Tumbu ndra’o ba Ciudad Mante, banua si baga-baga ba Tamaulipas, Meksiko. Ogoböwö niha si so ba da’ö ba fahuwu göi. Hiza’i, börö me oya gorudua niha si lö sökhi, andrö wa ata’u niha we’amöi ba mbanua andrö.

Ono numero dua ndra’o moroi ba gotalua zi daöfa si fatalifusö. Lafabayagö’ö idanö ndra’o ira satuagu ba Gereja Katolik, ba fao ndra’o ba gangowuloa ndra sanunö. U’omasi’ö Lowalangi börö me ata’udo na lafakao ndra’o dania ba galitö narako.

Me lima fakhe ndröfigu, iröi ndra’aga bapagu. Afökhö sibai dödögu. Lö u’ila hadia mbörö wa iröi ndra’aga bapagu, hiza sa ma’omasi’ö sibai ia. Mohalöwö mamagu ba wobalazoi ya’aga, iraononia si daöfa.

U’oguna’ö ginötö da’ö wa lö möi ba zekola ena’ö tola fariawö ndra’o ba ndraono tanö bö’ö sabölö atua moroi khögu. Lafaha’ö ndra’o fahölu ba mangelifi, moroko, managö, ba fa’udu. Börö me omasido ufatörö niha, ufomaha ndra’o fatezu, fagulat, fakarate, hegöi ba wangoguna’ö wana. Tobali niha samu’i ndra’o. Asese fao ndra’o fafana, ba asese mendro ndra’o ba laröi manö ndra’o ba zinga lala. Afökhö sibai dödö mamagu me i’ilado, ba ifazawado, i’ohe ndra’o ba rumah sakit!

Me 16 fakhe ndröfigu, möi nawögu me iraono ba nomo, töinia Jorge. Iwa’ö wa Samaduhu’ö Yehowa ia, ba so duria somasi ifa’ema khöma. Ifatunö hadia nifaduhusinia tödö moroi ba Zura Ni’amoni’ö. Lö irai ubaso Zura Ni’amoni’ö, ba omasido sibai wamahaö ya’o ba döi Lowalangi hegöi ba nifabu’unia. Isofu Jorge hadia omasi ndra’aga na mafaha’öga ba Zura Ni’amoni’ö. Mawa’ö, omasiga.

Ahono sibai dödögu me no aefa u’ila wa alitö narako tenga famaha’ö moroi ba Zura Ni’amoni’ö. (Zinunö 146:4; Zangombakha 9:5) Börö da’ö, lö ata’udo sa’ae. Molo’ö ya’o, hulö Ama sebua fa’omasi Lowalangi andrö, omasi ia na latema fefu zi sökhi iraononia.

 Börö me itugu tedou wamaha’ögu ya’o ba Zura Ni’amoni’ö, aboto ba dödögu wa moguna ubulö’ö wa’aurigu. Moguna so khögu wangide-ngide’ö ba uröi zi lö sökhi. Mene-mene sanolo ya’o ya’ia da’ö nisura ba I Korindro 15:33 sanguma’ö wa ’ifakiko mböwö si sökhi huhuo si lö sökhi’. Aboto ba dödögu, na omasi tabulö’ö wa’aurida, moguna ta’aröu’ö ita moroi ba niha sondrönisi ya’ita ba zi lö sökhi. Börö da’ö, lö fariawö ndra’o sa’ae khöra, hiza’i khö ndra talifusö si sara lala wamati sangasiwaisi fefu hadia ia si te’odane-dane ba Zura Ni’amoni’ö tenga ba wa’alösökhi.

Ayati tanö bö’ö, ba Roma 12:17-19. Imane, ”Böi misulöni zi lö sökhi awönia si lö sökhi, ba niha; . . . Na dali ami, ba ya’atulö ami ba niha fefu. Böi milau mbalömi, . . . noa sa so ba zura: ’Khögu wolau balö, ya’o zanulöni, iwa’ö So’aya.’” Fao dödögu, Yehowa zanulöni. Uda’i-da’i ba wondröi fefu zi lö sökhi si no irai ufalua.

