Hana Wa Moguna Khöda Wamatörö Lowalangi?
Me iwöwöi niha siföföna, Somböi yaʼita sotöi Yehowa, ha yaʼia Zamatörö. Mamatörö ia si fao faʼomasi. Ifazökhi nahia si sökhi sibai yaʼia daʼö Kabu Edena si tobali nahia niha. Ba iʼasogö göi fefu zoguna khöra. Baero daʼö, ibeʼe halöwö si sökhi ba niha. (1 Moze 1:28, 29; 2:8, 15) Tola larasoi waʼohahau dödö na so ira barö wamatörö Lowalangi sebua faʼomasi.
Niha siföföna latimbagö Lowalangi, Samatörö yaʼira
Ifatunö Sura Niʼamoniʼö wa so samösa malaʼika samadaö khö Lowalangi, töinia Afökha Satana, ilawa wamatörö Lowalangi. Iwaʼö ba niha, wa tola lasöndra waʼowua-wua dödö hewaʼae na lö hadöi wanuturu lala moroi khö Lowalangi hegöi amatöröwania. Hizaʼi, niha siföföna, Adamo ba Khawa, abölö laʼoʼö niwaʼö Zatana ba fao göi ira ba wolawa Lowalangi.—1 Moze 3:1-6; Famaʼeleʼö 12:9.
Börö me latimbagö Wamatörö Lowalangi ira Adamo ba Khawa, taya khöra Waradaiso, ba lö laʼokhögö waʼauri si lö aetu. (1 Moze 3:17-19) Molua-lua göi gangetula nihalöra ba ngaʼötöra. Imane Sura Niʼamoniʼö, ”Hulö simane böröta horö andrö, ha samösa niha zamobörö [Adamo] ba faʼamate andrö börö horö.” (Roma 5:12) Börö horö göi andrö wa ”ibaliʼö ia samatörö awönia niha, ba wangalani yaʼia”. (Zangombakha 8:9) Eluahania, ba ginötö mamatörö niha gulidanö, lö tebulö so gabula dödö.
IBÖRÖGÖ MAMATÖRÖ NIHA GULIDANÖ
Molawa Nimerodi khö Yehowa
Itutunö Sura Niʼamoniʼö wa Nimerodi niha siföföna samatörö awönia niha. Ba ilawa wamatörö Yehowa. Iʼotarai me mamatörö Nimerodi, lö tebulö niha gulidanö wangogunaʼö faʼabölöra ba wolau si lö sökhi ba nawöra niha. Mato 3.000 fakhe silalö, isura Razo Selomo, ”Ba uʼila göi . . . mowöi daŵa hörö nifakao andrö, ba lö sondrara tödöra, lafakao ira samalangögö yaʼira.”—Zangombakha 4:1.
Simane daʼö göi zalua iadaʼa. Me döfi 2009, itutunö sambua artikel moroi ba PBB, wa famatörö si lö sökhi ”no tobali mbörö wa oya gabula dödö salua ba gulidanö iadaʼa”.
BA ZI LÖ ARA TÖ SO NIFALUA LOWALANGI!
Moguna ba niha gulidanö zamatörö si sökhi hegöi amatöröwa satulö. Ba no ifabuʼu khöda daʼö Somböi yaʼita!
Gofu hewisa waʼasökhi gamatöröwa niha gulidanö, hizaʼi lö mofozu ira ba wangeheta abula dödö sebua ba niha gulidanö
No ifasindro Wamatörönia Lowalangi ba ”lö tebulö, irugi zi lö aetu”, ba ihori dania fefu wamatörö niha gulidanö. (Danieli 2:44) Daʼa Famatörö niʼangandröi niha si zuta faʼato. (Mataiʼo 6:9, 10) Hizaʼi tenga Lowalangi dania zamatörö ba wamatörö daʼa. Ituyu samösa Zamatörö, si no irai auri tobali niha ba gulidanö. Haniha nituyu Lowalangi?
