Me iwöwöi niha gulidanö andre Somböi yaʼita, no fahuhuo ia khöra, iʼogunaʼö ndra malaʼika hegöi ira samaʼeleʼö. Baero daʼö, itatugöi enaʼö fefu goroisa hegöi buʼusa linia enaʼö lasura daʼö. Molua-lua mbuʼusa li Lowalangi andre ba waʼaurida ba zi so föna. Hizaʼi, hewisa enaʼö tola tarasoi mbuʼusa li Lowalangi iadaʼa?

Tola taʼila ba Zura Niʼamoniʼö goroisa Lowalangi ba waʼaurida. (2 Timoteo 3:16) Hewisa wangogunaʼö Lowalangi ndra samaʼeleʼö ba wangombakha oroisania? (2 Fetero 1:21) Iʼombakhaʼö niʼera-erania, ba niha daʼö zanura. Simane salua iadaʼa. Samösa gafalo iʼogunaʼö sekretarisnia ba wanura sura, no ifaʼanö döinia ba daʼö, ba faduhu dödöda wa moroi khö gafalo andrö zura daʼö. Simane daʼö göi, iʼogunaʼö niha gulidanö Lowalangi ba wanura oroisania, ba Bua Gera-erania Buku Niʼamoniʼö.

Moguna sibai goroisa Lowalangi, andrö wa omasi ia na fefu niha tola labaso ba aboto ba dödöra. Iadaʼa, no tefaʼanö ba ”ngawalö mado, banua, hegöi li” ngawalö ”duria somuso dödö si lö tebulö”. (Famaʼeleʼö 14:6) Börö howu-howu moroi khö Lowalangi wa tola tefaʼanö Zura Niʼamoniʼö ba zi töra 3.000 ngawalö li, he si no awai mufoʼeluaha hegöi si löʼö. Abölö oya moroi ba mbuku tanö böʼö nifazökhi niha.