Fatua lö artikel daʼa, no aboto ba dödöda tandra-tandra nitutunö Yesu. Tandra andrö zangoromaʼö wa no tefasindro Wamatörö Lowalangi ba zorugo ba Yesu Keriso zi tobali Razo.

Itutunö Sura Niʼamoniʼö wa iʼogunaʼö Yesu waʼabölö Famatörö Lowalangi ba wamofanö Zatana hegöi bekhu moroi ba zorugo. Iadaʼa, ha ulidanö zi tola lafaelungu, daʼö mbörö wa itugu lö sökhi zalua iʼotarai me döfi 1914.​—Famaʼeleʼö 12:7, 9.

Hewaʼae itugu lö sökhi zalua iadaʼa, hizaʼi börö me Razo Yesu ba Wamatörö Lowalangi, lö tebulö itolo niha ba zi sagörö ulidanö. Börö wameʼe famahaʼö moroi ba Zura Niʼamoniʼö nifaʼeleʼö Yesu ba zi sagörö ulidanö, ato niha samahaʼö yaʼira ba Zura Niʼamoniʼö ba lafalua goi-goi andrö ba waʼaurira sero maʼökhö. (Yesaya 2:2-4) Zuta niha no lafahaʼö ira hewisa enaʼö so waʼohahau dödö yomo ba nomo ba laʼomusoiʼö dödöra ba zi no laʼokhögö ba lö latehegö ifatörö ira halöwöra mazui harato. So mbua moroi ba wamahaʼö si no latema ba waʼaurira ba tobali göi ira ono mbanua niʼomasiʼö Lowalangi ba Wamatörönia.

Hewaʼae no mamatörö Yesu ba zorugo, lö tebulö so ndra samatörö ba gulidanö. Hizaʼi, imane Lowalangi khö Yesu, ”Yasalawa ndraʼugö ba zi faʼudu khöu andrö.” (Zinunö 110:2) Ba zi lö ara tö, ihori fefu nudunia Yesu ba iʼasogö waʼohahau dödö ba niha samosumange Lowalangi.

Ba zi lö ara tö, so nifalua Wamatörö Lowalangi yaʼia daʼö

• Ihori agama sofaya. Hasambalö tehori agama samahaʼö si lö atulö sanandrösa khö Lowalangi ba samakao faʼauri niha. Iʼamaedolagö agama sofaya Sura Niʼamoniʼö simane ira alawe sohorö-horö. Tokea niha sato ba waʼadudunia dania.​—Famaʼeleʼö 17:15, 16.

• Ihori wamatörö niha gulidanö. So nifalua Wamatörö Lowalangi dania yaʼia daʼö ifakiko fefu wamatörö niha gulidanö.​—Famaʼeleʼö 19:15, 17, 18.

• Ihori fefu niha si lö sökhi. Hadia zalua ba niha si lö sökhi, hegöi si lö omasi mamondrongo li Lowalangi? ”Ba nihori ba danö zebua horö andrö.”​—Gamaedola 2:22.

• Ihori Zatana hegöi bekhu. Tebai saʼae ’lafaelungu niha’ Satana hegöi bekhu.​—Famaʼeleʼö 20:3, 10.

Hadia geluaha daʼa fefu ba niha sanemaʼö Famatörö Lowalangi?

Me no mamatörö Yesu tobali Razo ba zorugo, oya zi no ifalua moroi ba nifalua wamatörö niha gulidanö. Fao khönia zi 144.000 niha nibayoini, nifili moroi ba gotalua niha gulidanö. (Famaʼeleʼö 5:9, 10; 14:1, 3) Hasambalö ifalua dania gohitö dödö Lowalangi ba gulidanö. Hadia nifalua Wamatörö Lowalangi ba niha gulidanö?

• Iheta wökhö ba faʼamate. ”Ba samösa lö ba mbanua sangumaʼö: No gönado safökhö khögu” ba ”lö hadöi saʼae faʼamate.”​—Yesaya 33:24; Famaʼeleʼö 21:4.

• Iʼasogö waʼatulö hegöi faʼahono dödö sindruhu. ”Ebua waʼohahau dödö nonou andrö” ba ”sahono manö dania zamösana ba lumö nagu khönia ba ba lumö marafalania, lö si keani yaʼia”.​—Yesaya 54:13; Mikha 4:4.

• Ibeʼe halöwö si sökhi. ”Ba ölö dangara, ba nitutuyugu andrö zi ogunaʼö. Tenga serege tödö ira, ba zaya-zaya gölö.”​—Yesaya 65:22, 23.

• Ifuli ihaogö fefu zi no tekiko ba gulidanö. ”Somuso tödö dania danö si mate andrö, tanö andrö si lö idanö; tanö si lö sinanö, ba sowua-wua tödö ba mobowo, simane ladari mböhö.”​—Yesaya 35:1.

• Ifahaʼö niha böʼö hadia zinangea lafalua enaʼö tola latema waʼauri si lö aetu. ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu si ha sambua, ba enaʼö aboto ba dödöra nifatengeu andrö, Yesu Keriso.”​—Yohane 17:3.

Omasi Lowalangi enaʼö ötema howu-howu daʼö. (Yesaya 48:18) Ba artikel aefa daʼa, itutunö hadia zinangea öfalua iadaʼa enaʼö tola ösöndra dötönafö sahöli-höli dödö ba zi so miföna.