HADIA no irai abu sibai dödöu irege omasiʼö mate? Na simanö, tatu aboto ba dödöu hadia nirasoi Adriana. No göna ia depresi klinis, yaʼia daʼö fökhö faʼaombö-aombö dödö sabölö-bölö ero inötö, faʼabu dödö, ba lö fanötöna.

Angeragö zalua khö ndra matua sotöi Kaoru moroi ba Jepang. Yaʼia zondrorogö satuania si no mofökhö ba si no atua. Itutunö, ”Me luo daʼö, marasedo sibai wohalöwö, hulö nifaso ndraʼo. Afeto ba mbawagu gö ba lö uʼila mörö. Ibörögö tumbu ba dödögu wamunu yaʼo enaʼö taya gabula dödögu.”

Imane ira matua sotöi Ojebode moroi ba Nigeria, ”Lö manö aetu waʼabu dödögu irege ulau meʼe. Lua-luania, uʼalui lala wamunu yaʼo.” Taʼandrö saohagölö me lö aʼozu lalau khöra dangara ira Ojebode, Kaoru hegöi Adriana. Hizaʼi, arakhagö 800.000 niha zamalua daʼö ero röfi.

Abölö ato ndra matua samunu yaʼia samösa, börö me aila ira wangandrö tolo. Iwaʼö Yesu wa moguna doto ba niha sofökhö. (Luka 5:31) Andrö, na tumbu ba dödöu wamunu yaʼugö börö me oya gabula dödöu, böi ailaʼö wangandrö tolo. Ato zangumaʼö wa tola lasöndra wanolo na möi ira khö doto. Daʼö nifalua Ojebode, Kaoru hegöi Adriana ba tola lataögö gabula dödöra iadaʼa.

Tola labeʼe dalu-dalu ira doto mazui lafalua terapi wahuhuosa, ba tola göi laʼosamuzaigö zi dombua andrö. Nifalua ba terapi wahuhuosa yaʼia daʼö niha si göna depresi itutunö hadia nirasoinia ba itolo ia doto enaʼö ifuli tefaudu lala wangera-ngerania hegöi amuatania. Moguna göi latolo ia ira ösi nomonia hegöi si fahuwu khönia, laʼameʼegö tödö ia, ebolo dödöra khönia, ba aboto ba dödöra hadia nirasoinia. So zi fahuwu fondrege zi sökhi si tola taʼokhögö, yaʼia daʼö Lowalangi Yehowa. Ibeʼe khöda wanolo sahöli-höli dödö ba Daromalinia, Sura Niʼamoniʼö.

Tenga ha sabata ginötö niʼogunaʼö niha si göna depresi ba wanemaʼö dalu-dalu moroi khö doto ba moguna göi ibulöʼö zi toʼölö ifalua. Na öforege wolawa abula dödö andrö, tola ödöna-döna waʼohahau dödö ba zi so miföna, simane nifalua Ojebode. Imane, ”Udöna-döna wa alua nifaʼeleʼö ba Yesaya 33:24, wa samuza inötö dania samösa lö sangumaʼö ’no gönado safökhö khögu’.” Simane Ojebode, yaterara dödöu ba mbuʼusa li Lowalangi sanandrösa ba ’danö si bohou’, me lö ”fökhö” saʼae dania ba daʼö. (Famaʼeleʼö 21:1, 4) Eluaha mbuʼusa li andrö, lö hadöi saʼae fökhö wangera-ngera hegöi ösi dödö. Taya dania daʼö sagötö faʼara. Fefu waʼafökhö si no irai örasoi ’löʼö saʼae ötörö tödö, löʼö saʼae öʼangeragö’.​—Yesaya 65:17.