Hadia Zindruhunia Zameʼe Khöda Faʼohahau Dödö ba zi So Miföna?
Simane si no tatutunö ba artikel si no aefa, ato niha si faduhu tödö wa no itatugöi waʼauri zi samö-samösa niha Lowalangi, sekola salawa, kefe, hegöi na lafalua zi sökhi enaʼö ohahau dödöra ba zi so miföna. Hizaʼi dali zindruhunia, hadia nifaluara andrö hulö no laʼogunaʼö peta si fasala irege lö lakhamö gohitö dödöra. Na simanö, hadia sindruhu-ndruhu so zameʼe faʼohahau dödö khöda ba zi so miföna? So!
UMBU DURIA SI SÖKHI
Na moguna khöda wanuturu lala, si toʼölönia manofu ita ba niha sagatua-tua hegöi salawa döfi moroi khöda. So samösa zatua-tua ba salawa döfi si tola mameʼe khöda mene-mene si sökhi. Mene-mene daʼö tesöndra ba zi sambua mbuku nisura mato 3.500 fakhe silalö. Buku daʼö yaʼia Zura Niʼamoniʼö.
Hana wa tola mufaduhusi tödö Zura Niʼamoniʼö? Börö me daʼö si otarai khö wondrege zalawa döfi ba satua-tua ba zi sagörö banua si yawa awö danö. Lafotöi ia ”Zi No Alawa Döfi”, yaʼia ”Lowalangi götö-götö waʼara”. (Danieli 7:9; Sinunö 90:2) Baero daʼö, yaʼia andrö ”Somböi banua si yawa, Lowalangi sindruhu, Samazökhi ulidanö.” (Yesaya 45:18) Ba no göi ifatunö döinia khöda yaʼia daʼö Yehowa.—Sinunö 83:18.
Börö me Sura Niʼamoniʼö si otarai Lowalangi Samazökhi fefu niha, ösinia lö ihöni-hönisi zi sambua soi mazui si toʼölö lafalua. Mene-menenia tefaudu khöda mane maʼökhö ba moguna ba niha fefu. Ha Sura Niʼamoniʼö zabölö oya mufoʼeluaha ba no tefazawili ba zi sagörö ulidanö. * Börö daʼö, fefu niha tola labaso mbuku daʼa ba lasöndra mbuania. Fefu zalua andre tefaudu ia ba wehede Zura:
”Lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.”—HALÖWÖ ZINENGE 10:34, 35.
Hulö simane satua sangomasiʼö ba sanolo iraononia, simane daʼö göi Yehowa iʼomasiʼö ba itolo ita iʼogunaʼö Zura Niʼamoniʼö yaʼia daʼö Taromalinia. (2 Timoteo 3:16) Yaʼia zomböi yaʼita. Iʼila hadia zabölö sökhi khöda. Börö daʼö, tola tafaduhusi tödö hadia nifaʼemania khöda ba Zura Niʼamoniʼö.
Hewisa enaʼö tola öʼokhögö waʼauri simane daʼö ba zi so miföna? Fanema linia so ba artikel aefa daʼa.
^ par. 6 Enaʼö öʼila nasa sanandrösa ba wamoʼeluaha hegöi ba wamazawili Sura Niʼamoniʼö, bokai www.pr418.com/id, ba fili faosatö AJARAN ALKITAB > SEJARAH DAN ALKITAB.
^ par. 16 Enaʼö öʼila nasa, faigi mbuku Alkitab—Firman dari Allah atau dari Manusia? faza 9. Buku daʼa nifazökhi ndra Samaduhuʼö Yehowa ba no tehenaigö ia secara online. Ba wombaso buku daʼa, bokai www.pr418.com/id, ba fili faosatö PERPUSTAKAAN > BUKU & BROSUR.
Te Göi Adöni Dödöu
MANURIAIGÖ
Sindruhu Sanandrösa ba zi So Miföna
Aroʼö wanötönamö ba niwaʼö Lowalangi sanandrösa ba gulidanö ba zi so miföna hegöi ba niha.
MANURIAIGÖ
Hadia Moguna Wanuturu Lala moroi ba Zura Niʼamoniʼö ba Ginötö Daʼa?
Börö me tasöndra gangombakhata ero inötö, hana wa tafareso mbuku nifazökhi mato 2.000 fakhe silalö?
MANURIAIGÖ
Sura Niʼamoniʼö ba Faʼaurimö ba zi So Föna
Itolo ita Taromali Lowalangi wanaögö abula dödö salua ero ma’ökhö ba gulidanö si lö tatu andre. Ifalua göi nasa zi töra moroi ba da’ö. Itutunö khöda zahöli-höli dödö ba zi so föna.
