Imane Yesu, ”Maoso dania zi sambua soi isuwö soi böʼö, ba simanö göi zalua ero sambu-sambua famatörö. Alua ndruru danö sabölö-bölö, lofo sabölö-bölö, hegöi ngawalö wökhö.” (Luka 21:10, 11) Tola laʼila zi samösa niha moroi ba sidik jarinia, simane daʼö göi na alua fefu zi no iwaʼö Yesu, daʼö zi tobali tandra wa ”no ahatö Wamatörö Lowalangi”. Hadia no alua dandra-tandra daʼö ba zi sagörö ulidanö ba ginötö si fendronga? Angeragö daʼa.

1. FASUWÖTA

Me döfi 1914, alua wasuwöta sebua si lö irai alua sagötö faʼauri niha! Asese lamane ira sejarawan wa döfi 1914, daʼö ndröfi sombulöʼö faʼauri niha börö me ibörögö alua wasuwöta gulidanö siföföna. Muʼogunaʼö ba daʼö fakake wasuwöta si lö irai laʼogunaʼö ba zilalö simane tank, bom udara, gas beracun, fana, mazui fakake tanö böʼö. Aefa daʼö alua wasuwöta gulidanö si dua, muʼogunaʼö göi ba daʼö fakake si lö irai laʼogunaʼö, yaʼia daʼö bom atom. Zuta niha si mate ba wasuwöta gulidanö siföföna me döfi 1914.

2. DURU DANÖ

Ero röfi, so mato 100 kali alua duru danö sabölö-bölö irege ”tekiko domosa” iwaʼö Encyclopedia Britannica. Ba itutunö Lembaga Survei Geologi Amerika Serikat wa ”moloʼö si no musura (iʼotarai me döfi 1900), mato 16 kali alua ndruru danö sabölö-bölö ba zi döfi”. So ösa zangogunaʼö fakake si sökhi ba wangila na tohare ndruru danö. Hewaʼae simanö, duru danö salua ba zi sagörö ulidanö andrö iʼasogö gabula dödö ba faʼamate.

 3. LOFO SABÖLÖ-BÖLÖ

Alua lofo sabölö-bölö ba zi sagörö ulidanö börö wasuwöta, korupsi, faʼambö zoguna, hegöi faʼatekiko mbua nowi. Imane Program Pangan Dunia 2018, ”Ba zi sagörö ulidanö, so 821 zuta niha sambö balazo ba 124 zuta niha si göna lofo sabölö-bölö.” Mato 3,1 zuta ndraono si mate ero röfi börö waʼambö gizi. Ba ndröfi 2011, so mato 45 persen ndraono si mate ba zi sagörö ulidanö.

4. FÖKHÖ HEGÖI WABAH

Imane Organisasi Kesehatan Dunia, ”Ba abad si-21 alua wökhö salio fatöfa ba niha sato solohe ba waʼamate (mazui mufotöi ia wabah). Ifuli so wökhö si no ara simane kolera, sampar, hegöi fökhö ate. So göi wökhö sawena so simane SARS, ngawalö flu sawena so, MERS, Ebola hegöi Zika.” Ba simane salua barö-barö daʼa, so COVID-19. Hewaʼae no lafahaʼö ira niha sagatua-tua hegöi doto sanandrösa ba wökhö, tebai lafadöhö fefu wökhö.

5. HALÖWÖ FANURIAIGÖ BA ZI SAGÖRÖ ULIDANÖ

Ifaʼeleʼö Yesu hadia zi tobali tandra tanö böʼö me iwaʼö, ”Ba teturiaigö dania Wamatörö Lowalangi andrö, turia somuso dödö ba zi sagörö ulidanö misa, tobali famaduhuʼö ba ngawalö soi ba awena dania amozua götö danö andre.” (Mataiʼo 24:14) Hewaʼae na oya gabula dödö salua ba gulidanö iadaʼa, töra walu zuta niha moroi ba zi sagörö ulidanö zanuriaigö turia somuso dödö ba zi 240 soi, ba töra 1.000 ngawalö li niʼogunaʼö. Lö irai alua daʼa ba zilalö.

Fefu dandra-tandra niwaʼö Yesu no alua iadaʼa. Hana wa moguna adöni dödöda ba zalua andrö? Börö me imane Yesu, ”Na miʼila alua daʼö fefu, yaʼaboto ba dödömi no ahatö Wamatörö Lowalangi.”​—Luka 21:31.

Tandra-tandra niwaʼö Yesu hegöi nisura ba Zura Niʼamoniʼö sanolo yaʼita enaʼö aboto ba dödöda wa no ifasindro Wamatörönia Lowalangi ba zorugo me döfi 1914. a Ba ginötö daʼö, ituyu Nononia sotöi Yesu Keriso tobali Razo. (Zinunö 2:2, 4, 6-9) Na tohare Wamatörö Lowalangi ba gulidanö, ihori fefu wamatörö niha gulidanö, ba ibaliʼö gulidanö andre simane faradaiso nahia niha sagötö faʼara.

Ba zi lö ara tö, alua wangandrö si no ifahaʼö Yesu, ”Yatohare Wamatörömö. Yaʼitörö zomasi ndraʼugö, hulö simane ba zorugo, yasimanö göi ba gulidanö.” (Mataiʼo 6:10) Iʼotarai me no tefasindro Wamatörö Lowalangi me döfi 1914, hadia manö zi no ifalua? Ba hadia manö nitemada na no mamatörö dania Wamatörö Lowalangi ba niha?