böʼö hadia nirasoigu. Sindruhunia ambö uʼila ufaehagö nösi dödögu, hizaʼi omuso dödögu me tola fahuhuo ndraʼo khöra.” Irasoi göi mbua tanö böʼö Janice, si no mututunö ba duho siföföna. Imane, ”Terara sibai dödögu me fahuhuo ndraʼo ba niha böʼö. Aboto ba dödöra hadia nirasoigu ba so nawögu sanolo yaʼo ba wanaögö abula dödö.”

TEMA WANOLO

Imane dokter psikolog, ”Na so niha si göna abula dödö börö waʼamate niha niʼomasiʼönia, ba na omasi itema wanolo moroi khö ndra awönia hegöi si fahatö khönia, tola aoha khönia ba wanaögö hegöi ba wangasiwai abula dödönia andrö.” Fatunö ba niha si fahuwu khöu hadia zi tola lafalua ba wanolo yaʼugö. Omasi ira latolo ndraʼugö, hizaʼi te lö laʼila hewisa wamalua yaʼia.​—Gamaedola 17:17.

ONDRASI LOWALANGI

Imane Tina, ”Me mate woʼomogu ba zi lö mudöna-döna börö kanker, lö uʼila ututunö khönia saʼae gabula dödögu, faʼaombö dödögu, awö nirasoigu. Khö Lowalangi ututunö fefu! Ero maʼökhö uʼandrö khönia wanolo enaʼö tola ufalua halöwögu simane si toʼölö. Lö uʼila uzara-zara wanutunö hawaʼoya wanolo nitemagu moroi khö Lowalangi.” Imane Tarsha si 22 fakhe me mate mamania, ”Usöndra wondrara dödö me ubaso Zura Niʼamoniʼö ero maʼökhö. So ba daʼö wamarou dödö si tola uʼangerönusi.”

KHALAIGÖ WANUSUGI

Itohugö Tina wanutunö, ”Hewaʼae so wanötöna ba wanusugi niha si no mate, lö terara dödögu ba wamobörö. Moguna khögu woʼomogu, simanö göi ndraonogu ono matua si datölu, moguna khöra namara. Iadaʼa, no öfa fakhe numalö ginötö ba lö tebulö aro dödögu ba wanötöna andrö. Fanusugi andrö no amaedola lemba-lembagu ba waʼauri. Börö me ukhalaigö wa ifuli falukha ndraʼaga dania, ohahau dödögu ba urasoi waʼowua-wua dödö!”

Te lö iʼanemaiʼö alö waʼabu dödömö. Hizaʼi, tola faduhu dödöu ba nirasoi Vanessa. Imane, ”Ba wamobörö, öwalinga tebai alö waʼabu dödöu, hizaʼi itugu ara itugu taya manö sa dania ia.”

Böi olifu ndraʼugö, hewaʼae lö aetu itörö tödöu niha niʼomasiʼömö andrö, lö tebulö wa ebua mböli waʼaurimö. Börö waʼomasi Lowalangi, tola nasa örasoi wahuwusa si sökhi ba so dötönaföu ba zi so miföna. Ba zi lö ara tö, isusugi dania niha si no mate andrö Lowalangi. Omasi ia na öfuli ötalagui niha niʼomasiʼömö. Tola döhö saʼae dania waʼabu dödömö andrö sagötö faʼara!