So ösa zanofu-nofu hadia no mufaböʼöni nösi Zura Niʼamoniʼö. Imane samaʼeleʼö sotöi Yesaya wa Taromali Lowalangi ’lö tebulö irugi zi lö aetu’. (Yesaya 40:8) Hana wa faduhu dödöda wa no tesura nifabuʼu Lowalangi ba hasambalö alua?

So waʼabölö khö Lowalangi ba wondrorogö hegöi ba wolumöʼö Taromalinia moroi ba niha si lö sökhi. Me götö föna, me labörögö lasali zura nisura tanga andre, lahaogö sibai ba wanali yaʼia, laʼerai hawaʼoya hurufo moroi ba zura andrö, enaʼö tola laʼila wa lö hadöi ngawua wehede ninönö, nifaböʼöni mazui niheta. Hizaʼi, börö me lö moʼahonoa ira, itaria so zi fasala nisurara ba ginötö lasali zura andre.

Ngahönö waʼoya salinan si no mufazökhi moroi ba manuskrip kuno Zura Niʼamoniʼö. Na so sambua manö salinan si faböʼö moroi ba danö böʼö, tola lafaehusi daʼö faoma salinan tanö böʼönia ba wangalui satulönia. Enaʼö oya öʼila, faigi artikel ”Apakah Isi Alkitab Telah Diubah?” ba jw.org/id.

Faehusi duma-duma daʼa, so dokumen kuno nifotöi Ngaʼölu Nasi si Mate, nisöndra ndra niha Badui ba dögi narö hili ba Nasi si Mate me döfi 1947. Ba gölu-gölu zura andre tefarahu nösi Zura Niʼamoniʼö si no musura dua ribu fakhe silalö. Lafaehusi manuskrip kuno andre faoma Sura Niʼamoniʼö si so khöda iadaʼa ira niha sagatua-tua. Hadia manö nisöndrara?

Ira niha sagatua-tua lasöndra wa ösi Daromali Lowalangi niʼokhögöda iadaʼa sindruhu-ndruhu moroi ba salinan si oföna. * Lahaogö sibai ba wamareso manuskrip sabölö atua andre irege hadia nibasoda moroi ba Zura Niʼamoniʼö no sindruhu-ndruhu turia moroi khö Lowalangi. Iadaʼa tola faduhu dödöda wa Lowalangi lö tebulö irorogö Zura Niʼamoniʼö niʼogunaʼöda irugi maʼökhö.

Börö daʼö, tola tabaso fefu Daromali Lowalangi sindruhu ba satulö. Na simane daʼö, datatohugö tafareso hadia zi tola taʼila khö Lowalangi moroi khö ndra samaʼeleʼö khönia.