Sura Niʼamoniʼö zanutunö wa itaria lalumöʼö ira malaʼika nono mbanua Lowalangi enaʼö tola alua gohitö dödö Lowalangi. (Zinunö 34:8) Duma-dumania:

• Me edöna Yehowa ba wohori mbanua Zodoma hegöi Gomora börö waʼalösökhi nifaluara, malaʼika zanolo Loti si lö faröi hegöi ösi nomonia enaʼö tola moloi ira.​—I Moze 19:1, 15-26.

• Ba Mbabilona meföna, me latiboʼö datölu ndraono matua Heberaiʼo ba mbaho galitö, Lowalangi ”si no mamatenge malaʼikania ba si no mangorifi enoninia andrö”.​—Danieli 3:19-28.

• Me no sara wongi bakha ba dögi zingo solofo, ifatunö Danieli wa tola teʼefaʼö ia börö me ’no ifatenge malaʼika khönia Lowalangi, ba no ikusi mbawa zingo’.​—Danieli 6:17, 23.

Itaria mufatenge malaʼika ba wanolo halöwö nifalua mbanua niha Keriso ba abad siföföna na moguna daʼö ba wangoʼozui ohitö dödö Lowalangi. Duma-dumania:

• Malaʼika zamokai mbawandruhö gurunga khö ndra sinenge ba ifarou ira enaʼö lö laböhöli wanuriagö ba gosali.​—Halöwö Zinenge 5:17-21.

• Malaʼika zamatenge Wilifo, samösa sanuriaigö, weʼamöi ba lala sanörö tanö si mate si otarai Yeruzalema saekhu ba Gasa, ba wanuriaigö khö ndrawa Gaitiofia si bohou möi mangandrö ba Yeruzalema.​—Halöwö Zinenge 8:26-33.

• Me itatugöi Lowalangi wa tola tobali niha Keriso si tenga niha Yahudi, ba gangilata fahuhuo samösa malaʼika khö Konelio, sondröniaʼö zaradadu Romawi enaʼö ikaoni Waulo ba nomonia.​—Halöwö Zinenge 10:3-5.

• Me so ba gurunga zinenge sotöi Fetero, tohare malaʼika khönia ba igogohe dangania weʼamöi baero ba gurunga.​—Halöwö Zinenge 12:1-11.

Lö hadöi zi tobali tandra wa iʼogunaʼö nasa malaʼikania iadaʼa Lowalangi ba wanolo niha faoma tandra sahöli-höli dödö simane si so ba Zura Niʼamoniʼö. Hizaʼi, sanandrösa ba götöda, imane Yesu, ”Ba teturiaigö dania Mbanua Lowalangi andrö, turia somuso dödö, ba gulidanö misa, maʼasagörö, ba wamaduhuʼö ba niha fefu, ba awena dania faʼatua danö.” (Mataiʼo 22:14) Hadia öʼila wa lafalua halöwö andrö ira nifahaʼö Keriso barö wamaigi-maigi ndra malaʼika?

Buku Famaʼeleʼö zanutunö wa latolo niha ira malaʼika enaʼö tola lafahaʼö ira sanandrösa khö Lowalangi Yehowa hegöi ohitö dödönia ba niha. Isura sinenge sotöi Yohane, ”Ba uʼila malaʼika böʼö, si hombo, ba dalu mbanua si yawa, si so turia somuso dödö si lö aetu, ba wanuriaigö ba zi so ba gulidanö, ba ngawalö soi fefu, ba ba ngawalö niwa, ba ba ngawalö li, ba ba ngawalö mado fefu, no ebua linia, imane: Miʼataʼufi Lowalangi, ba mibeʼe khönia zumange, me no irugi inötö wanguhuku andrö khönia, ba miʼangalulu khö zamazökhi banua si yawa, ba tanö, ba asi, ba umbu nidanö andrö.” (Famaʼeleʼö 14:6, 7) Iadaʼa, oya zalua zangoromaʼö wa fao ndra malaʼika ba wotuhini halöwö fanuriaigö nifalua ba zi sagörö ulidanö. Ba ginötö so samösa niha samalalini era-era ba tobali samosumange Yehowa ba so ”waʼomuso dödö ba zanehe malaʼika andrö, ba zorugo”.​—Luka 15:10.

Hadia zalua na no awai halöwö fanuriaigö? Ira malaʼika ”sanuwö andrö, ba zorugo” fao ira khö Yesu, Razo yawa razo, ”ba wanuwö andrö, na baŵa sebua khö Lowalangi, Samatörö fefu hadia ia” ba Hamagedo. (Famaʼeleʼö 16:14-16; 19:14-16) Ira malaʼika sabölö andrö zamalua fanguhuku moroi khö Lowalangi ba ginötö ifalua Zoʼaya Yesu ’wolau mbalö ba zi lö moloʼö turia somuso dödö andrö, khö Zoʼaya yaʼita, Yesu’.​—II Tesalonika 1:7, 8.

Börö daʼö, yafaduhu dödöu wa laʼameʼegö tödö ndraʼugö ira malaʼika. Laʼameʼegö tödö sibai göi niha somasi mamosumange Lowalangi, ba no asese iʼogunaʼö ira Yehowa ba wangabeʼeʼö hegöi ba wolumöʼö ono mbanuania si lö faröi ba gulidanö.​—Heberaiʼo 1:14.

Dozi ita, moguna tahalö gangetula sabölö moguna. Hadia tafondro-ndrongo ba taʼoʼö duria somuso dödö nituriaigö ba zi sagörö ulidanö? Omasi latolo ndraʼugö ira Samaduhuʼö Yehowa si so ba mbanua si toröi yaʼugö enaʼö tola örasoi wanolo moroi khö malaʼika nifatenge Lowalangi.