Ba zi lö ara tö göi alua khöda ”mbade”, ifotöi daʼö Yesu ”wamakao sabölö-bölö”. (Mataiʼo 24:21) Gofu hezoso talau ita tebai moloi ita moroi ba wamakao andrö. Hizaʼi so zinangea tafalua enaʼö tola telumöʼö ita. Hadia daʼö?

Me fahuhuo Yesu Keriso ba Hili, ibeʼe mene-mene, ”Andrö, miʼofönaiʼö wangalui Famatörö Lowalangi awö waʼatulönia.” (Mataiʼo 6:33) Hewisa wamaluada daʼö?

Taʼofönaiʼö wangalui Famatörö Lowalangi. Eluahania, moguna so ba wangera-ngerada ba wangofönaiʼö Famatörö Lowalangi ba waʼaurida moroi ba danö böʼö. (Mataiʼo 6:25, 32, 33) Hana wa moguna so khöda lala wangera-ngera simane daʼö? Börö me tebai iʼasiwai niha gabula dödö salua ba niha gulidanö. Ha Famatörö Lowalangi zi tola mangasiwai fefu gabula dödö andrö.

Taʼalui waʼatulönia. Moguna taforege ba woloʼö huku satulö hegöi goi-goi Lowalangi ba waʼaurida. Hadia mbörö? Börö me lö sökhi lua-luania, na yaʼita samösa zangai angetula ba wotatugöi hezo zatulö hegöi si lö atulö. (Gamaedola 16:25) Aefa daʼö, na taʼoʼö goi-goi Lowalangi ba waʼaurida, tenga ha Lowalangi niʼomusoiʼöda tödö, hizaʼi so mbuania göi khöda.​—Yesaya 48:17, 18.

Böi tebulö taʼofönaiʼö wangalui Famatörö Lowalangi hegöi faʼatulönia. Ifangelama ita Yesu, wa so ösa niha si lö mangosambuaʼö fangera-ngerara ba lawaʼö wa tola lasöndra wolumöʼö na laʼokhögö gefe sebua. Tanö böʼönia  lahorigö ginötöra hegöi faʼabölöra ba gabula dödöra sero maʼökhö, irege lö hadöi inötöra ba wangalui Famatörö Lowalangi.​—Mataiʼo 6:19-21, 25-32.

Hizaʼi, no ifabuʼu Yesu ba niha sotuhini Famatörö Lowalangi, wa hasambalö lasöndra zoguna khöra iadaʼa ba latema howu-howu ba zi so miföna.​—Mataiʼo 6:33.

Hewaʼae no laʼofönaiʼö ba wangalui Famatörö Lowalangi hegöi faʼatulönia ira nifahaʼö Yesu me abad siföföna, lö niʼilara amozua moroi ba waʼafökhö hegöi famakao salua ba götöra, hizaʼi telumöʼö ira. Hana wa tola?

Laʼoʼö goi-goi satulö khö Lowalangi, ba tobali folumöʼö daʼö khöra moroi ba waʼabu dödö nirasoi niha si lö omasi mamondrongo li Lowalangi. Faduhu sibai dödöra wa tohare Wamatörö Lowalangi irege daʼö zanolo yaʼira ba wanaögö abula dödö sebua. Ba ibeʼe khöra Lowalangi ’waʼabölö sahöli-höli dödö’ irege tola lataögö daʼö.​—2 Korindro 4:7-9.

Niha Keriso me abad siföföna, laʼoʼö fareta nibeʼe Yesu ba wangofönaiʼö Famatörö Lowalangi. Laturiaigö duria somuso dödö sanandrösa ba Wamatörö Lowalangi ba zi sagörö ulidanö. (Kolose 1:23) Hadia so zamalua halöwö daʼö iadaʼa?

So! Aboto ba dödö ndra Samaduhuʼö Yehowa wa lö ara tö ihori fefu wamatörö si lö sökhi si so ba gulidanö Famatörö Lowalangi. Andrö, laforege ba wamalua fareta nibeʼe Yesu, ”Teturiaigö dania Wamatörö Lowalangi andrö, turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.”​—Mataiʼo 24:14.

Hewisa wanemaʼömö turia somuso dödö? Mafarou ndraʼugö ba woloʼö duma-duma moroi ba niha Keriso me abad siföföna ba mbanua Berea si so ba Makedonia. Me larongo duria somuso dödö sanandrösa ba Wamatörö Lowalangi moroi khö zinenge sotöi Faulo, latemaʼö daʼö ”soroi ba dödöra”. Aefa daʼö, ”lafareso Mbuku Niʼamoniʼö” enaʼö tola faduhu dödöra ba lafalua hadia zi no lafahaʼö yaʼira.​—Halöwö Zinenge 17:11, 12.

Tola göi öfalua zimane daʼö. Na öʼofönaiʼö ba wangalui Famatörö Lowalangi hegöi faʼatulönia, tola telumöʼö ndraʼugö iadaʼa ba örasoi waʼatulö hegöi faʼahono dödö sagötö faʼara ba zi so miföna.