TOKEA sibai Doreen me lafatunö khönia wa no göna fökhö tumor guto wo’omonia sotöi Wesley, 54 fakhe ndröfinia. * Molo’ö doto, hatö mato hauga waŵa tö tola auri ia. Imane wanguma’ö, ”Awuwu dödögu me urongo da’ö. Lö fa’abölögu wamalua hadia-dia ia ba zi hauga migu. Lö faduhu dödögu wa alua da’a ba nösi nomogu. Lö fa’abölögu.”

Hiza’i, tenga ha khö Doreen alua zimanö. Gofu haniha manö tola göna fökhö sabölö-bölö solua-lua ba wa’amate. Sinangea musuno me ato zame’e inötö ba wo’ame’egö tödö niha ni’omasi’öra si no göna fökhö sabölö-bölö. Hiza’i, tenga halöwö saoha wondrorogö niha sofökhö. Hadia zi tola lafalua ira ösi nomo ba wondrara dödö hegöi ba wo’ame’egö tödö niha ni’omasi’öra si göna fökhö sabölö-bölö? Hewisa ena’ö tola lataha dödöra ira sondrorogö sofökhö sagötö lafalua da’ö? Hadia zi tola manö alua na arakhagö mate niha sofökhö? Siföföna, datafaigi hadia zi tobali daha-taha ba wondrorogö niha sofökhö sabölö-bölö ba ginötö iada’a.

Börö wa’atedou ilmu kedokteran, tola mudou’ö wa’anau noso niha. Ba zi otu fakhe silalö mazui töra, lö aganau noso niha zi to’ölönia, hewa’ae na ba soi-soi si maju. Na so wökhö si fatöfa, mazui alua zikho, si to’ölönia alio mate niha. Börö me abua we’amöi ba rumah sakit, ato nirorogö ba nomo khö ndra ösi nomora ba lua-luania mate ba nomo.

Iada’a, börö wa’atedou ilmu kedokteran, tola itolo niha sofökhö dokter ena’ö tola nasa anau noso. Ba tola abölö alio mudalu-daluni wökhö irege lö alio mate niha simane meföna. Hiza’i, tenga da’ö geluahania wa döhö wökhö. Börö me ambö fa’abölö ba niha sofökhö, itaria tebai larorogö ira samösa. Tobali, itugu abua ba itugu marase wondrorogö niha sofokhö.

 Tobali iada’a, tenga ba nomo murorogö niha sofökhö, hiza’i murorogö ba mate ba rumah sakit. Ato niha zi lö mangila hewisa niha sarakhagö mate andrö, ba ha ma’ifu niha si no irai mangila da’ö. Tobali, ato zi so fa’aombö-aombö dödö mazui lö omasi ba wondrorogö nösi nomora sofökhö. Na simanö, hadia zi tola mufalua na so nösi nomo sofökhö?

Simane salua ba duma-duma Doreen, ato niha safatö tödö ba ginötö la’ila göna fökhö sabölö-bölö niha ni’omasi’öra. Hewa’ae so wa’aombö-aombö dödö, fa’ata’u, hegöi fa’abu dödö, hadia zi tola manolo ya’ugö wanaögö ya’ia? Samösa nono mbanua Lowalangi si lö faröi sangandrö, ”Fahaö ndra’aga ba wangerai bongima, ena’ö masöndra dödö satua-tua.” (Zinunö 90:12) Angandrö soroi ba dödö khö Lowalangi Yehowa ena’ö tola ifatunö khöu lala ’wangerai bongi’ si fao fa’atua-tua ba tola ö’oguna’ö ginötö si toröi andrö ba nösi nomou sofökhö molo’ö lala si tefaudu.

Moguna muhenaigö da’a. Na tola nasa fahuhuo niha sofökhö ba omasi itutunö gabula dödö andrö, te abölö sökhi na ösofu khönia haniha zangai angetula khönia ba ginötö lö sa’ae fa’abölönia ba wamalua ya’ia. Haogö sofu khönia hadia omasi ia na mube’e khönia wanolo ba hanu-hanu, opname, mazui perawatan tanö bö’ö. Tola möi fanolo da’a na so wa’afaehu lala wangera-ngera hegöi fehede-hede dödö moroi ba nösi nomo sangai angetula ba niha sofökhö si tebai mamalua hadia-dia ia sa’e. Na no muhaogö wamatunö da’a ba wamobörö, tola lahaogö wondrorogö niha sofökhö ira ösi nomo. Imane Sura Ni’amoni’ö, ”Na lö famagölö, ba tobali lö boto niwa’ö.”​—Gamaedola 15:22.

