Itutunö Faulo wa Yehowa * andrö ”Lowalangi wondrara dödö, fefu, sondrara tödöma, ba wa’afökhö andrö fefu, khöma”. (II Korindro 1:3, 4) Andrö wa ibe’e khöda wa’afaduhu dödö Zura Ni’amoni’ö wa gofu hadia ia gabula dödö salua khöda, hasambalö itolo ba irara dödöda Lowalangi börö me Amada si so ba zorugo ia.

Tatu manö, so zinangea tafalua na omasi ita tatema wondrara dödö moroi khö Lowalangi. Tola itolo ita doto na no tohöna fazazi ita falukha khönia. Andrö wa ifarou ita Sura Ni’amoni’ö, ”Mi’ondrasi Lowalangi, ba i’ondrasi ami!”​—Yakobo 4:8.

Hana faduhu dödöda wa hasambalö ahatö khöda Lowalangi? Si oföna, börö me asese iwa’ö wa hasambalö itolo ita. (Faigi  kotak.) Si dua, börö me ta’ila hewisa wame’e Lowalangi fondrara dödö ba niha gulidanö me götö föna hegöi ba ginötöda andre.

Ato niha sangalui fanolo moroi khö Lowalangi, simanö göi Razo Dawido me göna ia wangabu dödö. Mangandrö ia khö Yehowa, ”Fondro-ndrongo li wangandrögu andrö, na mu’aodo khöu.” Hadia itema wangandrönia Lowalangi? Itema. Imane Dawido, ”No te’orifi ndra’odo; andrö owua-wua dödögu.”​—Zinunö 28:2, 7.

Omasi Lowalangi na irara dödö niha si göna wangabu dödö Yesu. Andrö wa ifatenge Yesu ”ba wodalu-daluni si no arasa tödö” hegöi ”ba wondrara tödö zabu tödö fefu”. (Yesaya 61:1, 2) Tefaudu ba zi no mufa’ele’ö andrö, i’ame’egö tödö Yesu niha ”serege tödö, awö zonoro”.​—Matai’o 11:28-30.

Lala wame’e Yesu wondrara dödö ba niha ya’ia da’ö ibe’e mene-mene si fao fa’atua-tua, ihaogö wanguma’ö, ba ifadöhö zofökhö. Samuza inötö, imane zi göna bou auri khö Yesu, ”Na edöna ndra’ugö, ba ö’ila öfadöhö wökhögu.” Börö me ahakhö dödönia, imane Yesu, ”Edöna ndra’o, yadöhö!” (Mareko 1:40, 41) Ba döhö niha andrö.

 Iada’a, lö möi Nono Lowalangi andrö tou ba gulidanö ba wame’e fondrara dödö khöda zamösana. Hiza’i, Amania, Yehowa, no ”Lowalangi wondrara dödö, fefu”, si lö mamalö-malö ba wame’e fanolo si tefaudu ba zoguna khöda. (II Korindro 1:3) Datafaigi öfa ngawalö lala si föföna ni’oguna’ö Lowalangi ba wame’e khöda fondrara tödö.

• Sura Ni’amoni’ö. ”Hadia ia sa nisura föna, ba ba wamahaö ya’ita tesura ia, ena’ö so khöda wanötöna andrö, moroi ba wa’ebolo dödö andrö ba moroi ba wondrara dödö andrö, nirongoda ba zura.”​—Roma 15:4.

• Eheha Lowalangi. Lö ara me no mate Yesu, so wa’ahono dödö ba mbanua niha Keriso. Hadia mbörö? Börö me ”latörö lala Zo’aya, la’ata’ufi ia, ba fahöna khöra wondrara dödö khö geheha ni’amoni’ö”. (Halöwö Zinenge 9:31) Eheha ni’amoni’ö no fa’abölö moroi khö Lowalangi. I’oguna’ö da’ö Lowalangi ba wame’e fondrara dödö, gofu haniha ira ba gofu hadia ia zalua khöra.

• Fangandrö. I’amenesi ita Sura Ni’amoni’ö, ”Böi mibusi tödö hadia ia . . . mibokai khö Lowalangi . . . Ba irorogö dödömi, awö gera-erami fa’ohahau dödö andrö, khö Lowalangi, sabölö moroi ba gera-era niha fefu.”​—Filifi 4:6, 7.

• Talifusöda Niha Keriso göi zame’e khöda fondrara tödö ba ginötö göna ita abula dödö. I’amaedolagö Faulo ndra talifusöda andrö ’tobali fondrara dödöda’ ba ginötö göna ita ”wa’afökhö andrö fefu, ba ba wamakao andrö”.​—Kolose 4:11; I Tesalonika 3:7.

Tola manö manofu dödöda hewisa wa tola möi fanolo fefu da’ö. Moguna tatörö tödöda niha si no irai göna famakao. Simane ya’ira, tola faduhu dödöu wa hasambalö ifalua zi no ifabu’u Lowalangi, ”Simane na irara dödö nononia ina wondraragu tödömi.”​—Yesaya 66:13.