Ifabuʼu Lowalangi khö zamaʼeleʼö sotöi Aberahamo wa so samösa ba gotalua ngaʼötönia zi tobali börö wa ”tefahowuʼö dania fefu soi ba gulidanö”. (1 Moze 22:18) Haniha daʼö?

Yesu no ngaʼötö Gaberahamo. Arakhagö 2.000 fakhe silalö, ibeʼe Lowalangi khö Yesu waʼabölö ba wamalua tandra sahöli-höli dödö. Daʼa zangoromaʼö wa buʼusa li Lowalangi khö Gaberahamo manandrösa ia khö Yesu.​—Galatia 3:14.

Moroi ba dandra sahöli-höli dödö nifalua Yesu, oroma wa yaʼia andrö nifili Lowalangi ba wangaʼasogö howu-howu ba niha gulidanö, oroma göi hewisa Lowalangi wangogunaʼö yaʼia ba wamahowuʼö niha sagötö faʼara. Nehegö hewisa wa tola oroma gamuata Yesu moroi ba dandra sahöli-höli dödö nifaluania.

Faʼasökhi dödö—Ifadöhö niha sofökhö Yesu.

Samuza inötö, so zi göna bou auri sangandrö tolo khö Yesu. Ibabaya ia Yesu ba imane, ”Omasido!” Iʼanemaiʼö döhö niha daʼö.​—Mareko 1:40-42.

Oböwö—Ibeʼe gö ba niha solofo Yesu.

Lö omasi Yesu na olofo niha. Ba zi hauga kali, ifalua dandra sahöli-höli dödö ba wangaʼasogö roti hegöi iʼa ba zi ngahönö niha faʼato. (Mataiʼo 14:17-21; 15:32-38) Me no aefa manga ira fefu, abuso ira ba oya nasa zi toröi.

Faʼahakhö dödö—Isusugi niha si no mate Yesu.

Börö waʼahakhö dödö Yesu, isusugi nono matua khö lakha mbanua si ha samösa.​—Luka 7:12-15.