• Nituyu Lowalangi. ”Noa sa atö ufataro razo andrö khögu . . . Ubeʼe tana khöu soi niha, ba ya khöu mbalö danö.”​—Zinunö 2:6, 8.

• Ngaʼötö Razo Dawido. ”Tumbu dania khöda nono, tebeʼe khöda nono matua . . . Faʼasalawania ba wamatörö ba faʼatulö andrö, ba si lö aetu, ba dadaoma Dawido andrö ba ba gamatöröwania, wangaro yaʼia.”​—Yesaya 9:6, 7.

• Tumbu ba Mbetilekhema. ”Betilekhema . . .  ba khöu sa iʼotarai khögu samösa, si möi samatörö . . . Sebua sa dania ia, irugi ba wondrege danö [waʼasalawania].”​—Mikha 5:1, 3.

• Nitimbagö niha ba nibunu. ”Niʼositengagö ia . . . ba fa lö ba dödöda ia. Ba no lalöda sa mbörö, wa tefesokho ia, ba horöda mbörö, wa terasa ia.”​—Yesaya 53:3, 5.

• Nisusugi ba sanema lakhömi. ”Löʼö sa ölulu ba mbanua tou nosogu ba lö ötehe, iʼila satulö tödö andrö khöu waʼobou barö danö. . . . Ahonoa waʼomuso dödö fönau ba somasi ita ba gambölöu, si lö aetu.”​—Zinunö 16:10, 11.

Sagötö faʼauri niha gulidanö, ha khö zi samösa niha tefaudu zi no mufaʼeleʼö andrö zi tobali Samatörö soʼahonoa yaʼia daʼö Yesu Keriso. No irai imane Malaʼika khö Maria, ina Yesu, ”Ibeʼe khönia Lowalangi Yehowa dadaoma duania Dawido, . . . ba lö tebulö Wamatörönia.”​—Luka 1:31-33.

Lö irai tobali razo Yesu ba gulidanö. Ifatörö dania niha gulidanö moroi ba zorugo börö me yaʼia Razo ba Wamatörö Lowalangi. Hana wa abölö sökhi na Yesu zi tobali Razo? Datafaigi hadia nifalua Yesu me so ia ba gulidanö.

•   Iʼameʼegö tödö fefu niha Yesu. Itolo fefu niha Yesu, ira matua mazui ira alawe, satua mazui si bohou ebua, tenga börö me numana mazui kayo ira. (Mataiʼo 9:36; Mareko 10:16) Me imane si samösa zi göna bou auri sangandrö tolo khö Yesu, ”Na omasiʼö, tola öfadöhö ndraʼo,” ahakhö dödönia ba ifadöhö niha andrö.​—Mareko 1:40-42.

• Ifahaʼö ita Yesu lala ba wangomusoiʼö tödö Lowalangi. Imane Yesu, ”Tebai tobali ami sawuyu Lowalangi ba sawuyu Ganaʼa göi.” Iwaʼö nasa enaʼö tafalua ba niha böʼö hadia zomasi lafalua khöda—daʼa goi-goi nifotöi Huku Anaʼa. Baero daʼö, ifatunö göi wa tenga ha börö nifaluada wa tola omuso dödö Lowalangi, tola göi moroi ba lala wangera-ngerada hegöi nirasoida. Börö daʼö enaʼö tola omuso dödö Lowalangi, böi ifatörö ita gisö-isö dödöda. (Mataiʼo 5:28; 6:24; 7:12) Ifatunö khöda Yesu, enaʼö tola tarasoi waʼowua-wua dödö sindruhu, moguna tafahaʼö ita ba zomasi Lowalangi ba tafalua ia.​—Luka 11:28.

• Ifahaʼö ita Yesu hadia geluaha wangomasiʼö niha böʼö. Fehede hegöi nifalua Yesu, möi famarou dödö zamondrongo. Imane Sura Niʼamoniʼö, ”Ahöli-höli dödö niha sato ba lagu wamahaʼönia, börö me mamahaʼö ia simane niha sebua kuaso.” (Mataiʼo 7:28, 29) Ifahaʼö ita Yesu, ”Miʼomasiʼö zi faʼudu khömi.” Mangandrö göi ia salahi niha samunu yaʼia, ”He Ama, efaʼö khöra horöra, börö me lö laʼila hadia nifaluara.”​—Mataiʼo 5:44; Luka 23:34.

Yesu zabölö sökhi zi tobali Samatörö ba zi sagörö ulidanö börö me iʼameʼegö tödö niha. Hizaʼi, hawaʼara ibörögö mamatörö Yesu?