Fahaʼö Ndraʼugö Sanandrösa khö Lowalangi moroi khö Ndra Samaʼeleʼö Khönia
Me götö föna, iʼogunaʼö ndra samaʼeleʼö khönia Lowalangi ba wamaʼema turia si tohude ba niha gulidanö. Hadia wamahaʼö nihalöda moroi ba duria andrö? Taʼila hewisa lalada enaʼö tola tasöndra howu-howu moroi khö Lowalangi. Datafahaʼö ita moroi ba zi datölu samaʼeleʼö si lö faröi.
ABERAHAMO
Lö abua dambai Lowalangi ba hasambalö ifahowuʼö fefu niha.
No irai ifabuʼu Lowalangi khö Gaberahamo wa ”moroi khöu tefahowuʼö dania fefu soi ba gulidanö”.—1 Moze 12:3.
Hadia wamahaʼönia? Iʼomasiʼö sibai niha Lowalangi ba hasambalö ifahowuʼö fefu ndra matua, ira alawe, hegöi iraono soloʼö khönia.
MOZE
Lowalangi no sahakhö tödö ba ifahowuʼö niha sangodödögö ba wangalui yaʼia.
Lowalangi Sebua Kuaso ibeʼe khö Moze waʼabölö ba wamalua ngawalö dandra sahöli-höli dödö. Hewaʼae simanö, lö aetu iʼandrö Moze khö Lowalangi, ”Bokai khögu dödöu ba beʼe aboto ba dödögu ndraʼugö, enaʼö falukhado waʼebua dödö khöu.” (2 Moze 33:13) Omuso dödö Lowalangi ba gangandröwa Moze, ba itema howu-howu. Itolo göi Moze enaʼö tola itugu aboto ba dödönia mbua-bua hegöi lala wangera-ngera Lowalangi. Duma-dumania, iʼombakhaʼö khö Moze wa yaʼia Zomböi ”sebolo tödö ba si no fahöna faʼoböwö”.—2 Moze 34:6, 7.
Hadia wamahaʼönia? Omasi sibai Lowalangi ba wamahowuʼö yaʼita, he ira matua, ira alawe hegöi iraono, na taforege ba wamahaʼö yaʼita sanandrösa khönia. Börö daʼö, ifatunö Lowalangi ba Zura Niʼamoniʼö hewisa lalada ba wamosumange yaʼia.
YESU
Ifadöhö fefu niha sofökhö Yesu börö me so khönia waʼomasi
Tola tasöndra howu-howu moroi khö Lowalangi sagötö faʼara na tafahaʼö ita khö Yesu moroi ba duma-dumania hegöi nifaluania.
Ba Zura Niʼamoniʼö, oya niʼilada sanandrösa ba waö-waö waʼauri Yesu hegöi famahaʼö nifaʼemania. Ibeʼe Lowalangi waʼabölö khö Yesu ba wamalua ngawalö dandra sahöli-höli dödö. Ifadöhö hörö niha sauʼa, niha safiso hegöi sombuyu-buyu töla. Ba no göi irai isusugi niha si no mate. Daʼö howu-howu nibeʼe Lowalangi ba niha gulidanö ba zi so föna. Hewisa enaʼö tasöndra fefu howu-howu andrö? Ifatunö Yesu hewisa lala ba wanöndra yaʼia. Imane, ”Daʼö waʼauri si lö aetu, enaʼö aboto ba dödöra ndraʼugö, Lowalangi sindruhu si ha sambua, ba enaʼö aboto ba dödöra nifatengeu andrö, Yesu Keriso.”—Yohane 17:3.
No irai ifatunö Yesu, ”Mifahaʼö ami khögu börö me no sebolo tödö ndraʼo ba si lö fayawa, ba misöndra wolombase.” (Mataiʼo 11:29) Ato ndra matua, ira alawe, si bohou ebua hegöi si no atua, möi ira khö Yesu börö me so khönia waʼahakhö dödö, faʼasökhi dödö ba faʼasökhi. Me götö daʼö, lö lafosumange ndra alawe. Hizaʼi, iforomaʼö Yesu waʼasökhi dödö khö ndra alawe ba iʼosinangegö ira.
Hadia wamahaʼönia? Iʼomasiʼö sibai fefu niha Yesu. Tola tafahaʼö ita ba duma-duma si sökhi nibeʼe Yesu, duma-dumania hewisa zinangeania laguda ba niha böʼö.
YESU TENGA LOWALANGI
Ifahaʼö ita Sura Niʼamoniʼö wa ”ha samösa Lowalangi”, ba na Yesu Keriso yaʼia zolohe turia moroi khö Lowalangi. (1 Korindro 8:6) Yesu samösa zangumaʼö wa abölö ebua Lowalangi moroi khönia, ba Lowalangi zamatenge yaʼia ba gulidanö.—Yohane 11:41, 42; 14:28. *
^ par. 17 Enaʼö öʼila danö böʼö nasa sanandrösa khö Yesu Keriso, faigi faosatö 8 ba 9 ba mbuku Apa Kunci Kehidupan yang Bahagia? Tehenaigö secara online ba jw.org/id.