Lö irai u’olifugö zalua ba zi sara wongi me mangawulido ba nomo. So ndraono matua si bohou ebua, udugu me mböröta, lafaondragödo, ba lagarogoido, ibözi döla hulugu kafalora, ba i’ebuakö linia, ”Aine, talau fabago!” Ba ginötö da’ö, ulau mangandrö khö Yehowa, u’andrö khönia ena’ö tola utaha dödögu ba nifaluara andrö. Hewa’ae na so dödögu ba wanulöni, lö utötöna wa tola utaha dödögu. Mahemolunia, u’ondrasi gafalo geng andrö, ha samösa-mösa ia. Mofönudo sibai, hiza’i sakalitö ufuli u’andrö khö Yehowa ena’ö ibe’e khögu wanaha tödö. Ba zi lö udöna-döna i’ondrasi ndra’o samösa nono matua ba imane, ”Bologö dödöu ba zalua menewi. Omasido na tobalido simane ya’ugö. Omasi ufaha’ö ndra’o ba Zura Ni’amoni’ö.” Omuso sibai dödögu me tola utaha wönugu! Da’ö mbörö wa ibörögö ifaha’ö ia.

Hiza’i, lö latohugö wamaha’ö ya’ira ira nösi nomogu me ba ginötö da’ö. Ba uhalö gangetula wa udou’ö wamaha’ögu ya’o ba lö utehegö hadia ia si tobali fanaisigu. Aboto ba dödögu, na fariawö ndra’o ba nono mbanua Lowalangi, tola tefadöhö zokho dödögu ba hulö zoroi yomogu ira. Itugu tedou ndra’o ba wamati ba tebayagö ndra’o idanö tobali Samaduhu’ö Yehowa ba ndröfi 1991.

Me mböröta, niha si lö sökhi ndra’o, omasido ufatörö niha bö’ö, ba afaito sibai ndra’o. Hiza’i, Taromali Lowalangi zombulö’ö fa’aurigu. Iada’a, ufa’ema duria somuso dödö ba niha somasi mamondro-ndrongo. Ohahau dödögu me uhalö halöwö fanuriaigö safönu inötö ba zi 23 fakhe fa’ara.

No irai mohalöwödo ba gödo ndraha si so ba Meksiko. Ba da’ö falukha ndra’o khö Claudia, talifusöda ira alawe sanuriaigö safönu inötö, ba mangowalu ndra’aga me döfi 1999. U’andrö sibai saohagölö khö Yehowa me no ibe’e nawögu ba wa’auri, si lö faröi.

Matolo mbanua niha Keriso Bahasa Isyarat ba Meksiko, matolo niha si lö mangila muhede ena’ö lafaha’ö ira sanandrösa khö Yehowa. Aefa da’ö, lafatenge ndra’aga ba Belize ba wanolo niha ena’ö lafaha’ö ira ba Zura Ni’amoni’ö. Hewa’ae ha si to’ölö manö wa’aurima, hiza’i owua-wua dödöma ba zi no ma’okhögö. Ba lö omasiga tefalalini ia ba danö bö’ö.

Ba gafuriata, ifaha’ö ia mamagu ba Zura Ni’amoni’ö ba tebayagö ia idanö. Ga’agu ndra matua, fo’omonia ba ononia, iada’a tobali ira Samaduhu’ö Yehowa. Awögu si no irai ufaha’ö ba Zura Ni’amoni’ö göi tobali ia Samaduhu’ö Yehowa.

Hiza’i, so ösa nösi nomogu si mate börö me lö sökhi lala wa’aurira. Na simane ya’ira mena’ö ndra’o, tatu manö fagölö lua-lua wa’aurima. U’andrö sibai saohagölö me no ituyu ndra’o Yehowa tobali ono mbanuania, ebolo sibai dödö zamaha’ö ya’o, sökhi gamuatania ba wanolo ya’o ba wangaurifagö goi-goi Zura Ni’amoni’ö.