Hadia zalua ba waʼaurida na lö hadöi haga luo? Na lö energi moroi ba haga luo, tebai mobulu, mobunga, mowua ba mohunö ngawalö zinanö. Ba börö haga luo wa tola iʼogunaʼö waʼania sinanö ba wangai idanö si so ba narö danö numalö ba mbulunia, ba iheta daʼö irege numalö ba dalu mbanua.

Iʼasogö deu hegöi inötö wamasi Lowalangi. Börö deu wa tola so ngawalö gö, irege tarasoi waʼafahöna ba faʼowua-wua dödö. Teu no buala si sökhi nibeʼe Lowalangi khöda.

Ato ndra satua ira matua, sorasoi faʼaombö dödö ba wamönökhi soguna ba nösi nomonia simane ö hegöi nukha niʼogunaʼö. Nehegö hadia niwaʼö ba Zura Niʼamoniʼö, ”Haogö wamaigi fofo andrö ba dalu mbanua. Lö manaru ira ba lö mamasi, lö mangöhöna ira ba halasa, hizaʼi ibalazoi ira Amami andrö si so ba zorugo. Hadia tenga no aröu faehu ami moroi ba wofo?”​—Mataiʼo 6:25, 26.

”Mihalö khömi wamahaʼö moroi ba mbunga lili si tumbu ba mbenua. . . . lö simane faʼasökhi mbunga andrö nukha Zelomo ba lakhöminia. Na simanö Lowalangi wamonukha duʼu andrö ba mbenua . . . , mendrua manö ami.”​—Mataiʼo 6:28-30.

Börö me tola ibönökhi balazo hegöi nukha niʼogunaʼöda Lowalangi, tatu manö tola itolo ita ba wombönökhi soguna khöda tanö böʼö. Na tafalua fefu niwaʼö Lowalangi, tola ifahowuʼö wamorege nifaluada ba wombönökhi soguna khöda, duma-dumania, tola itolo ita ba lala halöwöda irege tola taʼöli zoguna khöda.​—Mataiʼo 6:32, 33.

Na taʼangerönusi sanandrösa ba haga luo, teu, fofo hegöi bunga, itugu tedou waʼomasida khö Lowalangi. Ba artikel aefa daʼa, taʼila dania hadia lala niʼogunaʼö Zomböi ba wahuhuosa ba niha gulidanö.