Itörö tödö Seth *, ”Fendronga ndra’aga wo’omogu me lafabatogö khöma wohalöwö. Ba zi dua fakhe fa’ara, latolo ndra’aga ira si fahatö khöma ba lö manö tatu halöwöma. Da’ö zame’e baku gutogu hegöi fo’omogu, Priscilla, ba hulö lö mo’eluaha sa’ae ndra’aga.

”Hewisa wanaögö ya’ia? Itörö tödö Priscilla wehede Yesu ba Matai’o 6:34. Iwa’ö Yesu wa lö moguna tabusi tödö zoguna mahemolu börö me tasöndra lala zabu dödö mahemolu. Fangandrönia zangabölö’ö ya’ia. Zinunö 55:23 zondarara tödögu. Simane sanura mbuku zinunö, ube’e khö Yehowa fefu noro dödögu, ba urasoi wanolonia ya’o. Iada’a so halöwögu, ba ma’öna-önaisi wa’aurima simane mene-mene Yesu ba Matai’o 6:20-22. Itugu ahatö ndra’aga khö Lowalangi, simanö göi gamakhaitama ya’aga si darua.”

Ifaduhu’ö Jonathan, ”Ata’u ndra’o na samuza inötö dania tekiko bisnisma ba tosasa ndra’aga. Börö krisis ekonomi, andrö wa lö eluaha nisöndrama ba zi 20 fakhe fa’ara. Asese fa’udu ndra’aga wo’omogu ira alawe börö gefe. Ata’uga ma’oguna’ö kartu kredit na möiga mowöli, ata’uga na lö latema.

”Hiza’i, fa’abölö Zura Ni’amoni’ö zanolo ya’o ba wangai angetula si sökhi. Omasido u’ohalöwögöigö gofu hadia manö, ba lö u’öli gama-gama si lö moguna. Börö me Samaduhu’ö Yehowa ndra’aga, latologa ira talifusö si sara lala wamati. Larorogö döima ba la’oro’ö dangara ba wanolo ya’aga ba ginötö göna abula dödö.”

Itutunö Raquel, ”Me iröi ndra’o fo’omogu ira matua, mofönudo ba afökhö dödögu. Abu sibai dödögu. Hiza’i, uhatö’ö ndra’o khö Lowalangi, ba irara dödögu. Fa’atulö moroi khö Lowalangi zondrorogö tödögu me mangandrödo khönia ero ma’ökhö. Urasoi wa idalu-daluni zokho dödögu.

”Ba u’andrö saohagölö börö Daromalinia, Sura Ni’amoni’ö, sanolo ya’o ba wanaha fönu. Itörö tödögu mene-mene Zura Ni’amoni’ö, ’Böi ilawa ndra’ugö si lö sökhi, be’e folawa zi lö sökhi zi sökhi.’​—Roma 12:21.

”Samösa nawögu zamasugi ba dödögu ena’ö böi awuwu ndra’o. I’oroma’ö khögu Zangombakha 3:6, ba ihaogö wanguma’ö khögu wa tola manö so zataya ba wa’aurida. Abua sibai mene-mene andrö, hiza’i moguna u’o’ö. Iada’a, mo’eluaha wa’aurigu.”

Imane Elizabeth, ”Ba ginötö tekiko wongambatöu, moguna latolo’ö. So nawögu zanolo ya’o ero ma’ökhö. Fao ia khögu we’e, irara dödögu, ba urasoi wa i’omasi’ö ba lö i’ositengagö ndra’o. Faduhu dödögu wa i’odela ia Yehowa ba wamadöhö zokho dödögu.”

Luis, nitötöi ba wamobörö duho andre, abölö-bölö khönia wökhö tödö, ba no irai arakhagö mate ia ba zi dua inötö. Iada’a, i’oguna’ö oksigen 16 za ba zi sara ngaluo. Imane wanguma’ö, ”Lö faröi ndra’o ba wangandrö khö Yehowa. Me no aefa mangandrödo khö Lowalangi, urasoi wa’abölö gehehania ba wa’aurigu. Fangandrö zangabölö’ö ena’ö so khögu wa’aro dödö börö me u’ila ba ufati wa i’ame’egö tödö ndra’o.”

