Na awena 60 menit tumbu ndraono, tebai lafabali ia khö ninania. Börö me moguna daʼö ba waʼatedou nono andrö ba enaʼö lö hadia ia khönia. *

Hadia zalua na italagui si samösa ina nononia sawena tumbu? Iwaʼö Profesor Jeannette Crenshaw ba The Journal of Perinatal Education wa monönö hormon oksitosin irege daʼa ”mbörö wa omasi nina ba wotalagui, ba wamaigi hegöi ba wamaenu ononia sawena tumbu”. Baero daʼö, so nasa hormon tanö böʼö zohalöwö ba ginötö si fagölö irege ”tetolo ira ba woʼameʼegö tödö nonora sawena tumbu”. Hana wa moguna sibai daʼa?

Wa tola so gamakhaita ba gotalua nina hegöi ononia sawena tumbu, börö me no itatugöi daʼö Somböi sebua faʼomasi sotöi Lowalangi Yehowa. * Isuno Lowalangi andrö Razo Dawido börö me yaʼia zanöbi Dawido moroi ba dalu ninania ba sameʼe khönia faʼahono dödö ba gaheta ninania. Mangandrö ia, ”Yaʼugö dötönafögu, iʼotarai dalu ninagu; iʼotarai ba gaheta ninagu, ba Lowalangigu ndraʼugö.”​—Zinunö 22:10, 11.

ANGERAGÖ: Na ifazökhi sistem hormon sabua andre Lowalangi ba wotatugöi enaʼö ihaogö inehegö si samösa ina hadia zoguna ba nononia, hadia tola tawaʼö göi wa iʼameʼegö tödö ita zamösana Lowalangi me no ”ono Lowalangi” ita?​—Halöwö Zinenge 17:29.

Ha Yesu Keriso zabölö mangokhögö faʼaboto ba dödö sanandrösa khö Zomböi yaʼita. Imane Yesu, ”Hadia tenga ha sambua kefe loga mböli ziliwi si dombua? Hizaʼi, na so ziliwi satoru ba danö, hasambalö iʼila Amami. Bu högömi manö iʼila hauga rozi. Andrö, böi miʼataʼufi, abölö tohude ami moroi ba wofo andrö.”​—Mataiʼo 10:29-31.

Te lö taʼila hawaʼoya wofo si hombo ba zi fasuida, mendrua manö saʼae na so zatoru ba danö. Hizaʼi, inehegö ira zamösana Amada si so ba zorugo! Ba lö irai ebua ba dödönia ngawalö wofo moroi ba niha gulidanö. Famahaʼönia, lö moguna ’ataʼuʼö’ wa lö iʼameʼegö tödö ndraʼugö Lowalangi. Sindruhunia, iʼameʼegö tödö sibai ndraʼugö!

 Ayati Zura Niʼamoniʼö sondrara tödöda

• ”Fefu gofu heza, ba ikhamö hörö Yehowa, wamaigi-maigi si lö sökhi, awö zi sökhi.”​—GAMAEDOLA 15:3.

• ”Itöngö Yehowa zamazökhi si lö sökhi, ba wangohori töira ba gulidanö.”​—ZINUNÖ 34:16.

• ”Enaʼö maʼiki ndraʼo ba enaʼö omuso dödögu, ba waʼebua dödöu andrö, wa no önehegö waʼanumanagu andrö, wa no öbeʼe ba dödöu waʼatosasa dödögu.”​—ZINUNÖ 31:8.

Hadia mbuania na taʼila wa omasi Lowalangi na ohahau dödöda ba ifaigi-faigi ita si fao faʼomasi? Datatutunö zalua khö Hana, * moroi ba Inggris. Imane,

”Asese urasoi wa lö iʼomasiʼö ndraʼo Yehowa ba lö ifondrondrongo wangandrögu. Te börö me ambö famatigu. Hulö no ihuku ndraʼo mazui lö itemado börö me ambö moguna ndraʼo khönia. Imane tödögu, lö iʼameʼegö tödö niha Lowalangi.”

Hizaʼi, faduhu dödö Hana iadaʼa wa iʼameʼegö tödö ba iʼomasiʼö ia Yehowa. Hana wa tebulö nirasoinia? Imane, ”Lö iʼanemaiʼö tebulö daʼö. Itörö tödögu sambua huhuo si teʼodane-dane ba Zura Niʼamoniʼö nifaʼema me hauga fakhe silalö sanandrösa ba höli nibeʼe Yesu. Toröi-röi manö ba dödögu daʼö irege so khögu waʼafaduhu dödö wa iʼomasiʼö ndraʼo Yehowa. Me usöndra wanema li moroi ba wangandrögu, asese mowöi dawa hörögu, börö me sindruhu-ndruhu urasoi wa iʼomasiʼö ndraʼo Yehowa. Famahaʼö Zura Niʼamoniʼö ba feʼamöi ba gangowuloa niha Keriso zamahaʼö yaʼo irege monönö waʼaboto ba dödögu sanandrösa khö Yehowa, amuatania hegöi tödönia khöda. Iadaʼa, uʼila wa ituhini ita Yehowa, iʼomasiʼö ba iʼameʼegö tödö ita zamösana.”

Si tobali famarou dödöda zalua khö Hana andrö. Hizaʼi, hewisa enaʼö sindruhu-ndruhu faduhu dödöu wa aboto ba dödö Lowalangi ndraʼugö ba lö olifu ia nirasoimö? Taʼila wanema linia ba duho aefa daʼa.