Ba zi sagörö ulidanö, ato niha si lö balazo ba si lö omo. Hizaʼi, so göi zinangea mangila wa ba zi so miföna hasambalö sökhi zalua. Na taforege ba wanolo yaʼira, ifahowuʼö ita Lowalangi. Hewisa lalania?

”Si hakhösi tödö si numana, ba khö Yehowa ibeʼe nifalali, ba yaʼia zanulöni khönia faʼebua dödönia andrö.”​—GAMAEDOLA 19:17.

Itutunö Yesu sanandrösa khö ndra matua nirabu, niböbözi ba arakhagö mate, aefa daʼö laröi. (Luka 10:29-37) Ba me so ndra matua sanörö daʼö, iʼanemaiʼö itolo ia. Omasi ia itolo hewaʼae na lö iʼila haniha ndra matua daʼö ba faböʼö göi mbanuara.

Ibeʼe dalu-dalu hegöi kefenia ba wanolo niha nirabu andrö, irege alö gabula dödö nitaögö ndra matua daʼö.

Hadia wamahaʼö nihalöda? Iʼombakhaʼö Yesu wa moguna taforege ba wanolo niha sedöna mutolo. (Gamaedola 14:31) Ifahaʼö ita Buku Niʼamoniʼö wa ba zi lö ara tö hasambalö ihori Lowalangi waʼanumana ba famakao. Te manofu-nofu dödöu, hawaʼara ba hewisa wamalua Lowalangi daʼö? Ba artikel aefa daʼa, itutunö hewisa wa tola iʼasogö daʼö Zomböi sebua faʼomasi.