Irugi iadaʼa, ato niha si faduhu tödö wa hasambalö lasöndra waʼohahau dödö na sökhi gamuatara. Lö tebulö lafosumange niha böʼö, lafalua zi sökhi, laforomaʼö wangide-ngideʼö, ba larorogö dödöra side-ide si lö sinegu. Imane ira alawe sotöi Linh moroi ba Vietnam, ”Faduhu dödögu mböröta wa hasambalö usöndra waʼohahau dödö na utörö zindruhu ba ufalua daʼö soroi ba dödö.”

So göi zamalua si sökhi börö me daʼö nifahaʼö ba agamara. Imane ira matua sotöi Hsu-Yun, si toröi ba Taiwan, ”Lafahaʼö ndraʼo mböröta wa fefu nifalua zi samösa niha sagötö faʼaurinia, daʼö zotatugöi hadia isöndra waʼohahau dödö mazui famakao na no mate ia dania.”

Sindruhu sa, oya mbua nitemada na tafalua zi sökhi. Hizaʼi, ato niha si sökhi amuata si lö morasoi faʼohahau dödö ba waʼaurira. Imane ira alawe sotöi Shiu Ping, si toröi ba Hong Kong, ”Lö tebulö ufalua zi sökhi ba uforege wondrorogö ösi nomogu. Hizaʼi, iröi ndraʼo hegöi onoma foʼomogu. Börö daʼö, urasoi samösa wa niha si sökhi amuata lö tatu na isöndra waʼohahau dödö ba waʼaurinia.”

Baero daʼö, ato niha sangila wa lö dozi niha samati andrö sökhi gamuatara. Imane ira alawe sotöi Etsuko, si toröi ba Jepang. ”Owölö-ölö sibai ndraʼo mböröta ba agama si fao yaʼo. Tobali göi ndraʼo sondröniaʼö ira si bohou ebua. Hizaʼi, tokeado sibai me uʼila wa lö sökhi gamuata niha ba agama si fao yaʼo. Faoma lafadöni dadaoma ba lafuyuʼö wangogunaʼö kefe organisasi.”

So göi zafatö tödö börö me alua khöra gabula dödö hewaʼae na owölö-ölö ira ba wamosumange Lowalangi ba oya zi sökhi nifaluara. Daʼö nirasoi Van, samösa ndra alawe moroi ba Vietnam. Imane, ”Me föna ero maʼökhö ubeʼe zumange khö ndra satuagu si no mate, simane bua sinanö, bunga, hegöi ö. Uwaʼö tödögu wa tola usöndra waʼohahau dödö ba zi so miföna na ufalua daʼö. Asese göi ufalua zi sökhi ba fao ndraʼo wamalua si toʼölö mufalua ba agama ba zi hauga fakhe faʼara. Hewaʼae simanö, göna woʼomogu fökhö sabölö-bölö.”

Börö daʼö, hewaʼae na sökhi gamuatada tenga daʼö zotatugöi wa tasöndra waʼohahau dödö sandrohu faʼaurida. Na simanö, hadia zameʼe khöda faʼohahau dödö ba zi so miföna? Enaʼö taʼila wanema linia, moguna khöda wanuturu lala si tola tafaduhusi tödö, samatunö khöda hewisa enaʼö tola tasöndra waʼohahau dödö ba zi so miföna. Hezo tola tasöndra wanuturu lala simane daʼö?