Petra si 80 fakhe, imane wanguma’ö, ”Oya zomasido ufalua, ba tebai ndra’o. Abua khöda wo’angeraigö wa itugu alö wa’abölöda. Alio atage ndra’o ba u’odaligö dalu-dalu. Asese ukhalaigö me ba ginötö i’andrö Yesu khö Lowalangi, na tola mena’ö, te’efa’ö ia moroi ba wa’afökhö. I’abölö’ö Yesu Yehowa, hegöi ya’o. Fangandrö no dalu-dalu khögu. Itugö sökhi wa’aurigu na no aefa ulau mangandrö.”​—Matai’o 26:39.

 I’odödögö Julian ba wolawa fökhö sklerosis multipel ba zi 30 fakhe. Imane wanguma’ö, ”Me mböröta, mudadao ndra’o ba gurusi wohalöwö. Iada’a, ba gurusi roda so ndra’o. Mo’eluaha wa’aurigu börö me utolo niha bö’ö. Mamuala, zi möi fangalö wökhöda, ba oroma wa sindruhu i’abölö ita Yehowa ba ginötö si tefaudu. Hulö simane niwa’ö Zura Ni’amoni’ö, ’Ulawa manö fefu, börö zangabölö’ö ya’o andrö.’”​—Filifi 4:13.

Imane Antonio, ”Me itörö tanö bapagu, itandru ia moto ba mate. Abua khögu wotema’ö salua andrö. Lö sinangea mena’ö alua da’ö. Koma ia lima hari fatua lö mate. Lö u’oroma’ö wa’abu dödögu föna mamagu, hiza’i ba zi ha ya’o ba ulau me’e. Hana? Hana? Manofu-nofu manö dödögu.

”Ba ginötö andrö, u’andrö khö Yehowa ena’ö tola utaha dödögu ba ena’ö ibe’e khögu wa’ahono dödö. Awena ahono dödögu. Itörö tödögu niwa’ö Zura Ni’amoni’ö wa ’no ha sambua ginötö ba no ha sara zi göna ira fefu’. Börö me lö falimo Lowalangi, faduhu dödögu wa hasambalö ifuli falukha ndra’o khö bapagu na tesusugi ia dania.”​—Zangombakha 9:11; Yohane 11:25; Tito 1:2.

Robert, nitötöi ba wamobörö duho andre, so khönia wangera-ngera si fagölö. Imane wanguma’ö, ”Ba wangandrö khö Yehowa, urasoi hegöi fo’omogu, Maribel, wa so khöma wa’ahono wangera-ngera simane niwa’ö ba Filifi 4:6, 7. Börö wa’ahono dödö andre wa tola fahuhuo ndra’aga khö reporter TV sanandrösa ba wanötönama wa so wanusugi zi mate. Hewa’ae na no mate nonoma ba wa’atoru göfa si hombo, hiza’i so zalua sauli itörö tödö ba wefaoma khönia. Da’ö nitörö-törö tödöma.

”Me so ndra talifusö sanguma’ö wa so khöma wa’ahono ba wame’e fanemali me lasofu-sofu khöma ba TV, mawa’ö wa tola mafalua fefu da’ö börö wangandröra. Faduhu dödögu wa itolo ndra’aga Yehowa, i’odela wehede fondrara dödö sofeta khöma.”

Simane si no agalua no mege, tola ihenaigö wondrara dödö Lowalangi ba niha si tefakao ba si göna abula dödö. Hewisa göi ndra’ugö? Gofu hadia zalua khöu, so wondrara dödö si tola manolo ya’ugö ba wanaögö fefu da’ö. * Andrö wanolo moroi khö Yehowa. Ya’ia andrö ”Lowalangi wondrara dödö, fefu”.​—II Korindro 1:3.