Haniha Döi Lowalangi? Imane Lowalangi, ”Yaʼo Yehowa, daʼö döigu.” (Yesaya 42:8) So mato 7.000 kali tesöndra döinia ba Zura Niʼamoniʼö. Hizaʼi, oya wamoʼeluaha Sura Niʼamoniʼö si no mangeheta töi Lowalangi ba lagati ia faoma töi faka, simane ”Soʼaya”. Sindruhunia omasi Lowalangi fahuwu ia khömö. Daʼö mbörö wa iʼandrö khömö enaʼö ’öʼangaröfili döinia’.—Sinunö 105:1.

Faka Yehowa. Ba Zura Niʼamoniʼö so faka Yehowa simane ”Lowalangi”, ”Fondrege Zabölö”, ”Somböwöi”, ”Ama”, ”Soʼaya”, hegöi ”Fondrege Zalawa”. Oya wangandrö si tesura ba Zura Niʼamoniʼö si no mufendrongagö ba wanötöi fakania hegöi töinia, Yehowa.—Danieli 9:4.

 Boto Lowalangi. Tebai taʼila Lowalangi börö me boto eheha ia. (Yohane 4:24) Itutunö ba Zura Niʼamoniʼö wa ”samösa lö niha si no irai mangila Lowalangi”. (Yohane 1:18) Hizaʼi, tenga daʼö geluahania wa lö irasoi hadia ia Lowalangi. Itutunö ba Zura Niʼamoniʼö wa tola afökhö dödönia mazui ”omuso dödönia” börö niha gulidanö.—Amaedola 11:20; Sinunö 78:40, 41.

Bua-Bua Yehowa Sahöli-höli Dödö. Lö ebua dödö zambuana Lowalangi. Iʼomasiʼö fefu niha gofu hezoso moroi ira. (Halöwö Zinenge 10:34, 35) Yaʼia göi ”si sökhi böwö, lö alio mofönu ba fahöna waʼomasi si lö faröi ba faʼaduhu”. (2 Moze 34:6, 7) Hizaʼi, so öfa ngawalö mbua-buania sabölö tohude si tola mameʼe omasi niha ahatö khönia.

Abölö. Börö me yaʼia ”Lowalangi Fondrege Zabölö”, lö suʼa-suʼa waʼabölönia irege tola ifalua fefu hadia ia zi no ifabuʼu.—1 Moze 17:1.

Faʼatua-tua. Abölö alawa faʼatua-tua Lowalangi moroi ba niha gulidanö. Itutunö ba Zura Niʼamoniʼö wa ha yaʼia ”fondrege zatua-tua”.—Roma 16:27.

Satulö. Lö tebulö Lowalangi ba wamalua satulö. Fefu nifaluania oi ”moʼahonoa” ba ”lö ebua dödö zambuana”.—5 Moze 32:4.

Faʼomasi. Iwaʼö ba Zura Niʼamoniʼö wa ”Lowalangi andrö no faʼomasi”. (1 Yohane 4:8) Tenga ha faʼomasi niʼokhögö Lowalangi, hizaʼi yaʼia samösa faʼomasi. Ebua sibai waʼomasinia irege tola tarasoi mbuania ba waʼaurida moroi ba ngawalö si no ifalua.

Tola Fahuwu Niha khö Lowalangi. Lowalangi simane samösa ama sebua faʼomasi. (Mataiʼo 6:9) Tola tobali ita si fahuwu khönia na mamati ita khönia. (Sinunö 25:14) Ba enaʼö ahatö ita khönia, iʼandrö khöda Lowalangi enaʼö mangandrö ita khönia ba ’tatouʼö ba dangania na so zabu dödöda gofu hadia ia, so so sa dödönia ita’.—1 Fetero 5:7; Yakobo 4:8.

Yesu Andrö Tenga Lowalangi. Yesu niwöwöi Lowalangi. Andrö wa lö fagölö ia khö Lowalangi. Hizaʼi, tohude Yesu börö me Lowalangi samösa zamazökhi yaʼia. Daʼö mbörö wa mufotöi ia Ono Lowalangi. (Yohane 20:31) Me no aefa iwöwöi Yesu, iʼogunaʼö ia Yehowa tobali ’tuka sonekhe’ ba womböwöi ngawalö tanö böʼö.—Amaedola 8:30, 31; Kolose 1:15, 16.

 Lö irai iwaʼö Yesu wa yaʼia Lowalangi. Imane ba wanutunö, ”Tohare ndraʼo tobali salahi [Lowalangi] ba yaʼia zamatenge yaʼo.” (Yohane 7:29) Aefa daʼö, me fahuhuo Yesu khö ndra nifahaʼönia, ikaoni khö Yehowa ’Amagu ba Amami’ hegöi ’Lowalangigu ba Lowalangimi’. (Yohane 20:17) Me no aefa mate Yesu, isusugi ia Yehowa ba zorugo ba tebeʼe khönia dadaoma salawa ba kuaso sebua ba gambölö Lowalangi.—Mataiʼo 28:18; Halöwö Zinenge 2:32, 33.

Itolo Ndraʼugö Yesu Keriso Enaʼö Ahatö khö Lowalangi

Möi Yesu ba gulidanö ba wamahaʼö yaʼita sanandrösa khö Namania. Imane Yehowa sanandrösa khö Yesu, ”Onogu daʼa, niʼomasiʼögu. Mifondrondrongo niwaʼönia.” (Mareko 9:7) Ha Yesu sabölö mangila sibai sanandrösa khö Lowalangi. Imane, ”Lö sangila haniha Nama andrö baero Nono hegöi niha nifahaʼö Nono andrö sanandrösa khö Nama.”—Luka 10:22.

Fagölö bua-bua Yesu khö Lowalangi. Börö me moʼahonoa woloʼö Yesu bua-bua Namania, andrö wa tola imane, ”Dozi si no mangila yaʼo ba no göi iʼila Nama.” (Yohane 14:9) Omasi Yesu na ahatö niha khö Lowalangi. Moroi ba wehede hegöi nifaluania, iforomaʼö Yesu wa Namania andrö iʼomasiʼö niha. Imane, ”Yaʼodo lala, yaʼodo waʼaduhu, ba yaʼodo waʼauri. Lö sondrugi Ama na lö itörö ndraʼo.” (Yohane 14:6) Imane nasa, ”Dozi samosumange sindruhu lafosumange Nama moloʼö fanuturu lala geheha niʼamoniʼö ba tefaudu ba zindruhu, börö me iʼalui Ama niha samosumange yaʼia simane daʼö.” (Yohane 4:23) Khalaigö daʼö! Iʼalui Yehowa niha somasi fahuwu khönia simane yaʼugö.