Si to’ölönia, halöwö siföföna sibai nifalua zondrorogö niha sofökhö ya’ia da’ö wame’e fondrara dödö. Moguna mube’e wa’afaduhu dödö ba niha sofökhö wa mu’omasi’ö sibai ba tenga zi ha samösa-mösa ia. Lalania? Baso mbuku mazui anunöisi zinunö si tola mangomusoi’ö tödönia. Ato niha sofökhö zi terara tödö na so nösi nomo sololohe tangara ba sangehaogö khöra fahuhuo.

Asese göi moguna tafatunö khönia haniha zi möi mamaigi ya’ia. So sambua laporan sanguma’ö, ”Moroi ba zi lima indra ni’okhögöda, si to’ölönia zafuria sibai mohalöwö ya’ia da’ö famondro-ndrongo. Hewa’ae na hulö lö maoso-maoso niha sofökhö, hiza’i tola irongo-rongo nasa. Tobali, böi falua wehede hadia ia zi tebai öwa’ö mena’ö na no maoso ia.”

 Na tola, fao khönia ba wangandrö. Itutunö Sura Ni’amoni’ö wa ba zi samuza inötö, alua wamakao sabölö-bölö khö zinenge sotöi Faulo hegöi ira awö-awönia si fao ba wofanö ba lö la’ila hadia tola auri nasa. Hadia nifaluara? Imane Faulo khö ndra awö-awönia, ”Me no sanolo ya’aga göi ami, fangandrö.” (II Korindro 1:8-11) Moguna sibai wangandrö soroi ba dödö na so gabula dödö sebua ba fökhö sabölö-bölö.

Tatu abu sibai dödöda na so nösi nomoda sarakhagö mate. No sinangea na abu sibai dödöda, börö sindruhunia tenga ena’ö mate wa muwöwöi ita. (Roma 5:12) Da’ö mbörö wa ifotöi Taromali Lowalangi wa’amate andrö tobali ”zi fa’udu”. (I Korindro 15:26) Tobali, no sinangea na lö omasi ta’angerai-ngeraigö wa’amate nösi nomoda.

Hiza’i, na no tehenaigö nösi nomo ba wanaögö hadia zalua, lö talafo ata’u ira ba tola la’angeraigö hewisa lala ena’ö lö daha-taha wa’alua da’ö fefu. Ba kotak ” Ba zi Hauga Migu Fatua Lö Mate”, tola ö’ila hadia manö dandra-tandra si tola alua. Tatu lö fagölö fefu zalua ba niha sofökhö, ba tola manö lö toföfö wa’aluania. Hiza’i, zi to’ölönia asese alua da’ö ba niha sofökhö.

Na no aefa mate niha sofökhö andrö, te abölö sökhi na öfatunö khö zi fahuwu khöu si no fao dödö ba zilalö ba wame’e fanolo. Te moguna labe’e wa’afaduhu dödö ba niha sondrorogö mazui ba nösi nomo wa lö sa’e tefakao niha sofökhö andrö. Ibe’e khöda wa’afaduhu dödö Somböwöi niha sebua fa’omasi wa ”si no mate, ba lö hadia ia la’ila”.​—Zangombakha 9:5.

Moguna sibai ö’odaligö Lowalangi, tenga ha me ahatö mate nösi nomou hiza’i moguna göi nasa na no aefa wangabu dödö börö wa’amate. Tola itolo ndra’ugö Lowalangi moroi ba wehede hegöi nifalua niha bö’ö. Imane Doreen, ”Ufaha’ö ndra’o ena’ö lö utimbagö wanolo moroi ba niha bö’ö. Sindruhunia, oya sibai wanolo nitemama. Faduhu dödögu hegöi fo’omogu ira matua, hulö na imane Yehowa, ’So do ba da’a khöu ba wanolo ya’ugö.’ Lö irai u’olifugö da’ö.”

Lowalangi Yehowa no Sanolo fondrege zi sökhi. Börö me ya’ia Zomböi ya’ita, tatu aboto ba dödönia wamakao hegöi fa’abu dödöda. Tola ibe’e khöda wanolo si tefaudu hegöi famarou dödö ena’ö tola tataögö fefu da’ö. Sabölö sökhi nasa, no ifabu’u wa ba zi lö aratö hasambalö iheta wa’amate ba isusugi niha si no mate si miliaran fa’ato nitörö tödönia. (Yohane 5:28, 29; Fama’ele’ö 21:3, 4) Aefa da’ö, fefu a’oi tola lawa’ö wehede niwa’ö Waulo, ”Hezo wemönau, fa’amate? Hezo duomö, fa’amate?”​—I Korindro 15:55.