Hadia tola faduhu dödöda wa hasambalö alua fefu zi no ifabu’u Lowalangi? Faduhu dödö Yesu wa hasambalö alua zi no ifabu’u Lowalangi. Niha samondro-ndrongo famaha’önia göi tola la’okhögö wamati simane da’ö. Angeraigö duma-duma Yesu ba Huhuonia ba Hili, nisura ba Matai’o 5:18, ”Sindruhu sa niwa’ögu khömi, irugi adudu mbanua si yawa, awö danö, ba lö awu’a zambua dandra zura andrö, ba he si sambua niti, ba Goroisa andrö, irege no ahori itörö.”

Hurufo fondrege zide-ide moroi ba hurufo Heberai’o ya’ia da’ö י (yod). Da’a hurufo siföföna ba Tetragramaton, ya’ia da’ö töi Lowalangi ni’amoni’ö, Yehowa. * Molo’ö ndra sanura hegöi niha Farizai’o, faosatö sabölö moguna ba Goroisa Lowalangi tenga ha ngawua wehede hegöi hurufo, hiza’i ”fondrege zide-ide moroi ba hurufo göi”.

Imane Yesu, tola taya mbanua si yawa ba awu’a danö moroi na lö itörö ngawua wehede side-ide moroi ba Goroisa. Hiza’i, no ifabu’u Sura Ni’amoni’ö wa lö tebulö mbanua si yawa awö danö. (Zinunö 78:69) Moroi ba da’a mu’ila wa hasambalö alua Goroisa andrö fefu, ofeta wondrege zide-ide.

Hadia i’ame’egö tödö Yehowa ngawalö zide-ide andrö? Tatu manö. Angeraigö atö: Meföna, lö mutehegö ba ndraono Gizara’eli ba wamatö döla mbiri-biri Wasa. (II Moze 12:46) Tola manö, oroisa side-ide da’a. Hadia aboto ba dödöra hadia mbörö wa tebai lafatö döla andrö? Te lö’ö. I’ila Lowalangi Yehowa wa da’ö sambua fama’ele’ö sanandrösa khö Mesia wa lö hadöi tölania safatö ba ginötö muhuku ia ba döla geu famakao.​—Zinunö 34:21; Yohane 19:31-33, 36.

Hadia zi tobali famaha’ö khöda moroi ba wehede Yesu? Moguna göi sindruhu-ndruhu faduhu dödöda wa hasambalö alua fefu zi no ifabu’u Yehowa irugi fondrege zide-ide. Sambua fa’aro dödö moroi ba wondrege zide-ide ba hurufo Heberai’o andre!