Hadia itörö tödöu me alabu’ö me iraono ndra’ugö? Te mesokho dangau mazui azaza mbalö duhiu. Hadia itörö tödöu hewisa me irara dödöu mamau? Tatu manö, idalu-daluni zokhou. Me’e ndra’ugö, hiza’i fehedenia si sökhi ba fanalaguinia ya’ugö zame’e khöu fa’ahono dödö. Ba ahono sibai dödöu ba ginötö da’ö. I’otarai da’ö lö sa’ae tebulö ösöndra wondrara dödö.

Hiza’i, itugu alawa ndröfida, itugu monönö gabula dödöda ba abua wanöndra fondrara dödö. Abula dödö niha si no alawa döfi, tebai te’asiwai ia ba dalu-dalu mazui fanalagui zi samösa ina. Angeraigö duma-dumania.

• Hadia no irai so wa’ata’umö me la’efasi ndra’ugö ba halöwö? Imane Julian, me la’efasi ia ba halöwönia, tokea ia ba afatö dödönia. Imane tödönia, ’Hewisa wobalazoigu soroi yomogu? No ara mohalöwödo ba da’ö, ba hana wa lö sa’ae ba dödöra ndra’o?’

• Tola manö abu dödöu börö me lö fa’ohahau dödö ba wongambatöu. Itutunö Raquel, ”Lö udöna-döna me iröi ndra’o fo’omogu me 18 waŵa silalö, abu dödögu. Afatö sibai dödögu. Mofökhö ndra’o ba afökhö dödögu. So khögu wa’ata’u.”

• Tola manö abu dödöu ba wökhöu si lö manö i’ila döhö. Tola manö göi alua khöu simane nirasoi wurugö sotöi Yobi, i’e’esi wa’aurinia, ba iwa’ö wa lö omasi ia auri. (Yobi 7:16) Tola manö fagölö dödöu simane Luis, ira matua si 80 fakhe sanguma’ö, ”Itaria hulö zombalo-baloi fa’amate ndra’o.”

• Mazui, börö wa’amate niha ni’omasi’öu, andrö wa moguna sibai khöu wondrara dödö. Itutunö Robert, ”Me mate nonogu matua ba wa’atoru göfa si hombo, hulö ambö faduhu dödögu. Ba gafuriata, afökhö sibai dödögu, iwaö Sura Ni’amoni’ö hulö nifahö faoma wöda rasonia.”​—Luka 2:35.

Robert, Luis, Raquel, ba Julian, lasöndra wondrara dödö hewa’ae na göna ira wangabu dödö. Aboto ba dödöra wa so zohenaigö fondrara dödö, ya’ia da’ö Lowalangi si Lö Ambö Fa’abölö. Hewisa wohenaigönia da’ö? Hadia ihenaigö göi wondrara dödö si tefaudu ba zoguna khöu?